1, 2. Wanem samting i kamap na Samuel i toktok long manmeri bilong Israel? Bilong wanem em i mas kirapim ol long tanim bel?

 SAMUEL i lukluk long pes bilong ol manmeri bilong em. Dispela gutpela man i mekim wok profet na jas inap planti yia, em i tokim lain Israel long bung long taun Gilgal. Em mun Me o Jun long kalenda bilong yumi; i no gat ren inap longpela taim pinis. Ol gaden long dispela hap i braun, na ol wit i redi pinis bilong kisim. Ol manmeri i no toktok. Olsem wanem tok bilong Samuel i ken kirapim bel bilong ol?

² Ol manmeri i no kliagut olsem samting ol i mekim inap kamapim bikpela hevi. Ol i strong olsem wanpela man i mas i stap king na bosim ol. Ol i no luksave olsem pasin ol i mekim i no soim rispek long God bilong ol, Jehova, na profet bilong em. Pasin ol i mekim i soim olsem ol i sakim Jehova olsem King bilong ol! Olsem wanem Samuel inap kirapim ol long tanim bel?

3, 4. (a) Bilong wanem Samuel i stori long taim em i yangpela? (b) Wai na eksampel bilong Samuel long bilip inap helpim yumi long nau?

³ Samuel i tokim ol manmeri: “Mi lapun pinis na gras bilong mi i waitpela.” Em i gat waitpela gras olsem na tok bilong em i gat strong. Em i tok moa: “Mi bin stiaim yupela kirap long taim mi yangpela yet i kam inap nau.” (1 Sml. 11:14, 15; 12:2) Maski Samuel i lapun pinis, em i no lusim tingting long taim em i yangpela man. Em i tingim yet ol samting i bin painim em long dispela taim. Ol disisen em i mekim taim em i liklik mangi, i mekim na em i gat pasin bilong bilip na stap gut long God bilong em, Jehova.

⁴ Olgeta taim Samuel i mas strongim na holimpas bilip, long wanem, em i stap namel long ol man husat i no gat bilip na ol i no stap gut long God. Long nau tu, i hatwok long strongim bilip bikos yumi  stap namel long ol man i no bilip na i bihainim pasin nogut. (Ritim Luk 18:8.) Orait nau yumi ken skelim wanem skul yumi inap kisim long eksampel bilong Samuel, kirap long taim em i liklik mangi yet.

5, 6. Hau na laip bilong Samuel olsem liklik mangi i narapela kain? Wai na papamama bilong em i save olsem ol bai lukautim em gut?

⁵ Laip bilong Samuel olsem liklik mangi i narapela kain. Bihain liklik long em i lusim susu, ating long taim em i gat 3-pela krismas samting, em i kirap mekim wok long haus lotu sel bilong Jehova long Silo, dispela ples i winim 32 kilomita longwe long ples bilong em, Rama. Papamama bilong em, Elkana na Hana, i givim pikinini bilong ol long Jehova long mekim wanpela spesel wok, long laip olgeta em i stap olsem Nasarait. a Yu ting dispela i makim olsem papamama i no laikim Samuel na i rausim em?

⁶ Nogat tru! Ol i save olsem i gat lain bai lukautim gut pikinini man bilong ol long Silo. Hetpris Eli i go pas long lukautim dispela wok, long wanem, Samuel i wok wantaim em. Na tu, i gat sampela meri i save mekim wok long narapela narapela hap bilong haus lotu sel.​—Kis. 38:8; Het. 11:34-40.

7, 8. (a) Long olgeta yia, olsem wanem papamama bilong Samuel i givim gutpela tok bilong strongim em? (b) Ol papamama long nau inap kisim wanem skul long papamama bilong Samuel?

⁷ Hana na Elkana i no lusim tingting long fes bon bilong ol, em pikinini ol i kisim olsem bekim bilong wanpela beten. Hana i bin askim God long wanpela pikinini man, na em i tok promis olsem em bai givim dispela pikinini long God bilong mekim wok bilong Em long laip olgeta. Long olgeta yia taim Hana i go lukim Samuel, em i save bringim nupela longpela siot i no gat han we em i bin wokim na bai Samuel i ken werim na mekim wok long haus lotu sel. Yumi save, liklik mangi i amamas long papamama i kam lukim em. Samuel i wok long kamap strong bikos papamama i givim ol gutpela tok bilong strongim na stiaim em taim ol i skulim em olsem em i gutpela samting long mekim wok bilong Jehova long dispela gutpela ples.

⁸ Ol papamama long nau inap kisim gutpela skul long pasin bilong Hana na Elkana. Planti taim ol papamama i tingim ol samting bilong skin ol pikinini i mas kisim, na ol i no tingim ol samting bilong helpim ol long pas gut wantaim Jehova. Tasol papamama bilong Samuel i putim pasin pren bilong ol wantaim Jehova i stap namba wan, na dispela i helpim tru Samuel taim em i kamap bikpela man.​—Ritim Provep 22:6.

9, 10. (a) Stori long haus lotu sel na tingting bilong liklik Samuel long dispela ples. (Lukim tu futnot.) (b) Wanem sampela wok Samuel i mekim? Hau bai ol yangpela long nau inap bihainim eksampel bilong em?

 ⁹ Yumi ken piksaim long tingting dispela liklik mangi i wok long go bikpela na i raun lukim ol liklik maunten long Silo. Taim em i lukluk i go daun long taun na veli long hapsait bilong taun, em i lukim haus lotu sel bilong Jehova na em i amamas tru. Dispela haus lotu sel em i wanpela ples i holi tru. b Ol i wokim dispela haus klostu 400 yia i go pinis na Moses yet i lukautim dispela wok. Em i wanpela ples tasol bilong mekim lotu i klin long Jehova.

¹⁰ Liklik Samuel i laikim tru haus lotu sel. Long stori em i raitim long bihain, Baibel i tok: “Samuel i mekim wok bilong Jehova maski em i liklik mangi tasol. Em i save werim wanpela laplap ifot.” (1 Sml. 2:18) Dispela longpela siot i no gat han i makim olsem Samuel i save helpim ol pris long haus lotu sel. Maski Samuel i no bilong lain pris, em i mekim sampela wok olsem opim dua bilong ples bung bilong haus lotu sel long moningtaim na helpim lapun Eli. Em i laikim tru dispela wok, tasol bihain em i bel hevi. Sampela samting nogut i wok long kamap long haus bilong Jehova.

11, 12. (a) Hopni na Finias i mekim wanem bikpela rong? (b) Hopni na Finias i mekim wanem pasin nogut na pasin korapsen long haus lotu sel? (Lukim tu futnot.)

¹¹ Taim Samuel i liklik yet, em i lukim ol pasin nogut na korapsen. Eli i gat tupela pikinini man, nem bilong ol Hopni na Finias. Samuel i tok: “Tupela pikinini man bilong Eli, tupela i man nogut; tupela i no save rispek long Jehova.” (1 Sml. 2:12) Tupela tok long dispela ves i poroman wantaim. Tru tumas, Hopni na Finias “i man nogut” bikos ol i no tingim Jehova. Ol i sakim ol stretpela lo na tok bilong em. Dispela em i as bilong olgeta narapela sin ol i bin mekim.

¹² Lo Bilong God i kolim stret ol wok na pasin ol pris i mas bihainim taim ol i ofaim ol sakrifais long haus lotu sel. I gat gutpela risen na Lo i tok olsem. Ol dispela sakrifais i makim ol samting God i mekim bilong lusim sin bambai ol man i ken stap klin long ai bilong em, na ol inap kisim ol blesing na em i ken stiaim ol. Tasol pasin  bilong Hopni na Finias i kirapim ol narapela pris na ol tu i no rispek long ol dispela ofa. c

13, 14. (a) Olsem wanem ol gutpela man i karim hevi long pasin nogut i kamap long haus lotu sel? (b) Olsem wanem Eli i no mekim gut wok olsem papa na hetpris?

¹³ Piksaim long tingting, liklik Samuel i wok long lukluk, em i kirap nogut olsem ol i larim ol pasin nogut i stap na ol i no stretim. Em i lukim planti man—ol rabisman, man i gat pasin daun, ol man em ol narapela i mekim nogut long ol—ol i kam long dispela haus lotu sel bilong kisim ol tok bilong mekim isi bel na strongim ol, tasol ol dispela pris i mekim nogut long ol na daunim ol. Na Samuel i pilim olsem wanem taim em i kisim save olsem Hopni na Finias i no bihainim ol lo bilong Jehova long maritpasin, na ol i slip wantaim ol meri i save mekim wok long haus lotu sel? (1 Sml. 2:22) Ating em i lukluk long Eli bilong stretim dispela hevi.

¹⁴ Eli i gat namba long stretim dispela hevi we i go bikpela. Olsem hetpris, em i gat wok long lukautim na stretim ol samting i kamap long haus lotu sel. Na olsem papa, em i gat wok long stretim ol pikinini man bilong em. Pasin bilong tupela i givim hevi long ol yet, na tu, planti narapela manmeri long kantri. Tasol Eli i no mekim gut wok olsem papa na hetpris. Em i stretim ol pikinini bilong em, tasol em i no strong long mekim olsem. (Ritim 1 Samuel 2:23-25.) Ol pikinini bilong em i mas kisim strongpela tok bilong stretim ol. Ol i mekim ol bikpela rong we i stret long ol i mas dai!

15. Jehova i salim wanem strongpela tok lukaut i go long Eli? Famili bilong Eli i mekim wanem long dispela tok lukaut?

¹⁵ Ol pasin nogut i go bikpela moa, olsem na Jehova i salim “wanpela profet bilong God,” Baibel i no kolim nem bilong em, i go long Eli long givim strongpela tok bilong kot long em. Jehova i tokim Eli: “Yu wok long givim bikpela ona long tupela pikinini man bilong yu winim mi.” Olsem na God i tok profet olsem tupela pikinini nogut bilong Eli bai dai long seim de na famili bilong em bai kisim bikpela hevi, na tu, ol bai i no gat namba moa insait long lain pris. Yu ting dispela strongpela tok lukaut i mekim na famili i senisim pasin bilong ol? Baibel i no stori olsem ol i senisim pasin bilong ol.​—1 Sml. 2:27–3:1.

16. (a) Wanem ol gutpela samting i kamap long liklik Samuel? (b) Olsem wanem? Ol samting yu ritim i strongim yu? Stori long dispela.

¹⁶ Ol dispela pasin korapsen i mekim wanem long liklik Samuel? Dispela stori i kamapim ol samting nogut, tasol yumi amamas tu long  ritim ol gutpela nius long taim Samuel i wok long i go bikpela na mekim gut wok. Long 1 Samuel 2:18, yumi ritim olsem Samuel i stap gut na “mekim wok bilong Jehova maski em i liklik mangi tasol.” Kirap long taim em i liklik yet, Samuel i putim wok bilong God i stap olsem nambawan samting long laip bilong em. Long ves 21 bilong seim sapta, yumi ritim wanpela gutpela tok moa: “Liklik mangi Samuel i wok long kamap bikpela na i mekim wok bilong Jehova.” Taim em i wok long i go bikpela, pasin bilong em long pas gut wantaim Papa bilong em long heven i wok long kamap strong moa. Pasin bilong pas gut wantaim Jehova em nambawan rot bilong sakim olgeta kain pasin korapsen.

17, 18. (a) Hau ol yangpela Kristen inap bihainim eksampel bilong Samuel taim ol i feisim pasin korapsen? (b) Wanem samting i soim olsem Samuel i bihainim stretpela rot?

¹⁷ Ating em i isi long Samuel long kisim tingting olsem sapos hetpris na ol pikinini man bilong em i mekim sin, orait em tu i ken mekim samting em i laik mekim. Tasol pasin korapsen bilong ol narapela, na tu, ol man i gat namba, i no ken stap olsem wanpela eskius bilong mekim sin. Long nau, planti yangpela Kristen i bihainim pasin bilong Samuel na ol i “kamap bikpela na i mekim wok bilong Jehova”—maski ol i stap namel long ol man i no gutpela eksampel.

¹⁸ Rot Samuel i bihainim i kamapim wanem gutpela samting? Baibel i tok: “Long dispela taim, liklik mangi Samuel i wok long kamap bikpela na Jehova na ol manmeri tu i laikim em moa yet.” (1 Sml. 2:26) Olsem na ol man i laikim Samuel, em ol man tingting bilong ol i bikpela samting long em. Jehova i tingim tru gutpela pasin bilong dispela liklik mangi long stap gut long Em. Na Samuel i save olsem God bilong em bai givim strafe long ol man i mekim pasin nogut long Silo,  tasol ating em i laik save God bai mekim long wanem taim. Wanpela nait, em i kisim bekim bilong dispela askim.

19, 20. (a) Stori long samting i kamap long Samuel long wanpela nait long haus lotu sel. (b) Hau Samuel i save long man i mekim dispela tok? Em i mekim wanem pasin long Eli?

¹⁹ Klostu tulait i laik bruk, tasol ples i tudak yet; ol bikpela lam bilong haus lotu sel i lait yet i stap. Taim ples i no gat nois, Samuel i harim wanpela nek i kolim nem bilong em. Em i ting em nek bilong Eli, nau em i lapun tru na klostu em i aipas. Samuel i kirap na “ran i go” long dispela lapun man. Yu inap piksaim long tingting dispela liklik mangi i no gat su long lek na em i hariap i go long lukim Eli sapos em i nidim wanpela samting? Yumi pilim tru olsem Samuel i mekim gutpela pasin long Eli, na i soim rispek long em. Maski Eli i mekim sin, em i stap yet olsem hetpris bilong Jehova.​—1 Sml. 3:2-5.

²⁰ Samuel i kirapim Eli na tok: “Mi harim yu singautim mi, olsem na mi kam.” Tasol Eli i tok em i no bin singautim em na salim em i go bek long slip. Wankain samting i kamap gen namba tu taim, na long namba tri taim! Orait nau Eli i luksave long samting i kamap. Wan wan taim tasol Jehova i givim driman o tok profet long ol manmeri bilong em, na yumi luksave long risen na em i mekim olsem. Eli i save olsem Jehova i toktok gen—nau em i toktok long dispela mangi! Eli i tokim Samuel long go bek long slip na tokim em long wanem tok em i mas bekim. Samuel i bihainim tok. I no longtaim em i harim nek i singaut: “Samuel, Samuel!” Na mangi i bekim tok: “Yu ken tokim mi, mi wokman bilong yu na mi putim yau long tok bilong yu.”​—1 Sml. 3:1, 5-10.

21. Olsem wanem yumi inap harim tok bilong Jehova long nau? Bilong wanem em i bikpela samting long mekim olsem?

²¹ Nau Jehova i gat wanpela wokman long Silo husat i putim yau long tok bilong em. Long laip olgeta bilong Samuel, em i save putim yau long tok bilong Jehova. Yu tu i save mekim olsem? Yumi no gat wok long wetim wanpela nek i kamap long nait na toktok long yumi. Long nau, i olsem yumi save harim nek bilong God long olgeta taim. Ol tok bilong em i stap long Baibel. Taim yumi putim gut yau long tok bilong God na bihainim, bilip bilong yumi bai wok long kamap strong. Samuel i bin mekim olsem.

22, 23. (a) Hau dispela tok em pastaim Samuel i pret long autim i kamap tru? (b) Olsem wanem gutnem bilong Samuel i wok long go bikpela?

²² Samting i kamap long dispela nait long Silo i bikpela samting tru long laip bilong Samuel, bikos long dispela taim em i kirap long pas gut tru wantaim Jehova, em i kamap profet na mausman bilong God. Pastaim mangi i pret long givim tok bilong Jehova long Eli, long wanem, em laspela tok profet we Jehova i mekim long ol samting nogut bai painim famili bilong Eli, em ol samting klostu nau bai kamap. Tasol Samuel i strongim bel—na long pasin daun Eli i orait long kot bilong  Jehova. I no longtaim na olgeta samting Jehova i tok long en i kamap tru: Israel i pait wantaim ol Filistia, na long wanpela de tasol ol i kilim i dai Hopni na Finias, na taim Eli i kisim save olsem ol birua i kisim Bokis Kontrak bilong Jehova, em tu i dai.​—1 Sml. 3:10-18; 4:1-18.

²³ Tasol gutnem bilong Samuel olsem wanpela gutpela profet i go bikpela. Baibel i tok: “Jehova i stap wantaim em,” na i save truim olgeta tok profet bilong Samuel.​—Ritim 1 Samuel 3:19.

24. Bihain ol Israel i mekim wanem disisen? Bilong wanem dispela i bikpela sin tru?

²⁴ Yu ting ol Israel i bihainim eksampel bilong Samuel na kamap ol manmeri i stap gut long God? Nogat. Bihain, ol i tokaut olsem ol i no laik bai wanpela profet i stap jas bilong ol. Ol i laik stap olsem ol narapela lain na wanpela man bilong graun bai stap king bilong ol. Jehova i tokim Samuel long bihainim tok bilong ol. Tasol em i mas tokim lain Israel olsem ol i mekim bikpela sin tru. Ol i no sakim tasol wanpela man, nogat, ol i sakim Jehova yet! Olsem na em i tokim ol manmeri long kam bung long Gilgal.

25, 26. Long Gilgal, olsem wanem lapun Samuel i helpim ol manmeri bilong em long luksave olsem ol i mekim bikpela sin tru long Jehova?

²⁵ Nau yumi ken skelim ol tok em i mekim long lain Israel long Gilgal. Long dispela hap, lapun Samuel i kirapim ol Israel long tingim pasin bilong em long stap gut long God. Orait Baibel i tok: “Samuel i beten long Jehova.” Em i askim Jehova long mekim tanda na bikpela ren i kam daun.​—1 Sml. 12:17, 18.

²⁶ Man! Tanda na bikpela ren long taim bilong san? Kain samting i no bin kamap bipo! Sapos ol man i no bilip o ol i bin toktok planti, nau toktok bilong ol i pinis. Wantu ol klaut i mekim na skai i tudak. Win i strong na krungutim wit long ol gaden. Tanda i pairap strong tru, na mekim bikpela nois. Na ren i pundaun. Orait ol man i mekim wanem? “Ol manmeri i lukim na ol i pret nogut tru long Jehova na long Samuel.” Nau ol i luksave olsem ol i mekim bikpela sin tru.​—1 Sml. 12:18, 19.

27. Jehova i pilim olsem wanem long ol man husat i bihainim bilip bilong Samuel?

²⁷ Ol samting God bilong Samuel, Jehova, i mekim i sutim tru bel bilong ol, na i no tok Samuel i mekim. Long taim Samuel i yangpela na i go inap long taim em i lapun, em i bilip strong long God. Na Jehova i mekim gut long em. I kam inap long nau, Jehova i no senis. Em i sambai yet long ol manmeri i bihainim bilip bilong Samuel.