Long Kaperneam Jisas na fopela disaipel bilong em i bisi stret. Long apinun, ol man i bringim ol sikman i kam long Jisas na bai em i oraitim ol. Olsem na Jisas i no gat taim long stap em yet.

Long neks de long bikmoning, taim ples i tudak yet, Jisas i kirap na i go ausait long haus. Em i go long wanpela ples i no gat man na bai em i ken beten long Papa bilong em. Tasol Jisas i no stap longpela taim, long wanem, taim ol disaipel i luksave olsem em i no stap, “Saimon na lain i stap wantaim em” i go painim Jisas. Ating Pita i go pas long painim Jisas, long wanem, Jisas i stap long haus bilong em.—Mak 1:36; Luk 4:38.

Taim ol i painim Jisas pinis, Pita i tokim em: “Olgeta manmeri i wok long painim yu.” (Mak 1:37) I klia tru olsem ol man long Kaperneam i laik bai Jisas i stap wantaim ol. Ol i pilim tru ol wok em i mekim bilong helpim ol, olsem na ol i laik “pasim em, bai em i no ken lusim ol.” (Luk 4:42) Tasol olsem wanem? Yu ting Jisas i kam long graun bilong wokim ol mirakel? Na yu ting em i mas mekim wok long asples bilong em tasol? Em i tok wanem long wok tru bilong em?

Jisas i tokim ol disaipel olsem: “Yumi go long narapela hap, long ol taun i stap klostu, na bai mi ken autim tok long ol dispela hap tu, long wanem, em long dispela as na mi kam.” Jisas i tokim ol man i laik pasim em olsem: “Mi mas autim gutnius bilong Kingdom bilong God long ol arapela taun tu, long wanem, em long dispela as na God i salim mi i kam.”—Mak 1:38; Luk 4:43.

Tru tumas, nambawan risen na Jisas i kam long graun em long autim tok long Kingdom Bilong God. Dispela Kingdom bai mekim holi nem bilong Papa bilong em na pinisim olgeta hevi bilong ol manmeri inap oltaim. Ol mirakel Jisas i wokim bilong oraitim ol sikman i kamapim klia olsem God i salim em i kam long graun. Olsem tasol, inap planti handret yia i go pinis, Moses i bin mekim ol wankain wok i kamapim klia olsem God i bin salim em i kam bilong kisim bek lain bilong Em.—Kisim Bek 4:1-9, 30, 31.

Olsem na Jisas wantaim fopela disaipel bilong em i lusim Kaperneam na ol i go long ol narapela taun bilong autim tok. Dispela fopela disaipel em Pita na brata bilong em, Andru, Jon na brata bilong em, Jems. Wanpela wik paslain, Jisas i bin singautim ol long go autim tok wantaim em.

Jisas i autim tok wantaim fopela disaipel bilong em long Galili na ol gutpela samting i kamap long wok bilong ol! Planti man i harim stori long ol wok bilong Jisas. “Stori bilong ol samting em i mekim i go long olgeta hap bilong Siria,” na long Dekapolis em hap i gat 10-pela taun, na long ol ples long hapsait bilong wara Jordan. (Matyu 4:24, 25) Bikpela lain manmeri em ol i stap long ol dispela hap na long Judia, ol i bihainim Jisas na ol disaipel bilong em. Planti i bringim ol sikman i kam long Jisas na bai em i ken oraitim ol. Tasol Jisas i no krosim ol, em i rausim ol spirit nogut i stap long ol man na em i oraitim ol sikman.