STORI BILONG DAMI

Pastaim mi ting Papa i kisim liklik het pen, tasol pen i go bikpela, olsem na Mama i ringim ambiulens. Mi inap tingim yet dispela taim ol i bin kisim Papa i go. Mi no bin ting olsem em laspela taim bilong mi long lukim em. Tripela de bihain, em i dai long sik aneurysm, wanpela rop bilong blut long kru i bruk. Long dispela taim mi gat 6-pela krismas.

Inap planti yia, mi pilim olsem em asua bilong mi na Papa i dai. Mi save tingting i go bek long taim ol lain bilong ambiulens i karim em i go, na mi askim mi yet olsem: ‘Wai na mi sanap na lukluk tasol?’ Mi lukim ol lain i gat bikpela krismas i karim hevi bilong helt, na mi save askim olsem, ‘Wai na ol i stap laip, tasol papa bilong mi i dai?’ Bihain, Mama i toktok wantaim mi long ol samting mi tingting planti long en. Na olsem ol Witnes Bilong Jehova, mipela i kisim gutpela helpim long kongrigesen.

Sampela man i ting olsem, bihain long wanpela i dai yu inap krai sori na nau bai yu kisim bel isi. Tasol mi no bin mekim olsem i go inap long taim mi kamap tineja.

Mi laik tokim ol yangpela em papamama bilong ol i dai olsem: “Kamapim ol hevi bilong yu long wanpela. Taim yu mekim olsem, dispela bai helpim helt bilong yu.”

Yes, mi bel hevi olsem taim mi go bikpela Papa i no stap bilong lukim ol gutpela samting i painim mi. Tasol tok bilong Baibel long Revelesen 21:4 i givim bel isi long mi, God i tok: “Em bai mekim drai aiwara i stap long ai bilong ol, na bai i no gat dai moa, na ol bai i no bel hevi na krai moa, na ol bai i no inap pilim pen gen.”

STORI BILONG DERRICK

Papa i laikim tru ol ples maunten, olsem na mitupela i save hukim pis na go kem long ol ples maunten. Em sampela gutpela memori mi gat long em.

Papa i kisim sik bilong klok inap sampela haptaim, na em i go stap long haus sik, mi inap tingim olsem taim mi liklik mangi mi go visitim em wanpela o tupela taim. Tasol mi no bin ting olsem em i kisim bikpela sik. Papa bilong mi i dai long taim mi gat 9-pela krismas.

Bihain long em i dai, mi krai planti na mi pilim olsem mi no inap pulim win, na mi no laik toktok long ol narapela. Mi pilim olsem em bikpela hevi tru long laip bilong mi, na mi no laik mekim wanpela samting. Long lotu mi go long en, mi insait long wanpela grup bilong ol yangpela na ol i save tingim mi, tasol isi isi ol i no tingim mi moa. Ol manmeri bilong dispela lotu i save tok: “Em taim bilong papa bilong yu long dai” o “God i singautim em” o “Nau em i stap long heven.” Ol dispela bekim i no helpim mi liklik,  na tu, mi no gat stretpela save long tok Baibel i mekim long ol dispela samting.

I no longtaim na mama bilong mi i kirap stadi long Baibel wantaim ol Witnes Bilong Jehova, bihain mi na brata bilong mi tu i stadi. Mipela i kisim stretpela save long samting i painim ol man i dai pinis na gutpela tok promis bilong God long kirapim bek ol daiman. (Jon 5:28, 29) Tasol wanpela skripsa i bin helpim mi tru em Aisaia 41:10, God i tok: “Yupela i no ken pret, long wanem, mi God bilong yupela na mi stap wantaim yupela. Bai mi mekim yupela i kamap strong na bai mi helpim yupela.” Mi kisim save olsem Jehova i stap wantaim mi, na mi stap bel isi na mi inap long karim hevi bilong krai sori.

STORI BILONG JEANNIE

Taim mi gat 7-pela krismas, mama bilong mi i dai long sik kensa. Ol samting i kamap long dispela de i kain olsem mi driman. Mi inap tingim olsem Mama i dai long haus, na bubu man na bubu meri bilong mi i bin stap long dispela taim. Olgeta man long haus i stap isi tru. Na long nait paslain long mipela i slip mipela i kukim ol kiau na kaikai. Mi pilim olsem isi isi i stap bilong mipela i senis.

Kirap long dispela taim, mi tingim olsem mi mas strongim bel na lukautim liklik susa bilong mi. Olsem na mi haitim bel hevi bilong mi. I kam inap long nau, mi no save tokim ol narapela long hevi bilong mi, na dispela inap bagarapim helt bilong mi.

Mi tingim yet pasin laikim na pasin helpim bilong wanpela kongrigesen bilong ol Witnes Bilong Jehova long hap mipela i stap long en. Maski nau tasol mipela i kirap long i go bung wantaim ol long ol miting long Haus Kingdom, ol wanbilip i sambai na helpim mipela olsem famili stret bilong ol. Long yia olgeta Papa i no kukim kaikai, bikos ol i save bringim kaikai na putim long dua.

Wanpela skripsa i save helpim mi tru em Song 25:16, 17. Man bilong raitim song i tok: “God, kam long mi gen na marimari long mi, long wanem, mi stap wanpis na strong bilong mi i pinis. Pinisim olgeta bel hevi bilong mi, na bel bilong mi i ken i stap isi. Helpim mi, na ol hevi bai i no inap daunim mi.” Mi kisim bel isi long save olsem God i redi long helpim mi long taim bilong hevi. Tok bilong Baibel i bin helpim mi long karim ol hevi na tingim ol gutpela samting bai kamap, olsem tok promis bilong Baibel long ol daiman bai kirap bek. Mi amamas long bungim mama bilong mi gen taim em i kirap bek na i gat gutpela helt long paradais long graun.—2 Pita 3:13.

Olsem wanem? Yu laik kisim sampela save moa long ol tok promis bilong Baibel long ol man i krai sori? Yu inap daunlodim fri kopi bilong buklet “Taim Wanpela Long Famili i Dai.” Go long jw.org/tpi na lukim het tok PABLIKESEN > BUK NA BUKLET.