Man i gat pasin bilong sanap strong i no save surik long ol hevi i painim em na larim bel hevi i daunim em. Em i kisim dispela pasin long rot bilong ol samting i painim em. Taim pikinini i lain long wokabaut em i save pundaun sampela taim, olsem tasol man i mas bungim ol hevi na bai em i lain long karim ol hevi.

Sampela pikinini i save bel hevi taim ol i no mekim gut wanpela samting, bungim hevi, o narapela i painim popaia bilong ol. Ol narapela i save givap olgeta. Maski i olsem, ol i mas save long ol dispela tok i tru:

• Ol i no inap mekim gut olgeta samting.—Jems 3:2.

• Taim nogut i save painim olgeta man.—Eklisiastis 9:11.

• Ol bai kamap gutpela moa sapos ol narapela i stretim ol.—Provep 9:9.

Pasin bilong sanap strong bai helpim pikinini long strongim bel na karim ol hevi.

Taim pikinini i popaia.

STIATOK BILONG BAIBEL: “Stretpela man inap pundaun 7-pela taim, na em bai kirap gen.”—Provep 24:16.

Helpim pikinini bilong yu long kliagut long ol hevi i kamap. Olsem, em bai mekim wanem sapos em i no mekim gut tes long skul? Em inap givap, na tok, “Mi no inap mekim wanpela samting stret!”

Bilong skulim pikinini long pasin bilong sanap strong, soim em long samting em inap mekim long kamap gut long neks taim. Long dispela rot, em bai lain long karim hevi na i no larim hevi i daunim em.

Long wankain taim, larim pikinini yet i stretim hevi bilong em. Tasol yu ken helpim em long painim rot long mekim olsem. Yu ken askim em, “Yu ken mekim wanem bilong kliagut long sabjek yupela i lainim long skul?”

Taim ol bikpela hevi i kamap.

STIATOK BILONG BAIBEL: “Yupela i no save wanem samting bai kamap long yupela tumora.”—Jem 4:14.

No gat man inap save long samting bai kamap bihain. Wanpela maniman long nau inap kamap rabisman  bihain; man i helti long nau inap sik long bihain. Baibel i tok: “I no olsem oltaim ol man i save spit tru i save winim resis, o ol strongpela man i save winim pait, . . . long wanem, taim nogut na ol samting we man i no ting inap kamap, i save painim olgeta bilong ol.”—Eklisiastis 9:11.

Olsem wanpela papa o mama, yu save mekim olgeta samting yu inap bilong lukautim pikinini bilong yu long ol hevi. Tasol tru tru, yu no inap lukautim pikinini long olgeta hevi we inap painim em.

Tru tumas, pikinini i no bikpela inap long em i kliagut long hau man i pilim taim ol i pinisim em long wok o taim em i bungim hevi bilong mani. Tasol, yu inap helpim em long karim ol narapela hevi—olsem, pasin pren i bruk o wanpela long famili i dai. *

Taim pikinini i kisim tok bilong stretim em.

STIATOK BILONG BAIBEL: “Putim yau long gutpela tok kaunsel . . . na long dispela rot, yu bai kamap man i gat savetingting long bihain.”—Provep 19:20.

Tok bilong stretim em i no makim olsem ol i buli long em; tok i kamapim klia olsem em i mas senisim pasin o samting em i mekim.

Taim yu skulim pikinini long kisim tok bilong stretim em, yutupela wantaim bai kisim helpim. Wanpela papa nem bilong em Jon i tok: “Sapos oltaim pikinini i kisim helpim long ol rong em i mekim, em i no inap lainim wanpela samting. Ol bai kamapim wanpela hevi na i no longtaim narapela hevi, na long laip olgeta bilong yu bai yu wok long stretim ol hevi bilong ol. Dispela i givim bel hevi long papamama na pikinini.”

Hau bai yu helpim pikinini bilong yu long kisim helpim long tok bilong stretim em? Taim pikinini bilong yu i kisim tok bilong stretim em—maski long skul o narapela hap—sakim pasin bilong tok dispela i no fea. Tasol, yu ken askim:

• “Yu ting wai na yu kisim dispela tok bilong stretim yu?”

• “Hau bai yu kamap gutpela moa?”

• “Bai yu mekim wanem sapos dispela hevi i painim yu neks taim?”

Tingim, tok bilong stretim pikinini bai helpim em long nau na long taim em i kamap bikpela.