KIRAPIM TOKTOK
LESEN 3
Mekim Gutpela Pasin
Stiatok: “Man i gat pasin laikim . . . em i save mekim gutpela pasin.”—1 Kor. 13:4.
Samting Jisas i Mekim
1. Lukim VIDIO, o ritim Jon 9:1-7. Na skelim ol dispela askim:
-
Jisas i mekim wanem samting pastaim—oraitim aipas man o autim gutnius long em?—Lukim Jon 9:35-38.
-
Olsem wanem pasin Jisas i mekim i kirapim dispela man long harim gutnius?
Yumi Kisim Wanem Skul Long Jisas?
2. Man bilong haus bai amamas long harim tok yumi autim sapos em i pilim olsem yumi tingim em.
Bihainim Pasin Bilong Jisas
3. Pilim tingting bilong man. Traim long piksaim samting em i pilim.
-
Askim yu yet: ‘Ating em i tingting planti long wanem samting? Wanem tok bai helpim em na em bai amamas long harim?’ Taim yu mekim olsem, dispela bai helpim yu long soim gutpela pasin long em.
-
Soim olsem yu tingim hevi bilong man long rot bilong putim gut yau. Sapos em i tokim yu long tingting bilong em long wanpela samting o wanpela hevi em i bungim, no ken senisim tok.
4. Toktok long gutpela pasin na pasin rispek. Taim yu stori long man bilong haus na yu laik tru long helpim em, dispela bai kamap klia long toktok yu mekim. Was gut long tok yu mekim na hau yu mekim, na no ken mekim tok we bai bagarapim bel bilong em.
5. Helpim man. Painim ol rot bilong helpim man bilong haus. Gutpela pasin yumi mekim long em, dispela bai mekim na em bai amamas long toktok wantaim yumi.
