1, 2. (a) Olsem wanem lain bilong Elaija i karim bikpela hevi? (b) Elaija i bungim wanem pasin birua long Maunten Karmel?

 ELAIJA i lukim bikpela lain manmeri i wokabaut i kam antap long Maunten Karmel. Tulait i wok long bruk na ples i no klia gut, tasol em inap lukim ol dispela manmeri i karim bikpela hevi bilong stap rabis na sot long kaikai. Inap 3 na hap yia i gat bikpela san, dispela i stap ples klia long sindaun bilong ol.

² Namel long ol i gat 450 profet bilong Bal, ol i gat pasin hambak na ol i heitim Elaija, em profet bilong Jehova. Kwin Jesebel i bin kilim i dai planti wokman bilong Jehova, tasol dispela man i sanap strong yet na sakim lotu bilong Bal. Tasol em i sanap strong i go inap long wanem taim? Ating ol dispela pris i ting ol i planti, na dispela wanpis man i no inap winim ol. (1 Kin. 18:4, 19, 20) King Ahap tu i kam, em i kam long karis bilong king. Em tu i no laikim Elaija.

3, 4. (a) Wai na Elaija i pret taim tulait i bruk long dispela de? (b) Bai yumi skelim wanem ol askim?

³ Long dispela de, ol narakain samting bai painim dispela wanpis profet winim ol narapela taim bipo. Taim Elaija i lukluk long ol manmeri i kam antap long Maunten Karmel, em i save olsem klostu nau ol bai luksave long husat i gat bikpela strong moa, God o ol man nogut. Em i pilim olsem wanem taim tulait i bruk long dispela de? Em i “man wankain olsem yumi,” so em i save long filings man i gat taim em i pret. (Ritim Jems 5:17.) Yumi save long dispela: Em i stap namel long ol man i sakim God, apostet king bilong ol, na ol pris husat i save kilim i dai ol man, so Elaija i pilim olsem em i stap wanpis tru.​—1 Kin. 18:22.

⁴ Tasol wanem samting i kamapim dispela bikpela hevi long Israel? Na dispela stori inap givim wanem skul long yu? Tingim pasin bilong Elaija long bilip na olsem wanem yumi inap bihainim long nau.

5, 6. (a) Lain Israel i mas strong long mekim wanem? (b) Olsem wanem King Ahap i mekim Jehova i bel hevi tru?

⁵ Long laip olgeta bilong Elaija, em i lukluk tasol na i no inap mekim wanpela samting taim lotu i klin long asples bilong em i bagarap na ol manmeri bilong em i sakim na krungutim dispela gutpela samting. Inap longpela taim ol Israel i mas strong long makim, ol bai  bihainim lotu i klin o lotu giaman, ol bai lotuim Jehova God o ol giaman god bilong lain i stap klostu long ol. Long taim bilong Elaija, pasin bilong lotuim ol giaman god i go bikpela tru.

⁶ King Ahap i mekim Jehova i bel hevi tru. Em i maritim Jesebel, pikinini meri bilong king bilong Saidon. Jesebel i tingting strong long mekim lotu bilong Bal i go long olgeta hap bilong Israel na pinisim tru lotu bilong Jehova. Kwiktaim em i kontrolim Ahap. Ahap i wokim wanpela tempel na alta bilong Bal, na i go pas long brukim skru long dispela god bilong ol haiden.​—1 Kin. 16:30-33.

7. (a) Wanem samting i mekim na lotu bilong Bal i nogut tru? (b) Taim yumi tingim longpela bilong bikpela san long taim bilong Elaija, wai na yumi inap bilip olsem tok bilong Baibel i no pait wantaim? (Lukim tu  blok.)

⁷ Wanem samting i mekim na lotu bilong Bal i nogut tru? Em i giamanim ol Israel, na pulim planti i go longwe long God tru. Na tu, em i kamapim ol stingpela pasin na pasin bilong bagarapim narapela. I gat ol man na meri i save mekim wok pamuk long tempel, ol i mekim ol bung i gat pasin pamuk, na tu, ol i save sakrifaisim ol pikinini. Jehova i lukim dispela na em i salim Elaija i go long Ahap bilong toksave olsem bikpela san bai kamap na i stap inap profet bilong God i tokaut olsem em bai pinis. (1 Kin. 17:1) Sampela yia bihain, Elaija i go long Ahap na tokim em long bungim ol manmeri na ol profet bilong Bal long Maunten Karmel. a

8. Stori bilong lotu bilong Bal inap helpim yumi olsem wanem long nau?

⁸ Dispela stori i givim wanem skul long yumi long nau? Sampela inap ting stori bilong lotu bilong Bal i no inap helpim yumi long nau, long wanem, yumi no save lukim ol tempel na alta bilong Bal. Tasol dispela stori i no wanpela stori nating bilong bipo. (Rom 15:4) Dispela tok “Bal” i makim “papa bilong wanpela samting” o “bosman.” Jehova i tokim lain bilong em olsem ol i mas makim em olsem “bal” bilong ol, o olsem man bilong ol. (Ais. 54:5) Ating yu wanbel olsem ol man i mekim yet wok bilong kain kain bosman na ol i no mekim wok bilong God i Gat Olgeta Strong. Maski ol i mekim wok bilong kisim mani, bikpela namba, amamas, amamas long maritpasin, o lotuim wanpela bilong planti god na i no lotuim Jehova, ol i makim wanpela bosman. (Mat. 6:24; ritim Rom 6:16.) Yumi ken tok, planti pasin we i strong tru insait long lotu bilong Bal i go bikpela long nau. Taim yumi tingim dispela resis bilong bipo namel long Jehova na Bal, dispela inap helpim yumi long mekim gutpela disisen long husat bai yumi lotuim.

9. (a) Olsem wanem Maunten Karmel em gutpela ples bilong kamapim klia lotu bilong Bal i wanem kain? (Lukim tu futnot.) (b) Elaija i tok wanem long ol manmeri?

⁹ Long het bilong Maunten Karmel ol inap lukim gut ol samting—kirap long wara bilong Kison i go inap long Bikpela Solwara (Solwara Mediterenian) i stap klostu na i go long ol maunten bilong Lebanon i stap longwe long hap not. b Tasol taim san i wok long kamap long dispela bikpela de, ples i luk nogut tru. Dispela gutpela graun Jehova i bin givim long ol pikinini bilong Abraham nau i no gat samting i gro. Bikpela san i mekim na graun i strong tru, longlong pasin bilong lain bilong God yet i kamapim dispela hevi! Taim ol dispela manmeri i bung, Elaija i kam na tok: “Yupela ol manmeri bilong tupela  tingting, wanem taim bai yupela i gat wanpela tingting tasol? Sapos Jehova em i God tru, orait yupela i mas lotuim em. Tasol sapos Bal em i God tru, orait yupela i mas lotuim em!”​—1 Kin. 18:21.

10. Olsem wanem lain bilong Elaija i “manmeri bilong tupela tingting”? Ol i lusim tingting long wanem bikpela tok i tru?

¹⁰ Wanem mining bilong tok bilong Elaija olsem ol i “manmeri bilong tupela tingting”? Ol dispela manmeri i no luksave olsem ol i mas mekim disisen long ol bai lotuim Jehova o lotuim Bal. Ol i ting ol inap lotuim tupela wantaim—ol i ken amamasim Bal long ol pasin nogut ol i mekim na ol i ken askim Jehova God long helpim ol. Ol i ting Bal bai blesim ol gaden na animal bilong ol, na “Jehova, bosman bilong bikpela lain ami,” i ken lukautim ol long pait. (1 Sml. 17:45) Ol i lusim tingting long wanpela bikpela tok i tru—em samting planti man long nau i no kliagut. Jehova i no orait long ol man i lotuim em na ol narapela god wantaim. Em i laik bai ol man i mas lotuim em wanpela tasol na i stret ol i mekim olsem. Em i no orait long ol man i lotuim em na ol narapela samting wantaim. Em i heitim tru dispela pasin!​—Ritim Kisim Bek 20:5.

11. Olsem wanem tok bilong Elaija long Maunten Karmel inap helpim yumi long skelim gen samting i stap nambawan long laip bilong yumi na lotu bilong yumi?

¹¹ Ol dispela Israel i gat tupela tingting, ol i olsem wanpela man i laik wokabaut long tupela rot long wankain taim. Long nau planti man i save mekim wankain popaia, ol i larim ol narapela “bal,” olsem ol narapela bosman, i bosim ol na isi isi ol i lusim pasin bilong lotuim God! Dispela strongpela tokaut bilong Elaija long lusim tupela tingting inap helpim yumi long skelim gen wanem samting i stap nambawan long laip bilong yumi na yumi lotu long husat.

12, 13. (a) Elaija i tok long ol i mas mekim wanem traim? (b) Hau bai yumi soim olsem yumi gat wankain bilip olsem Elaija?

¹² Nau Elaija i tokim ol long mekim wanpela traim. Dispela traim em isi. Ol pris bilong Bal i mas sanapim wanpela alta na putim sakrifais long en; bihain ol i mas beten long god bilong ol long salim paia i kam daun. Elaija bai mekim wankain. Em i tok: “God husat i harim na salim paia i kam, orait dispela em i God tru.” Elaija yet i save husat i God tru. Em i gat strongpela bilip, olsem na em i no pret long larim ol birua bilong em i mekim olgeta samting ol i laik mekim. Em i larim ol profet bilong Bal i go pas. So ol i makim wanpela bulmakau bilong mekim sakrifais na singaut long Bal. c—1 Kin. 18:24, 25.

 ¹³ Nau yumi no stap long taim we i gat ol mirakel. Tasol Jehova i no senis. Yumi ken bilip tru long em olsem Elaija i bin mekim. Olsem: Taim sampela man i no wanbel long ol tok em Baibel i skulim yumi long en, yumi no ken pret long larim ol i kamapim tingting bilong ol pastaim. Olsem Elaija, yumi ken lukluk i go long trupela God bilong stretim dispela samting. Yumi mekim olsem taim yumi bilip long Tok Bilong God, em bilong “mekim ol samting i kamap stret,” na yumi no bilip long yumi yet.​—2 Tim. 3:16.

14. Elaija i tok wanem bilong tok bilas long ol profet bilong Bal, na bilong wanem?

¹⁴ Ol profet bilong Bal i putim sakrifais bilong ol long alta na ol i singaut long god bilong ol. Ol i singaut planti taim olsem: “O Bal, harim singaut bilong mipela na bekim!” Ol i wok long singaut inap planti minit na aua. Baibel i tok: “Tasol i no gat wanpela nek i kamap na i no gat bekim.” Long belo Elaija i kirap tok bilas long ol, na i tok Bal i mas bisi na em i no harim, o em i go toilet, o em i slip na wanpela i mas kirapim em. Elaija i kirapim ol dispela profet giaman: “Yupela i mas singaut strong moa.” Tru tumas, em i lukim olsem pasin bilong lotu long Bal i longlong pasin, na em i laik bai ol manmeri bilong God i mas luksave long pasin giaman bilong dispela lotu.​—1 Kin. 18:26, 27.

15. Olsem wanem samting i kamap long ol pris bilong Bal i soim olsem em i longlong pasin long makim narapela bosman na i no Jehova?

¹⁵ Olsem na ol pris bilong Bal i go wail na “singaut bikmaus na bihainim kastam bilong lotu na katim ol yet wantaim ol sotpela bainat na ol spia. Ol i mekim olsem i go inap long blut bilong ol i kapsait nabaut long skin bilong ol.” Tasol dispela i no helpim ol! “I no gat nek i kamap na i no gat bekim; na i no gat man i putim yau.” (1 Kin. 18:28, 29) Tru tumas, i no gat Bal. Em wanpela god giaman em Satan i bin kamapim bilong pulim ol man long lusim Jehova. Tok i tru em olsem, man i makim narapela bosman na i no makim Jehova, em bai kisim bikpela bel hevi na sem.​—Ritim Buk Song 25:3; 115:4-8.

16. (a) Elaija i stretim alta bilong Jehova long Maunten Karmel na ating dispela i kirapim ol man long tingim wanem? (b) Elaija i mekim wanem samting moa bilong soim olsem em i bilip long God bilong em?

¹⁶ Long apinun tru, em taim bilong Elaija long ofaim wanpela sakrifais. Em i stretim wanpela alta bilong Jehova, ating ol birua bilong lotu i klin i bin brukim. Em i yusim 12-pela ston, ating em i laik  kirapim planti manmeri long 10-pela traib bilong Israel long tingim olsem ol i stap yet aninit long Lo em God i bin givim long olgeta 12-pela traib. Orait nau em i putim sakrifais bilong em na kapsaitim wara long olgeta samting, ating em i kisim dispela wara long Solwara Mediterenian i stap klostu. Em i digim tu wanpela baret i raunim alta, na pulimapim wara long en. Em i bin larim ol profet bilong Bal i mekim olgeta samting na bai Bal i ken kukim sakrifais bilong ol, tasol em i kapsaitim wara na i hatwok long Jehova i kukim sakrifais bilong em—em i mekim olsem bikos em i bilip tru long God bilong em.​—1 Kin. 18:30-35.

17. Olsem wanem beten bilong Elaija i kamapim klia ol samting i bikpela samting long em? Hau bai yumi bihainim eksampel bilong em long beten bilong yumi?

¹⁷ Taim olgeta samting i redi, Elaija i mekim prea. Em i sotpela prea, tasol i kamapim klia ol samting i bikpela samting long Elaija. Namba 1 bikpela samting, em i laik bai ol i mas save olsem Jehova, em “God long Israel,” na i no Bal. Namba 2, em i laik olgeta i mas save olsem em i wokman tasol bilong Jehova; olgeta glori na biknem i mas go long God. Las tru, em i kamapim olsem em i tingim yet ol manmeri bilong em, long wanem, em i laik lukim Jehova i “tanim bel bilong ol i kam bek.” (1 Kin. 18:36, 37) Maski ol i lusim bilip na dispela i kamapim planti hevi, Elaija i laikim yet ol. Olsem wanem? Long ol beten bilong yumi long God, yumi soim olsem yumi gat ol dispela pasin, pasin daun, tingim nem bilong God, na sori long ol narapela husat i nidim helpim?

18, 19. (a) Jehova i mekim wanem bilong bekim beten bilong Elaija? (b) Elaija i tokim ol manmeri long mekim wanem? Bilong wanem God i no ken marimari long ol pris bilong Bal?

¹⁸ Paslain long Elaija i mekim beten, ating dispela bikpela lain i laik save, ating Jehova bai no inap mekim wanpela samting olsem giaman god Bal. Tasol taim em i beten pinis, i no gat taim bilong tingting planti. Baibel i tok: “Orait paia bilong Jehova i kam daun na i pinisim tru dispela ofa bilong paia i kukim olgeta, na ol paiawut, na ol ston, na das, na paia i draim tu wara long baret.” (1 Kin. 18:38) Man! Em i narapela kain bekim tru, a? Na ol manmeri i mekim wanem?

¹⁹ Olgeta i singaut na tok: “Jehova em i God tru! Jehova em i God tru!” (1 Kin. 18:39) Nau ol i luksave husat em i God tru. Tasol ol i no bin kamapim yet bilip bilong ol. Tru tumas, taim ol i lukim paia i kam daun long heven bihain long Elaija i beten pinis na ol i tokaut olsem Jehova em i God tru, dispela i no kamapim olsem ol i gat bilip.  Olsem na Elaija i tokim ol long mekim narapela samting moa. Em i tokim ol long mekim samting ol inap mekim planti yia i go pinis—bihainim Lo Bilong Jehova. Lo Bilong God i tok ol i mas kilim i dai ol profet giaman na ol man i lotuim ol narapela god. (Lo 13:5-9) Ol dispela pris bilong Bal i mekim ol yet i kamap birua bilong Jehova God, na long laik bilong ol yet ol i sakim samting Jehova i tingting pinis long mekim. Yu ting God i mas marimari long ol? Ol dispela pris i no bin marimari long ol pikinini i no gat asua na kukim ol olsem ol sakrifais long Bal taim ol i stap laip yet, olsem na i no gat risen na God i ken marimari long ol, a? (Ritim Provep 21:13; Jer. 19:5) I no gat risen na God i mas marimari long ol. Olsem na Elaija i tok long ol i mas kilim ol i dai, na ol i mekim olsem.​—1 Kin. 18:40.

20. Wai na tok bilong ol saveman bilong nau long Elaija i bin kilim i dai ol pris bilong Bal i no gat as bilong en?

²⁰ Sampela saveman bilong nau i agensim samting i bin kamap long Maunten Karmel. Sampela i tingting planti, nogut ol man i strong long lotu i yusim dispela olsem eskius na ting i stret long pait na bagarapim ol man bilong ol narapela lotu em ol i no orait long ol. Na tru tumas, long nau i gat planti man i strong tumas long lotu bilong ol na ol i redi long pait na bagarapim narapela. Tasol Elaija i no kain man olsem. Em i bihainim laik bilong Jehova long kilim i dai ol dispela man. Na tu, ol Kristen tru i save olsem ol i no ken bihainim pasin bilong Elaija long kisim bainat na kilim i dai ol man nogut. Tasol ol i bihainim pasin bilong olgeta disaipel bilong Jisas, olsem tok Krais i mekim long Pita, olsem: “Putim bainat bilong yu i go bek long ples bilong en, long wanem, ol man i yusim bainat, ol bai dai long rot bilong bainat.” (Mat. 26:52) Jehova bai yusim Pikinini bilong em long kamapim stretpela kot bilong God long bihain.

21. Olsem wanem eksampel bilong Elaija i stret long ol Kristen long nau?

²¹ Kristen tru i mas mekim ol samting bilong soim olsem em i gat bilip. (Jon 3:16) Wanpela rot em long bihainim pasin bilong ol bilipman olsem Elaija. Em i lotuim Jehova wanpela tasol na em i kirapim ol narapela long mekim olsem. Em i strongim bel na kamapim klia olsem Satan i yusim lotu giaman bilong pulim ol man i go longwe long Jehova. Na em i trastim Jehova long stretim ol samting, em i no bilip long save na laik bilong em yet. Tru tumas, Elaija i sambai long lotu i klin. Yumi olgeta i ken bihainim bilip bilong em!