Lain Wol Helt Oganaisesen i tok, “man inap kisim sik kensa bilong waitlewa,” na tu, sik kensa long rop bilong pispis sapos em i pulim smok bilong disel i kam ausait long ensin bilong kar samting.

Ol paura bilong plaua na ol liklik mosong samting em ren i wasim i go insait long as bilong solwara na i pas long ol ston em ol saveman i painim, i soim olsem inap planti yia i go pinis ol diwai pam na ol diwai i save gro long ples hot i bin gro long Antaktika. Olsem “50 milion yia i go pinis,” taim bilong winta long Antaktika i no kol tumas olsem long nau na “ais i no pas strong long ol samting” na hat bilong san i wankain liklik long ol ples i stap long ekweta.

Wanpela ripot bilong lain Ireland Association of Catholic Priests bilong yia 2012 i tok 87 pesen bilong ol Katolik long dispela kantri i ting olsem ol pris i mas marit na 77 pesen i ting olsem Misin i mas larim ol meri i kamap pris.

Ol i skelim ol marasin bilong malaria na ol i painimaut olsem long sampela hap i gat ol marasin em i no gutpela o ol giaman marasin na ol dispela marasin i no inap pinisim sik bilong man. Long Saut-Is Esia, 36 pesen bilong ol marasin em ol i bin testim, ol i painimaut olsem em ol giaman marasin, wankain tu long 20 pesen bilong ol marasin em ol i skelim long hap saut bilong Sahara long Afrika.

Long namel bilong mun Epril 2012, ol wokman bilong gavman i tokaut olsem long El Salvado, dispela em i namba 1 de insait long 3-pela yia we i no gat ripot long wanpela man i kilim i dai narapela man. Long 2011, long olgeta 100,000 manmeri 69 bilong ol i dai long rot bilong kisim drak na kros pait—dispela em wanpela samting nogut tru.