EPRIL 10, 1912: Titanic i lusim Southampton, Inglan, bilong i go long New York, Amerika.

 EPRIL 11: Bihain long Titanic i kisim ol pasindia long Cherbourg, Frans, na long Queenstown (nau ol i kolim Cobh), Aialan, em i ron i go olsem long solwara Atlantik.

 EPRIL 14: Long 11:40 p.m., Titanic i bamim traipela ais.

EPRIL 15: Long 2:20 a.m., Titanic i sink i go daun long solwara, na 1,500 pasindia i dai.

TITANIC em i wanem kain sip? Wanem samting i mekim na em i sink i go daun long solwara? Ol samting i stap long Ulster Folk na Transport Haus Tumbuna, klostu long Belfast, Noten Aialan, bai helpim yumi long bekim ol dispela askim.

Titanic—Bilong Wanem Em i Gat Nem?

Michael McCaughan, man bipo i save lukautim Folk na Transport Haus Tumbuna, em i tok, Titanic em i “wanpela sip bilong bipo i gat nem.” Tasol Titanic i no narapela kain sip. Em i namba 2 bilong 3-pela bikpela sip ol i bin wokim long draidok long Harland na Wolff long Belfast. a Titanic em i wanpela bikpela sip bilong dispela taim bipo, longpela bilong en em olsem 269 mita na braitpela bilong en em 28 mita.

White Star Line siping kampani i makim ron bilong ol dispela traipela sip bilong ol bilong i go olsem long hap bilong Not Atlantik, we ol inap kisim planti winmani long en. Ol sip bilong Cunard Line kampani i save spit moa winim ol sip bilong White Star Line kampani. Olsem na White Star Line siping kampani i wokim ol traipela sip we i gat olgeta samting i stap insait long en bilong pulim ol maniman na ol man i gat nem long kalap long sip bilong ol.

Tasol Titanic inap mekim ol narapela wok tu. William Blair, bikman bilong Nesenel Musium long Noten Aialan, i tok: “Long olgeta wan wan yia, kirap long 1900 i go 1914, klostu 900,000 manmeri i save lusim kantri bilong ol na go sindaun long Amerika.” Ol dispela siping kampani i save kisim ol long Yurop i go long Amerika ol i kisim bikpela mani tru long dispela rot, olsem na ol i yusim Titanic long mekim dispela wok.

Bikpela Bagarap

Kepten bilong Titanic, E. J. Smith, em i save olsem rot em ol sip i save bihainim i go olsem long Not Atlantik i gat ol traipela traipela ais i stap na inap kamapim bagarap. Taim em i ronim sip Olympic, planti taim em i save bihainim dispela rot. Sampela narapela sip i salim tok i go long Titanic long ol i mas lukaut long ol ais, tasol ating ol i no mekim sampela samting o ating ol i no kisim ol dispela toksave.

Ol wokman bilong Titanic i lukim traipela ais i stap long fran na ol i toksave—tasol sori tru, em leit! Ofisa husat i wok i stap long dispela taim em i stiaim sip i go abrusim dispela traipela ais tasol sip i no inap tanim hariap na ais i sikirapim sait bilong sip. Bikpela hul i kamap long sait bilong sip—na wara i go insait na pulapim sampela rum long daunbilo. Kepten Smith i luksave olsem sip i bagarap pinis. Em i salim toksave bilong kisim helpim na em i tokim ol wokman bilong sip long redim ol liklik bot bilong ol manmeri i ken kalap long en.

Sip Titanic i gat 16 liklik bot na 4-pela raba bot. Sapos ol i pulapim gut ol dispela bot, ol inap karim 1,170 manmeri. Tasol i gat 2,200 manmeri long sip na i gat ol wokman bilong sip tu! Samting i nogut moa em olsem, ol dispela bot i lusim hariap sip na i no gat planti man i kalap long ol. Na ol bot i no kam bek bilong painim ol man husat i bin kalap i go long solwara, em ating ol i stap laip yet. Inap olsem 705 manmeri tasol i bin abrusim bagarap.

Bihain Long Bikpela Bagarap

Bihain long Titanic i bagarap, ol bikman i bosim ol raun bilong ol sip, ol i kirap putim ol nupela lo bilong seifti taim sip i ron long solwara. Wanpela lo em olsem, ol sip i mas i gat ol liklik bot inap long kisim olgeta manmeri i kalap long sip.

Inap planti yia ol man i bin ting Titanic i sink hariap tru i go daun, long wanem, i gat bikpela hul long sait bilong en taim em i bamim ais. Tasol long 1985, bihain long ol i painim pinis Titanic long as bilong solwara, ol i kisim save long narapela samting—solwara i kol nogut tru olsem ais na dispela i mekim na ain bilong sip i isi long bruk. Inap olsem 2-pela aua samting bihain long sip i bam, em i bruk long tupela hap na i sink i go daun long solwara—dispela em wanpela bikpela bagarap i bin kamap long bipo we planti manmeri i bin i dai. b

[Ol Futnot]

[Mep long pes 12]

(Bilong save ol dispela rait i stap we long pes, lukim buk o magasin)

Southampton

↓

Cherbourg

↓

Queenstown (Cobh)

↓

Hap Titanic i bamim ais

New York

SOLWARA ATLANTIK

[Ol Piksa long pes 10, 11]

Ol i wokim “Titanic”

[Piksa long pes 11]

Ol propela bilong “Titanic”

[Piksa long pes 11]

Ol wokman i lusim draidok long Harland na Wolff long Belfast, Aialan

[Piksa long pes 12]

Kepten bilong “Titanic,” em E. J. Smith, (han sut), na nambatu bilong em Herbert McElroy

[Kredit Lain]

© Courtesy CSU Archive/age fotostock

[Piksa Kredit Lain long pes 10]

Pes 10 na 11: Leaving Southampton, under construction, and shipyard: © National Museums Northern Ireland; propellers: © The Bridgeman Art Library

[Piksa Kredit Lain long pes 13]

© SZ Photo/Knorr & Hirth/Bridgeman Art Library