Ol pikinini i nidim ol man i bikpela pinis long stiaim na givim edvais long ol. Olsem papa o mama, em wok bilong yu long stiaim pikinini na givim em edvais. Maski i olsem, ol narapela man i bikpela pinis inap helpim tu pikinini bilong yu.

Long planti hap, ol yangpela i lusim sotpela taim tasol long stap wantaim ol man i bikpela pinis. Tingim:

• Ol pikinini i save lusim bikpela haptaim long skul, em hap we i gat planti sumatin winim ol tisa na ol narapela man i bikpela pinis.

• Bihain long skul, sampela pikinini i go bek long haus ol i save stap ol yet bikos papamama i mas wok.

• Wanpela wok painimaut i soim olsem long Amerika, ol pikinini em krismas bilong ol i namel long 8 na 12 i save lusim klostu 6-pela aua long lukim TV, harim musik, na pilai ol vidio gem long olgeta de.  *

Buk Hold On to Your Kids i tok: “Ol yangpela i no kisim ol skultok, lukim eksampel, na ol tok bilong stiaim ol long ol mama, papa, tisa, na ol arapela man i bikpela pinis . . . ol i kisim long ol wanlain bilong ol.”

Lusim haptaim long stap wantaim pikinini.

STIATOK BILONG BAIBEL: “Trenim gut pikinini long rot em i mas bihainim; na maski taim em i kamap lapun em bai no inap lusim dispela trening.”—Provep 22:6, futnot.

Ol pikinini i laik bai papamama i mas stiaim ol. Ol saveman i tok, taim ol pikinini i kamap tineja, ol i save tingim tru edvais bilong papamama winim bilong ol wanlain. Long buk You and Your Adolescent, Saveman Laurence Steinberg i tok: “Ol papamama i stiaim planti toktok na pasin bilong pikinini bilong ol long taim em i yangpela i go inap long taim em i kamap bikpela.” Na tu, em i tok: “Ol yangpela i laik save long tingting bilong yu na harim tok yu mekim, maski sampela taim ol i no kamapim dispela o wanbel long olgeta tok yu mekim.”

Long taim pikinini bilong yu i laik bai yu stiaim em, mekim olgeta samting yu inap mekim bilong stiaim  em. Lusim haptaim long stap wantaim ol pikinini na kamapim tingting bilong yu, ol samting yu ting i bikpela samting, na ol ekspiriens bilong yu.

Askim ol narapela long helpim.

STIATOK BILONG BAIBEL: “Man i wokabaut wantaim ol man i gat savetingting, em bai gat savetingting.”—Provep 13:20.

Yu inap tingim wanpela husat inap stap gutpela eksampel long pikinini bilong yu? Olsem wanem? Yu ken stretim rot na bai em i ken lusim sampela haptaim long stap wantaim pikinini bilong yu? Dispela i no makim olsem yu givim wok bilong yu olsem papa o mama i go long narapela. Tasol gutpela tok i kam long wanpela yu save bai i no inap bagarapim pikinini bilong yu inap helpim trening yu givim long pikinini. Baibel i tok, Timoti—maski em i kamap bikpela pinis—i kisim bikpela helpim taim em i bung wantaim aposel Pol, na Pol i kisim helpim taim em i stap pren bilong Timoti.—Filipai 2:20, 22.

Insait long wan handret yia i go pinis, planti famili i bruk, olsem ol bubu, ankol, anti, na ol narapela wanblut i save stap long ol narapela hap bilong graun. Sapos dispela i kamap long famili bilong yu, painim rot long helpim pikinini bilong yu long kisim skul long ol man i bikpela pinis em ol i gat ol pasin yu laik bai pikinini i mas gat.