Yu Ting Wanpela i Bin Wokim?

● Ol saveman i tok raun bilong trausel we i kirap long ples em i painim kaikai na i go inap long nambis we em i putim kiau, em i “wanpela narakain samting tru em ol narapela animal i no save mekim.” Inap planti yia, ol saveman i laik kisim gut save long dispela samting.

Tingim: Long olgeta tupela i go fopela yia, meri trausel i save go long nambis bilong putim kiau. Em i save putim 100 kiau long wanpela hul na karamapim long wesan. Taim ol kiau i bruk, ol bebi trausel i kirap wokabaut i go long solwara. Orait nau ol i kirapim longpela raun bilong ol, em longpela bilong en inap olsem 12,900 kilomita. Sampela yia bihain taim ol i bikpela pinis, ol meri trausel i go bek long dispela nambis bilong putim kiau bilong ol yet​—⁠em seim nambis ol yet i bin kamap long en!

Olsem wanem ol trausel i save stiaim raun bilong ol? “I luk olsem ol i gat wanpela kain mep.” Nius National Geographic News i kamapim dispela tok bilong saveman Kenneth Lohmann bilong Yunivesiti Bilong North Carolina long Amerika. Wok painimaut i kamapim olsem ol trausel i save long hap ol i stap long en long rot bilong skelim wanpela strong bilong graun ol i kolim magnetik fil. Dispela narakain save bilong ol i mekim na ol dispela liklik trausel inap raun 12,900 kilomita long solwara Atlantik. Lohmann i tok: “Ol yet i mekim dispela raun na ol i no bihainim ol narapela trausel.”

Yu ting wanem? Save bilong trausel long stiaim raun bilong en i kamap nating o wanpela man i bin wokim?

[Blok long pes 15]

TINGIM

● Bihain long meri trausel i putim ol kiau na karamapim, em i lusim ol.

● Bebi trausel i yusim wanpela spesel tit (caruncle) bilong brukim kiau, na bihain dispela tit i pundaun.

● Bikpela haptaim (90 pesen) bilong laip bilong ol, ol trausel i save stap long solwara.

[Piksa Kredit Lain long pes 15]

© Masa Ushioda/WaterF/age fotostock