Jisas i gat 3-pela gutpela pren em ol i stap long Betani. Em Lasarus na tupela susa bilong em, Maria na Marta. Wanpela taim, Jisas i stap long narapela sait bilong Jordan, na Maria na Marta i salim tok long em: ‘Lasarus i sik nogut tru. Plis kam hariap!’ Tasol Jisas i no hariap long go. Em i wet tupela moa de na bihain em i tokim ol disaipel bilong em: ‘Yumi go long Betani. Lasarus i slip, mi bai go na kirapim em.’ Ol aposel i tok: ‘Sapos Lasarus i slip, dispela bai helpim em long kamap orait.’ So Jisas i tok klia long ol: ‘Lasarus i dai pinis.’

Taim Jisas i kamap long Betani, ol i bin planim Lasarus 4-pela de i go pinis. Bikpela lain manmeri i kam bilong mekim isi bel bilong Marta na Maria. Taim Marta i harim olsem Jisas i kam, em i hariap i go bungim em. Marta i tok: “Bikpela, sapos yu bin stap long hia, brata bilong mi i no inap i dai.” Jisas i tokim em: ‘Brata bilong yu bai stap laip gen. Marta, yu bilipim dispela tok?’ Em i tok; ‘Mi bilip olsem em bai kirap bek long las de.’ Jisas i tokim em: “Kirap bek em mi yet na laip em mi yet.”

Bihain Marta i go long Maria na tokim em: ‘Jisas i kam pinis.’ Maria i ran i go long Jisas, na bikpela lain manmeri i bihainim em. Em i pundaun long lek bilong Jisas, na em i no stop long krai. Em i tok: ‘Bikpela, sapos yu bin stap long hia, brata bilong mipela bai stap laip yet!’ Jisas i lukim pen na hevi bilong em, na em tu i krai. Taim bikpela lain manmeri i lukim Jisas i krai, ol i tok: ‘Lukim, Jisas i laikim tru Lasarus.’ Tasol sampela i tingting: ‘Bilong wanem em i no seivim pren bilong em?’ Jisas bai mekim wanem?

Jisas i go long matmat, na wanpela traipela ston i karamapim maus bilong matmat. Em i tok: ‘Rausim ston i go.’ Marta i tok: ‘Tasol em 4-pela de pinis! Bodi bilong em bai smel.’ Maski i olsem, ol i rausim ston i go, na Jisas i beten: ‘Papa, tenkyu long harim tok bilong mi. Mi save oltaim yu save harim tok bilong mi, tasol mi toktok bikpela bikos mi laik bai ol dispela  manmeri i ken save olsem yu bin salim mi i kam.’ Bihain em i singaut long strongpela nek: “Lasarus, yu kam ausait!” Narakain samting i kamap: Lasarus i kam aut long matmat, ol laplap i karamapim em. Jisas i tok: “Rausim ol laplap na larim em i go.”

Planti manmeri i lukim dispela na ol i bilip long Jisas. Tasol sampela i go na tokim ol Farisi. Kirap long dispela de, ol Farisi i laik kilim i dai Lasarus na Jisas. Wanpela bilong 12-pela aposel, Judas Iskariot, i hait na i go long ol Farisi na tok: ‘Yupela bai baim mi long hamas mani sapos mi soim Jisas long yupela?’ Ol i wanbel long givim em 30 silva koin, na Judas i kirap painim rot bilong putim Jisas long han bilong ol Farisi.