Mabel long Argentina i mekim wok olsem dokta bilong helpim ol man em sik i mekim na ol i no inap toktok gut o bodi bilong ol i paralais samting. Long 2007, em i stat long pilim olsem em i nogat strong moa long bodi na het bilong em i save pen long olgeta de. Mabel i tok: “Mi lukim planti dokta na mi kisim kain kain marasin, tasol ol dispela samting i no bin helpim mi.” Em i go long haus sik na kisim sken, na ol dokta i painimaut olsem em i gat tiuma long kru. Em i tok: “Mi kirap nogut taim mi harim olsem dispela sik i stap long kru bilong mi inap longpela taim.

“Paslain long mi kisim operesen, mi no ting olsem em wanpela bikpela sik. Bihain long operesen, mi slip long ICU. Mi no inap long muv, mi slip tasol na lukluk long siling bilong rum. Paslain long mi kisim operesen mi yet i save mekim ol wok na i no olsem wanpela i mas helpim mi. Tasol nau mi no inap long mekim wanpela samting. Long haus sik mi no inap long wokim gut tingting, mi save harim nois bilong ol masin samting, ol alam i krai, na mi harim krai bilong ol sikman. Mi pilim tru pen na hevi bilong ol sikman.

“Nau mi kamap orait liklik. Mi inap wokabaut lusim haus na raun liklik. Tasol mi no inap lukim gut ol samting na mi nogat strong long mekim ol wok.”

Holim stretpela tingting. Long Sindaun 17:22, Baibel i tok: “Pasin bilong belgut i olsem marasin bilong mekim man i stap gut. Tasol sapos tingting bilong man i bagarap, dispela i olsem sik nogut i wok long bagarapim ol bun bilong en.” Mabel i tok: “Nau mi pilim wankain hevi em ol sikman i save pilim. Mi pilim bikpela pen taim mi eksasais, na sampela taim mi laik givap. Olsem na mi mas fosim mi yet long strongim bel na tingim olsem gutpela samting inap kamap sapos mi no givap.”

Tingim ol gutpela samting bai kamap bihain. Mabel i tok: “Taim mi ritim Baibel, mi kisim save long as na ol pen na hevi i kamap. Na tu, mi kisim save olsem klostu nau olgeta pen na hevi bai pinis.” a

Yu mas save olsem God i save tingim yumi wan wan. (1 Pita 5:7) Mabel i stori long olsem wanem dispela save i helpim em. Em i tok: “Taim mi laik kisim operesen, mi pilim tru tok bilong Aisaia 41:10, God i tok: ‘No ken pret, mi stap wantaim yu.’ Mi save olsem God Jehova i pilim tru hevi bilong mi na dispela i mekim gut bel bilong mi.”

Yu save long dispela? Baibel i tok klostu nau wanpela taim bai kamap we ol man bai i no karim moa ol hevi bilong sik.—Aisaia 33:24; 35:5, 6.