Insait long olgeta lotu, i gat ol man i gat gutpela bel. God i luksave long ol dispela man na i tingim ol, dispela em i gutpela nius. Tasol sori tru, ol man i bin mekim wok nogut long nem bilong lotu. (2 Korin 4:3, 4; 11:13-15) Sampela nius ripot i kamapim olsem sampela lotu ol i insait long woa, pasin teroris, pasin bilong bagarapim na pinisim wanpela lain olgeta, na mekim pasin nogut long ol pikinini. Ol man i bilip long God, ol i bel hevi tru long dispela!​—Ritim Matyu 24:3-5, 11, 12.

Lotu i tru i save litimapim nem bilong God, tasol lotu giaman i save mekim ol samting em God i no orait long en. Lotu giaman i skulim ol man long ol tok i no stap long Baibel, olsem ol bilip giaman long God na long ol man i dai pinis. Tasol Jehova i laik bai ol man i kisim stretpela save long em.​—Ritim Saveman 9:4, 5, 10; 1 Timoti 2:3-5.

Ol lotu i no inap giamanim God na tok ol i laikim em, tasol tru tru ol i laikim graun bilong Satan. (Jems 4:4) Baibel i kolim olgeta lotu giaman olsem “Bikpela Babilon.” Babilon em wanpela taun long bipo, we lotu giaman i bin kirap long en bihain long Bikpela Tait, long taim bilong Noa. Klostu nau, God bai pinisim wantu ol lotu i save giamanim na daunim ol manmeri.​—Ritim Revelesen 17:1, 2, 5, 16, 17; 18:8.

Tasol Jehova i no lusim tingting long ol man i gat gutpela bel, em ol i stap nabaut namel long ol lotu giaman long olgeta hap bilong graun. Em i helpim ol kain man olsem long lusim lotu giaman long rot bilong skulim ol long tok i tru.​—Ritim Maika 4:2, 5.

Jehova i save tingim ol manmeri husat i laik kisim save long tok i tru na i laik mekim gutpela pasin. Em i tokim ol long lusim lotu giaman. Ol man husat i laikim tru God, ol i redi long mekim ol senis bambai God i ken amamas long ol.​—Ritim Revelesen 18:4.

Long bipo, taim ol aposel i autim gutnius, ol man husat i gat gutpela bel ol i amamas na bilip long gutnius. Jehova i skulim ol long nupela rot bilong bihainim we inap helpim ol long i stap amamas, na laip bilong ol i gat as bilong en, na ol i ken wetim gutpela samting bai kamap. Ol i stap gutpela piksa long yumi long nau, long wanem, ol i bilip long gutnius na ol i putim Jehova i stap namba 1 long laip bilong ol.​—Ritim 1 Tesalonaika 1:8, 9; 2:13.

Jehova i amamas long kisim ol man husat i lusim lotu giaman na i kam insait long famili bilong em. Sapos yu mekim olsem, orait bai yu kamap pren bilong Jehova, insait long wanpela famili i laikim yu na i lotuim Jehova, na yu inap kisim laip oltaim.​—Ritim Mak 10:29, 30; 2 Korin 6:17, 18.

Klostu nau God bai givim strafe long ol lotu giaman, dispela em i gutpela nius. Dispela bai pinisim pasin bilong daunim ol man long olgeta hap bilong graun. Na ol lotu giaman bai i no inap moa long giamanim ol man na brukim ol lain. Olgeta man husat i stap long dispela taim, ol bai stap wanbel long lotuim dispela wanpela God tru.​—Ritim Revelesen 18:20, 21; 21:3, 4.