Dispela gutpela nius olsem ol manmeri bai stap oltaim long graun, i stap long Baibel. (Song 37:29) I gat 66 liklik buk long Baibel. Na God i yusim 40 bilipman long raitim ol dispela buk. Moses i raitim Buk Stat i go long Buk Lo inap 3,500 yia i go pinis. Aposel Jon i raitim laspela buk inap 1,900 yia i go pinis. Ol i raitim tingting bilong husat long Baibel? God i mekim wok long holi spirit bilong kamapim tingting bilong em long ol man i raitim Baibel. (2 Samuel 23:2) Ol i raitim tingting bilong God na i no bilong ol yet. Olsem na Jehova yet em i Man i kamapim ol tok i stap long Baibel.​—Ritim 2 Timoti 3:16; 2 Pita 1:20, 21.

Lukim vidio Husat i Kamapim Ol Tok Bilong Baibel?

Yumi save olsem Baibel i kam long God, long wanem, em i tokaut stret long ol samting bai kamap bihain. I no gat wanpela man inap mekim olsem. (Josua 23:14) God i Gat Olgeta Strong em wanpela tasol inap save long ol samting bai painim ol man long bihain.​—Ritim Aisaia 42:9; 46:10.

Tru tumas, buk i kam long God i narapela kain buk tru. Ol i bin tilim planti bilion kopi bilong Baibel long planti handret tokples. Maski ol i bin raitim Baibel long bipo tru, ol tok bilong en i wanbel wantaim ol wok painimaut bilong saiens. Na tu, olgeta tok em dispela 40 man i bin raitim i no pait wantaim. * Na ol tok Baibel i mekim long pasin laikim, dispela kain tok i kam long God tasol—em God bilong pasin laikim. Tok bilong en i gat strong long senisim i stap bilong ol man i kamap gutpela moa. Ol dispela samting i  kirapim planti milion man long bilip tru olsem Baibel em i Tok Bilong God.​—Ritim 1 Tesalonaika 2:13.

Lukim vidio Olsem Wanem Yumi Inap Save Olsem Tok Bilong Baibel i Tru?

Baibel i kamapim ol gutpela nius long ol samting God i tingting pinis long mekim bilong helpim ol man. Baibel i stori long olsem wanem man i bin lusim gutpela sindaun long ples Paradais long graun, na olsem wanem Paradais bai kamap gen long graun.​—Ritim Revelesen 21:4, 5.

Baibel i gat ol lo, ol stiatok, na ol skultok. Na tu, Baibel i gat ol stori long pasin God i mekim long ol man. Ol dispela stori i helpim yumi long save long pasin bilong God. Olsem na Baibel i ken helpim yu long save long God. Baibel i stori tu long olsem wanem yu inap kamap pren bilong em.​—Ritim Song 19:7, 11; Jems 2:23; 4:8.

Dispela buklet bai helpim yu long kliagut long ol tok bilong Baibel; buklet i bihainim pasin bilong Jisas long skulim ol man. Em i kolim ol tok bilong Baibel na stori gut long “mining bilong ol Rait Holi.”​—Ritim Luk 24:27, 45.

Ol gutpela nius i kam long God i winim tru ol narapela samting. Tasol sampela man i no laik harim, na sampela i les long en. No ken larim dispela i daunim yu. Bilong kisim laip oltaim, yu mas kisim save long God.​—Ritim Jon 17:3.