“Taim mi harim olsem papa bilong mi i dai, mi no inap bilip na bel i bagarap olgeta. Bel bilong mi i kotim mi strong, long wanem, mi no bin stap wantaim papa taim em i dai. Bel hevi man i kisim taim wanpela em i laikim tumas em i dai, dispela i winim tru olgeta narapela bel hevi. Mi misim tru papa bilong mi!”​—Sara.

PLANTI man i hatwok long toktok long indai, maski ol i bilong wanem kalsa o lotu. Olsem na sampela tokples i gat ol wed i olsem senis bilong tok “indai.” Sapos ol man i no laik tok wanpela i dai, long Tok Pisin ol i save tok “em i pasim ai,” “em i lusim laip bilong em,” o “em i lusim yumi pinis.”

Tasol ol dispela kain tok i no inap daunim bikpela bel sori man i pilim taim wanpela em i laikim tumas em i dai. Bel sori bilong sampela i bikpela moa yet, na ol i no inap bilip long samting i bin kamap.

Sapos wanpela yu laikim tumas em i dai, ating yu tu i hatwok long bilip olsem em i dai na yu hatwok long karim dispela bel hevi. Ating yu inap giaman olsem yu stap orait, tasol tru tru yu save olsem yu no orait. Tru, i no olgeta man i kamapim bel sori long wankain pasin, so sapos yu no kamapim long ples klia bel sori bilong yu, dispela i no makim olsem yu wok long pasim bel sori bilong yu, nogat. a Tasol ol hevi inap kamap sapos yu pilim olsem yu mas kamapim bel sori bilong yu long pasin em ol narapela i ting yu mas kamapim​—⁠kain olsem ol famili em ol tu i bel sori i stap.

“No Gat Taim Long Mi Yet i Krai Sori”

Tingim stori bilong Nathaniel, em wanpela man i gat 24 krismas taim mama bilong em i dai. Em i tok: “Pastaim mi no save bai mi mekim wanem. Mi pilim olsem mi gat wok long  mekim gut bel bilong papa na planti pren bilong mama em ol i bel hevi. Na i no gat taim long mi yet i krai sori.”

Bihain long wanpela yia, Nathaniel i pilim yet bikpela bel hevi long mama i dai. Em i tok: “Wan wan taim papa i save ringim mi bilong autim bel sori bilong em, na dispela em i gutpela samting. Em i gat nid long toktok long dispela samting, na mi amamas long helpim em. Tasol taim mi yet i nidim helpim, mi pilim olsem i no gat man bilong helpim mi.”

Ol man i save lukautim ol sikman​—⁠na ol dokta na nes tu em planti taim ol i lukim man i dai⁠—​ol inap pilim olsem ol i no ken kamapim long ples klia bel sori bilong ol. Tingim Heloisa, em i bin mekim wok dokta winim 20 yia. Em i wok long wanpela komiuniti we ol man i save gut long narapela narapela na em i pas gut wantaim ol sikman em i lukautim. Em i tok: “Mi stap wantaim planti bilong ol taim ol i dai, na sampela ol i gutpela pren bilong mi.”

Heloisa i save olsem krai em i gutpela samting bilong helpim man i bel sori. Em i tok: “Tasol mi hatwok long krai. Mi no kamapim long ples klia bel sori bilong mi, long wanem, mi pilim olsem mi mas stap strong bilong strongim ol narapela. Mi ting olsem ol arapela i laik bai mi stap strong.”

“Mama i No Stap na i Olsem Haus i Kol”

Wanpela bikpela hevi tru bilong ol man em wanpela ol i laikim tumas em i dai​—⁠em ol i pilim olsem ol i stap wanpis tru. Olsem, Ashley i gat 19 krismas taim mama bilong em i dai long sik kensa. Em i tok: “Bihain long dispela, mi pilim olsem mi no gat helpim na mi stap wanpis tru. Mama em bes pren bilong mi. Planti taim mitupela i save mekim ol samting wantaim!”

Long olgeta de, Ashley i hatwok long go bek long haus, long wanem, em i save olsem mama bai no stap. Em i tok: “Mama i no stap na i olsem haus i kol. Planti taim mi go long rum na krai na lukim ol poto bilong mama, na tingim ol samting mitupela i save mekim wantaim.”

Sapos wanpela long famili o gutpela pren bilong yu i dai, orait yu ken bilip olsem i no yu wanpela tasol i karim dispela kain bel hevi, nogat. Planti i bin painim rot we i helpim ol long karim dispela kain bel hevi, em nau yumi bai stori long en.

[Futnot]

[Rait long pes 5]

“Mi pilim olsem mi no gat helpim na mi stap wanpis tru. Mama em bes pren bilong mi”​—⁠Ashley