Long wanpela skul trip, ol i sutim tok long sampela tineja mangi i tatsim narapela skul mangi long pasin i no stret. Olgeta dispela mangi i go long wanpela praivet skul long Kanada. Bihain long dispela hevi, Leonard Stern i raitim tok long niuspepa Ottawa Citizen: “Bikpela save na ediukesen na sindaun bilong ol dispela yangpela i no banisim ol long mekim ol disisen nogut.”

Stern i tok moa: “Yu inap ting bikpela samting long wok papamama em long skulim ol pikinini long wanem pasin i stret na i no stret. Tasol tru tru, planti papamama i tingim ediukesen na mani kago i bikpela samting.”

Tru skul i bikpela samting, tasol gutpela ediukesen tu i no inap helpim man long sakim ol tingting na laik nogut. Olsem na yumi bai go we bilong kisim ediukesen long ol stretpela stiatok bilong sakim ol tingting na laik nogut?

Baibel i olsem wanpela mira. Taim yumi lukluk long en, yumi lukim klia olsem yumi gat pasin kranki na yumi sot long sampela samting. (Jems 1:23-25) Tasol Baibel i mekim planti samting moa. Em i helpim yumi long mekim sampela senis, kisim ol pasin i kamapim bel isi na pasin wanbel tru. Ol dispela pasin i makim tu gutpela pasin, pasin helpim, i no les kwik, bosim bel, na pasin laikim. Baibel i kolim pasin laikim olsem “nambawan gutpela rot bilong mekim ol man i kamap wanbel.” (Kolosi 3:14) Wai na pasin laikim i spesel? Lukim tok Baibel i mekim.

• “Man i gat pasin laikim em i no save les kwik, na em i save mekim gutpela pasin. Em i no save jeles, em i no save hambak, em i no gat pasin antap, em i no save bikhet nabaut, em i no save tingim em yet, na em i no save belhat kwik. Em i no save tingim rong ol arapela i mekim long em. Em i no save amamas long ol pasin i no stret [pasin nogut], nogat, em i save amamas long ol pasin i tru. Em i no save larim wanpela samting i daunim em, . . . na em i save sanap strong long olgeta hevi i kamap long em. Pasin laikim i no inap pinis.”—1 Korin 13:4-8.

• “Man i gat pasin laikim em i no save mekim pasin nogut long narapela.”—Rom 13:10.

• “Moa yet, yupela i mas laikim tru ol arapela, long wanem, pasin laikim i karamapim planti sin.”—1 Pita 4:8.

Taim yu stap wantaim ol man i laikim yu, yu pilim olsem wanem? Seif? Bel na tingting i stap isi? Yes, yu save olsem ol i laik bai gutpela samting i painim yu, na ol i no inap mekim samting bilong bagarapim yu.

Na tu, pasin laikim inap kirapim ol man long daunim sampela laik bilong ol yet, senisim tu i  stap bilong ol, bilong helpim ol narapela. Olsem, taim wanpela man em bai yumi kolim George i kamap bubu, em i laik tru long stap wantaim tumbuna pikinini bilong em. Tasol i gat wanpela hevi. George em man bilong smok, na tambu pikinini bilong em i no laik bai em i smok klostu long bebi. George i mekim wanem? Maski em i bin smok inap 50 yia, em i lusim smok bikos em i tingim tumbuna pikinini bilong em. Yes, pasin laikim i gat strong!

Pasin laikim em pasin yumi lainim. Ol papamama i gat bikpela wok long skulim ol pikinini long mekim pasin laikim. Ol i givim kaikai na lukautim ol pikinini na helpim ol taim ol i sik o kisim bagarap. Ol gutpela papamama i save toktok wantaim ol pikinini na skulim ol. Ol i stretim ol pikinini, na skulim ol tu long ol gutpela stiatok long wanem pasin i stret na wanem pasin i no stret. Na ol gutpela papamama i stap gutpela eksampel na bai ol pikinini bilong ol i ken bihainim.

Tasol sori tru, sampela papamama i no mekim gut wok bilong ol. Ating dispela i makim olsem ol pikinini bilong ol bai i no inap kamap ol gutpela manmeri? Nogat tru! Planti man i bikpela pinis, na tu, ol man husat i go bikpela long ol famili we papamama i no skulim gut ol, ol i bin mekim ol bikpela senis long laip bilong ol, na ol i kamap ol man bilong tingim gut narapela na ol narapela inap trastim ol. Long neks atikol, bai yumi lukim stori bilong ol man em ol narapela i ting ol i no inap tru long senisim pasin bilong ol!