Ol Famili Kristen​—“Redi i Stap”

“Redi i stap, long wanem, Pikinini bilong man bai kam long taim yupela i no ting em bai kam.”​—LUK 12:40.

1, 2. Bilong wanem yumi mas tingim gut tok bilong Jisas long “redi i stap”?

 “TAIM Pikinini bilong man i kam wantaim glori bilong en” na tilim “ol manmeri long tupela lain,” wanem samting bai painim yu na famili bilong yu? (Mat. 25:​31, 32) Dispela samting bai kamap long taim yumi no ting em bai kamap, olsem na em i bikpela samting long yumi tingim gut tok bilong Jisas long “redi i stap”!​—Luk 12:40.

² Stadi i kamap paslain long dispela i bin stori long wok ol wan wan insait long famili i mas mekim, na olsem wanem dispela i helpim famili olgeta long was i stap. Nau yumi ken skelim ol narapela samting yumi inap mekim bilong helpim famili long stap strong long sait bilong lotu.

Lukluk Long “Wanpela Samting Tasol”

3, 4. (a) Ol famili Kristen i mas lukaut long wanem samting? (b) Wanem mining bilong dispela tok, ai i mas lukluk long “wanpela samting tasol”?

³ Bilong stap redi taim Krais i kam, ol famili i mas was gut na no ken larim ol samting i pulim ol na ol i no tingim ol wok bilong lotu i tru. Ol i mas lukaut gut long ol samting em inap pulim  tingting bilong ol. Pasin bilong laikim tumas mani kago em i wanpela trap em planti famili i pundaun long en, olsem na tingim tok Jisas i mekim long ai i mas lukluk long “wanpela samting tasol.” (Ritim Matyu 6:​22, 23.) Long Baibel ol i bin raitim pastaim long tok Grik, Pol i stori long “ai bilong bel.” Olsem wanpela lam inap helpim yumi na yumi no pundaun taim yumi wokabaut long rot, ol samting yumi lukim long “ai bilong bel” inap helpim yumi long wokabaut stret na yumi no pundaun.​—Efe. 1:18.

⁴ Bilong ai tru i ken lukim gut ol samting, em i mas wok gut na inap lukim klia samting em i lukluk long en. Na i wankain long ai bilong bel. Dispela tok ai i mas lukluk long wanpela samting, i makim olsem yumi putim tingting i go long wanpela wok samting yumi laik inapim. Yumi no tingim ol samting bilong skin olsem nambawan bikpela samting na yumi no tingting tasol long lukautim famili long sait bilong skin, nogat, oltaim ai bilong yumi i lukluk i go long ol samting bilong spirit. (Mat. 6:33) Dispela i makim olsem ol samting bilong skin yumi holim pinis, yumi ting em inap, na wok bilong God i namba wan samting long laip bilong yumi.​—Hib. 13:5.

5. Olsem wanem wanpela gel i bin soim olsem em i putim “ai” pinis long mekim wok bilong God?

⁵ Ol gutpela sampela tru inap kamap taim ol pikinini i lain long lukluk long wanpela samting tasol! Tingim stori bilong wanpela gel long Itiopia. Em i mekim gut tru ol skul wok bilong em na taim em i pinisim skul, em i kisim wanpela skolasip bilong kisim sampela skul moa. Tasol ai bilong em i lukluk long wok bilong Jehova, na em i tok nogat long skolasip. Bihain liklik, em inap kisim wanpela wok mani we pe bilong en i olsem 11,000 kina long mun​—em bikpela pe tru taim yumi skelim wantaim averes pe bilong ol man long dispela kantri. Tasol dispela gel i putim “ai” pinis long wok painia. Em i no askim papamama long em bai kisim dispela wok o nogat. Papamama i ting wanem taim ol i harim olsem pikinini i tok nogat long dispela wok? Ol i amamas wantaim em na ol i givim biknem long em!

6, 7. ‘Ai bilong yumi mas op’ na bai yumi inap abrusim wanem pasin?

⁶ Tok bilong Jisas long Matyu 6:​22, 23 i kirapim yumi long lukaut long gridi pasin. Jisas i tok yumi mas lukluk long “wanpela samting tasol,” na tu, em i stori long “ai i nogut.” “Ai i nogut” i makim pasin mangal, olsem gridi pasin. (Mat. 6:23) Jehova i gat wanem tingting long dispela pasin? Baibel i tok: “Yupela i no ken larim toktok bilong pasin pamuk na olgeta kain pasin i no klin na gridi pasin i kamap namel long yupela.”​—Efe. 5:3.

⁷ Ating em i isi long lukim gridi pasin bilong narapela, tasol i hatwok long luksave olsem yumi yet i gat dispela pasin. Olsem na em savetingting long bihainim tok bilong Jisas: “Ai bilong yupela i mas op na yupela i mas sakim olgeta kain pasin mangal.” (Luk 12:15) Bilong mekim olsem, yumi mas skelim yumi yet na bai yumi inap save long samting yumi gat strongpela laik long en. Ol famili Kristen i mas tingting gut long taim na mani ol i lusim bilong kisim amamas, malolo, na kisim ol samting bilong skin.

8. Taim yumi laik baim wanpela samting, olsem wanem ‘ai bilong yumi mas op’?

⁸ Paslain long yu baim wanpela samting, yu no ken tingting tasol long yu gat inap mani long baim o nogat, yu mas tingim ol narapela samting tu. Olsem: ‘Bai mi gat taim long yusim dispela samting planti taim na stretim na lukautim? Mi mas tromoi bikpela hap taim bilong lain long mekim wok i stret long en?’ Yupela ol yangpela, no ken bilipim nating ol edvetaismen na larim dispela i kirapim yupela long strong long papamama i mas baim ol klos o ol narapela samting i gat bikpela pe. Yupela i mas bosim gut bel. Na tu, tingim samting yu laik baim, dispela bai helpim famili long stap redi long taim Pikinini bilong man i kam, o i no helpim famili. Bilip long promis bilong Jehova: “Mi no inap tru long lusim yu o givim baksait long yu long wanpela samting.”​—Hib. 13:5.

 Wok Strong Long Winim Ol Mak Bilong Spirit

9. Pasin bilong putim ol mak bilong spirit inap helpim famili olsem wanem?

⁹ Narapela rot we ol wan wan long famili i ken strongim bilip bilong ol na helpim famili olgeta long stap strong long sait bilong lotu, em ol i ken putim ol mak bilong spirit na wok strong long winim ol. Pasin bilong mekim olsem inap helpim famili long luksave long ol i kamap strong moa long mekim ol samting Jehova i laikim o nogat. Na tu, em inap helpim ol long save long wanem samting i mas i stap nambawan bikpela samting long ol.​—Ritim Filipai 1:10.

10, 11. Famili bilong yupela i wok long winim wanem ol mak bilong spirit? Wanem sampela mak yupela i laik winim long bihain?

¹⁰ Pasin bilong putim ol mak em olgeta long famili inap winim, dispela inap kamapim planti gutpela samting. Olsem: Putim mak long skelim teks bilong de long olgeta de. Ol komen bilong ol wan wan long famili inap helpim het bilong famili long save long ol i gat wanem tingting long Jehova na tok i tru. Taim famili i putim mak long ritim Baibel wantaim, dispela em i gutpela rot tru long ol pikinini i ken lain long rit gut moa na kliagut moa long tok bilong Baibel. (Sng. 1:​1, 2) Na yumi laik putim mak long ol beten bilong yumi i mas kamap gutpela moa. Pasin bilong kamapim moa yet ol pasin bilong holi spirit, dispela tu em wanpela gutpela mak bilong winim. (Gal. 5:​22, 23) Na tu, em i gutpela long wok strong moa long soim ol man yumi bungim long wok autim tok, olsem yumi pilim hevi bilong ol. Pasin bilong famili long mekim olsem inap helpim ol pikinini long kisim pasin sori, na ating ol bai i gat laik long mekim wok painia oltaim o wok misineri.

 ¹¹ I gutpela long skelim sampela mak em yu yet na famili bilong yu i ken winim. Olsem wanem? Famili bilong yu inap putim mak long autim tok inap sampela aua moa? Yupela inap wok long daunim pasin bilong pret long autim tok long rot bilong telefon, long rot, o long bisnis teritori? Yupela inap i go sindaun long wanpela hap we ol i sot long ol pablisa bilong Kingdom? Wanpela long famili inap lainim nupela tokples bambai em i ken autim gutnius long ol man bilong ol narapela kantri?

12. Ol het bilong famili inap mekim wanem bilong helpim famili long kamap strong moa long sait bilong lotu?

¹² Yupela ol het bilong famili i ken skelim ol samting we famili i gat wok long kamap strong moa long en. Bihain yupela i ken putim ol mak we inap helpim famili long mekim olsem. Ol mak yupela famili i putim bilong winim i mas stret long sindaun na strong bilong famili. (Snd. 13:12) Tru, bilong winim ol gutpela mak, yupela i mas lusim sampela hap taim. Olsem na sampela hap taim yupela i yusim bilong lukim televisen, yupela inap yusim bilong mekim ol samting i strongim yupela long sait bilong lotu. (Efe. 5:​15, 16) Wok strong long winim ol mak em yupela i laik bai famili bilong yupela i winim. (Gal. 6:9) Famili i wok long winim ol mak bilong spirit, pasin bilong ol long kamap strong moa bai stap ples klia.​—1 Tim. 4:15.

Mekim Famili Lotu Long Olgeta Wik

13. Wanem senis i bin kamap long sediul bilong ol miting? Yumi mas skelim wanem ol askim?

¹³ Wanpela gutpela samting tru bilong helpim ol famili long “redi i stap” taim Pikinini bilong man i kam, em bikpela senis i bin kamap long sediul bilong ol miting bilong yumi long Janueri 1, 2009. Yumi kirap mekim Kongrigesen Buk Stadi wantaim Skul Tiokratik Bilong Autim Tok na Miting Bilong Wok, olsem na i no gat wok moa long mekim Buk Stadi long narapela de. Dispela senis i helpim ol famili Kristen long strongim bilip bilong ol yet long rot bilong makim wanpela nait long olgeta wik bilong mekim Famili Lotu. Inap sampela haptaim pinis yumi bin bihainim dispela nupela pasin, olsem na yumi ken askim yumi yet: ‘Mi save yusim dispela ekstra taim bilong mekim Famili Lotu o stadi bilong mi yet? Dispela pasin bilong mekim Famili Lotu i mekim gut wok bilong en?’

14. (a) Wanem nambawan wok bilong mekim Famili Lotu o stadi bilong yumi yet? (b) Bilong wanem pasin bilong makim wanpela nait bilong mekim stadi i bikpela samting tru?

¹⁴ Nambawan wok bilong mekim Famili Lotu long olgeta wik o stadi bilong yumi yet, em bilong helpim yumi long i go klostu moa long God. (Jems 4:8) Taim yumi lusim hap taim bilong stadi long Baibel long olgeta wik na kisim save moa long Man Bilong Wokim yumi, bai yumi pas gut moa wantaim em. Taim yumi go klostu moa long Jehova, bai yumi laikim em moa yet ‘long bel, na long laip, na long tingting, na long strong olgeta bilong yumi.’ (Mak 12:30) Tru tumas, yumi gat laik tru long bihainim tok bilong God na bihainim pasin bilong em. (Efe. 5:1) Olsem na pasin bilong mekim Famili Lotu long olgeta wik, i bikpela samting tru bilong helpim famili olgeta long “redi i stap” long dispela taim nau we yumi wetim taim bilong “traipela hevi tru.” (Mat. 24:21) Famili Lotu i bikpela samting tru bilong helpim yumi long abrusim bagarap.

15. Famili Lotu inap mekim wanem long tingting ol wan wan long famili i gat long narapela narapela?

¹⁵ Famili Lotu i gat narapela wok tu​—em bilong helpim olgeta long famili long pas gut moa wantaim. Pasin bilong lusim hap taim long olgeta wik long toktok long ol samting bilong spirit, i mekim bikpela samting long tingting ol wan wan long famili i gat long narapela narapela. Taim ol marit i amamas long lainim ol tok bilong Baibel wantaim, dispela bai mekim ol i pas gut moa! (Ritim Saveman 4:12.) Ol papamama na ol pikinini husat i save lotu wantaim, pasin laikim bai mekim ol i pas gut wantaim, em “nambawan gutpela rot bilong mekim ol man i kamap wanbel.”​—Kol. 3:14.

16. Stori long olsem wanem 3-pela sista i kisim helpim taim ol i makim wanpela nait bilong stadi long Baibel.

 ¹⁶ Tingim olsem wanem 3-pela sista bilong kongrigesen i bin kisim helpim taim ol i makim wanpela nait bilong mekim stadi long Baibel. Ol i no wanblut, tasol dispela 3-pela wido meri i sindaun long seim taun na inap planti yia ol i bin stap gutpela pren. Ol i gat laik long bung moa wantaim, na ol i laik yusim dispela taim bilong strongim bilip bilong ol, na i no bilong stori nating tasol, olsem na ol i stretim tok long makim wanpela nait bilong bung na stadi long Baibel wantaim. Ol i kirap mekim olsem na yusim buk “Bearing Thorough Witness” About God’s Kingdom. Wanpela bilong ol i tok: “Mipela i amamas tru long stadi wantaim, olsem na planti taim stadi bilong mipela i winim wanpela aua. Mipela i traim long piksaim long tingting ol samting i bin painim ol brata bilong yumi long taim bilong ol aposel, na mipela i stori long ol samting mipela bai mekim sapos wankain samting i painim mipela. Taim mipela i autim tok, mipela i traim long bihainim ol tok mipela i lainim. Dispela i mekim na wok bilong autim tok bilong Kingdom na kamapim ol disaipel i givim amamas long mipela na i karim gutpela kaikai, winim bilong bipo.” Pasin bilong stadi olsem i strongim ol long sait bilong bilip, na tu, i mekim ol i pas gut moa wantaim. Ol i tok: “Mipela i amamas tru long stadi wantaim.”

17. Wanem ol samting inap helpim Famili Lotu long kamap gutpela?

¹⁷ Olsem wanem long yu? Yu kisim helpim long pasin bilong makim wanpela nait bilong mekim famili lotu o stadi bilong yu yet? Sapos yu stadi wan wan taim tasol, dispela bai i no helpim yu tumas. Olgeta wan wan long famili i mas redi i stap long taim bilong mekim stadi. Yupela i no ken larim ol liklik samting i pasim yupela long mekim stadi long taim yupela i makim. Na tu, samting yupela i makim bilong stadi long en i mas i stret long samting i wok long painim famili. Yu ken mekim wanem na bai famili i kisim amamas long taim bilong stadi? Yu ken mekim gutpela wok tisa, na mekim ol samting na bai pasin rispek na bel isi i stap long taim bilong stadi.​—Jems 3:18. a

“Was i Stap” na “Redi i Stap”

18, 19. Yumi save klostu nau Pikinini bilong man bai kam, dispela save i mas mekim wanem long yu na famili bilong yu?

¹⁸ Ol samting long graun i wok long i go nogut moa, olsem na em i klia tru olsem kirap long 1914 na i kam, yumi stap long taim bilong las de bilong dispela graun bilong Satan. Armagedon i kam klostu pinis. I no longtaim na Pikinini bilong man bai kamapim strafe bilong Jehova na bagarapim ol man nogut. (Sng. 37:10; Snd. 2:​21, 22) Dispela save i mas mekim sampela samting long yu na famili bilong yu.

¹⁹ Yu bihainim tok bilong Jisas long lukluk long “wanpela samting tasol”? Ating ol manmeri bilong graun i wok strong long kamap maniman, kisim biknem, o namba. Tasol olsem wanem long famili bilong yu? Yupela i wok long winim ol mak bilong spirit? Pasin bilong mekim Famili Lotu o stadi bilong yu yet long olgeta wik i kamap gutpela? Pasin bilong mekim kain stadi olsem i karim gutpela kaikai? Olsem stadi i kamap paslain long dispela i stori long en, yupela maritman, maritmeri, na pikinini, yupela i mekim wok bilong yupela olsem Baibel i makim, na helpim famili olgeta long “was i stap”? (1 Tes. 5:6) Sapos olsem, bai yupela i “redi i stap” taim Pikinini bilong man i kam.

[Futnot]

Yu Lainim Wanem Samting?

• Stori long olsem wanem ol famili Kristen i ken “redi i stap” long rot bilong . . .

lukluk long “wanpela samting tasol.”

putim na winim ol mak bilong spirit.

mekim Famili Lotu long olgeta wik.

[Askim Bilong Stadi]

[Piksa long pes 13]

Pasin bilong lukluk long “wanpela samting tasol” bai helpim yumi long sakim ol samting bilong graun