Ol man bilong wok hat i no save les long wok. Ol i amamas long wok hat bilong kisim ol samting ol i nidim na helpim ol narapela—maski wok ol i mekim i no risen na ol narapela i laikim ol.

I gat planti wok yumi mas mekim, maski yumi no laikim. Long dispela graun we planti i les long givim bel long wok, pasin bilong wok hat inap helpim yu.—Saveman 3:13.

“Mi lainim olsem taim yu givim bel long wok, bai yu amamas na stap bel isi. Dispela bel isi i mekim na mi laikim pasin bilong wok. Taim yu gat pasin bilong wok, yu bai kisim gutnem tu.”—Reyon.

STIATOK BILONG BAIBEL: “Sapos yu wok hat, orait bai yu kisim gutpela pe.”—Sindaun 14:23.

Holim stretpela tingting long wok taim yu mekim ol dispela samting.

Amamas long mekim gut wok. Taim yu wok long haus, pinisim homwok, o wok mani, yu mas givim bel tru long mekim. Sapos yu mekim gut wanpela wok, painim rot long mekim i kamap gutpela moa. Taim yu kamap gutpela moa long wanpela wok, yu bai amamas long wok bilong yu.

STIATOK BILONG BAIBEL: “Sapos man i mekim gutpela wok, orait em bai i kamap wokman bilong king. Dispela kain man i no inap kamap wokman bilong man i no gat nem.”—Sindaun 22:29.

Gutpela samting i kamap. Taim yu mekim gut ol wok bilong yu, dispela i helpim ol narapela. Olsem, taim yu wok hat long mekim ol wok bilong haus, dispela bai helpim wok bilong ol narapela long famili.

STIATOK BILONG BAIBEL: “Amamas bilong givim samting i winim amamas bilong kisim samting.”—Aposel 20:35.

Mekim sampela wok moa. No ken mekim liklik wok tasol, traim long mekim sampela moa wok. Taim yu mekim olsem, yu inap kontrolim laip bilong yu—yu mekim planti wok moa bikos yu laik mekim na i no olsem ol narapela i fosim yu.—Matyu 5:41.

STIATOK BILONG BAIBEL: “Mi laik bai yu mekim gutpela pasin long laik bilong yu yet, na i no olsem mi subim yu long mekim.”—Filemon 14.

Balensim gut wok. Man bilong wok hat i no save les, na em i wok inap longpela aua. Ol i balensim gut ol samting, ol i makim taim bilong malolo na ol i kisim amamas taim ol i wok hat.

STIATOK BILONG BAIBEL: “Mobeta yumi gat liklik samting tasol na yumi bel isi. Nogut yumi mekim planti wok oltaim, olsem man i ran i go bilong holimpas win.”—Saveman 4:6.