Jisas i stap long sinagog long Kaperneam, na em i skulim ol manmeri olsem em i dispela bret tru i kam long heven. Em i bin mekim wankain tok long taim em i wokim mirakel na givim bret na pis long ol man long hap is bilong raunwara Galili, ol dispela man i kam painim em long Kaperneam.

Jisas i tok moa olsem: “Ol tumbuna bilong yupela i bin kaikai mana long ples nating, na ol i dai.” Tasol em i tok: “Mi dispela bret i gat laip na i lusim heven na i kam daun. Sapos man i kaikai dispela bret em bai stap oltaim. Na bret mi givim, em bodi bilong mi, na mi givim bai ol manmeri bilong graun i ken kisim laip.”—Jon 6:48-51.

Long yia 30 C.E., Jisas i tokim Nikodemus olsem God i laikim tumas olgeta manmeri bilong graun, olsem na em i salim Pikinini bilong em i kam olsem Man Bilong Kisim Bek yumi. Orait nau Jisas i tok, sapos ol i kaikai bodi bilong em, olsem bilip long ofa em bai mekim, ol inap long kisim laip oltaim.

Ol manmeri i no wanbel long tok bilong Jisas, na ol i tok: “Olsem wanem dispela man inap givim mipela bodi bilong en long kaikai?” (Jon 6:52) Jisas i laik bai ol i kliagut olsem em i mekim dispela tok piksa long makim bodi bilong em. Olsem na em i kolim sampela tok moa bilong helpim ol long kliagut long mining bilong tok em i mekim.

“Sapos yupela i no kaikai bodi bilong Pikinini bilong man na dringim blut bilong em, orait yupela bai i no gat laip i stap long yupela. Man i kaikai bodi bilong mi na dringim blut bilong mi, em i gat laip i stap oltaim, . . . long wanem, bodi bilong mi em kaikai tru, na blut bilong mi em dring tru. Man i kaikai bodi bilong mi na dringim blut bilong mi, em i pas yet wantaim mi.”—Jon 6:53-56.

Tingim, taim ol Juda i harim dispela tok, ol i no amamas! Ol i ting Jisas i tok long ol i mas kaikai bodi tru bilong em na dring blut tru bilong em, na dispela i brukim lo bilong God long pasin bilong kaikai abus i gat blut. (Stat 9:4; Wok Pris 17:10, 11) Tasol Jisas i no tok long ol i mas kaikai bodi tru na dring blut tru bilong em, nogat. Em i laik helpim ol long kliagut olsem, sapos man i laik kisim laip oltaim, orait em i mas bilip long ofa Jisas bai mekim long givim bodi na blut bilong em olsem pe bilong baim bek ol man. Tasol planti disaipel i no kliagut long as bilong tok Jisas i mekim. Sampela i tok: “Em mekim wanem kain tok? Husat inap putim yau long dispela tok?”—Jon 6:60.

Jisas i luksave olsem sampela disaipel bilong em i toktok planti, olsem na em i tokim ol: “Dispela tok i bagarapim bel bilong yupela, a? Olsem wanem sapos yupela i lukim Pikinini bilong man i go antap long dispela ples bipo em i stap long en? . . . Ol tok mi mekim long yupela i kam long holi spirit na ol dispela tok i save givim laip. Tasol sampela namel long yupela, ol i no bilip.” Planti disaipel i harim dispela tok na ol i lusim em na i go.—Jon 6:61-64.

Olsem na Jisas i tokim 12-pela aposel: “Ating yupela tu i laik lusim mi na i go, a?” Na Pita i tok: “Bikpela, bai mipela i go long husat? Ol tok bilong yu i bringim man i go long laip oltaim. Na mipela i bilip na kisim save olsem yu Man holi na God i bin salim yu i kam.” (Jon 6:67-69) Tok bilong Pita i kamapim klia olsem em na ol narapela aposel i laik stap gut long Jisas, maski ol i no kliagut long tok bilong em!

Jisas i amamas long tok bilong Pita, tasol em i tok: “Mi makim yupela 12-pela aposel, a? Tasol wanpela bilong yupela i olsem devil.” (Jon 6:70) Jisas i toktok long Judas Iskariot. Ating em i mekim dispela tok, long wanem, em i luksave olsem Judas i kirap pinis long bihainim ol laik nogut bilong bel.

Tasol Jisas i amamas olsem Pita na ol narapela aposel i no givim baksait long em, nogat, ol i bihainim em na autim gutnius long olgeta man na helpim ol long kisim laip.