Ol spirit i stap! Ol gutpela spirit na ol spirit nogut i stap long ples spirit em yumi no inap lukim. Olsem wanem? Ol dispela spirit em tewel bilong ol man i bin i stap long graun na ol i dai?

Nogat. Ol manmeri i dai pinis ol i no i stap long ples spirit olsem planti man i ting ol i mekim. Olsem wanem yumi ken save dispela tok i stret? Long wanem, Baibel yet i tok olsem. Olgeta tok bilong Baibel i stret na i tru, long wanem em i buk bilong dispela God em wanpela tasol em i God tru, nem bilong em Jehova. Jehova i bin wokim ol man na em i save long ol samting i save painim ol long taim ol i dai.—Buk Song 83:18; 2 Timoti 3:16.

Baibel i tok, God i “kisim graun” na em i wokim Adam, em namba wan man. (Stat 2:7) God i putim Adam i stap long gutpela ples Paradais long Iden. Sapos Adam i bin bihainim lo bilong God, bai em i no i dai; bai em i stap yet hia long graun. Tasol long laik bilong em yet Adam i brukim lo bilong God, olsem na God i tokim em: “Yu [bai] go bek long graun. Long wanem, mi bin wokim yu long graun, na bai yu go bek gen long graun.”—Stat 3:19.

Olsem wanem long dispela tok? Orait, taim God i no wokim yet Adam, Adam i stap we? Em i no i stap long wanpela hap. Em i no stap wanpela spirit long heven na wet long kamap man long graun. Nogat. Em i no i stap. Olsem na taim God i tok Adam bai “go bek long graun,” i olsem em i tok Adam bai i dai.  Taim em i dai, em i no go long wanpela ples spirit. Em i no gat laip moa—em i no i stap.

Tasol olsem wanem long ol narapela i dai pinis? Ol tu i no i stap moa o olsem wanem? Baibel i tok:

• “God i bin kisim graun na wokim [man na animal], olsem na taim tupela i dai bai tupela i kamap olsem graun gen.”—Saveman 3:20.

• “Ol man i dai pinis, ol i no inap save long wanpela samting.”—Saveman 9:5.

• “Laik na kros na mangal bilong ol i pinis olgeta.”—Saveman 9:6.

• “Yu no inap mekim wok o tingting o kisim gutpela tingting na save long ples bilong ol man i dai pinis, dispela ples bai yu go long en.”—Saveman 9:10.

• “Taim ol [man] i dai ol i tanim i kamap graun gen. Na long dispela taim ol i no inap mekim olgeta samting ol i bin tok long mekim.”—Buk Song 146:4.

 Ating yu hatwok long bilipim ol dispela tok bilong Baibel? Sapos olsem, orait tingim dispela samting: Long planti famili, papa i mekim wok mani bilong lukautim famili. Taim papa i dai, dispela i givim hevi long meri pikinini. Sampela taim ol i no gat mani inap long baim kaikai na ol i hangre. Na ating ol birua bilong papa bai mekim nogut long ol. Orait, sapos papa i stap laip long wanpela ples spirit, bilong wanem em i no lukautim yet famili bilong em bambai ol i no ken hangre, na ol man nogut i no ken bagarapim ol? Long wanem, tok bilong Baibel i stret—em i dai pinis na em i no i stap moa, olsem na em i no inap mekim wanpela samting.—Buk Song 115:17.

Tasol olsem wanem? Ol man i dai pinis ol i no inap i stap laip gen? Nogat, i no olsem. Bihain bai yumi stori long ol bai kirap bek. Tasol ol man i dai pinis i no save yu mekim wanem. Ol i no inap lukim yu o harim tok bilong yu o toktok wantaim yu. Yu no ken pret long ol. Ol i no inap helpim yu o nogutim yu.—Saveman 9:4; Aisaia 26:14.