AIYO! I luk olsem bikpela hevi i laik painim Daniel. Tasol ol laion i no bagarapim em! Yu save bilong wanem ol i no bagarapim em? Husat i putim em wantaim ol dispela laion? Orait, nau yumi ken stori long dispela.

Long dispela taim Darius em i king bilong Babilon. Em i laikim tru Daniel, long wanem, Daniel i save mekim gutpela pasin tru na em i gat gutpela tingting na save. Darius i makim Daniel i stap nambawan long gavman bilong em. Olsem na ol arapela bikman i jeles long Daniel.

Ol i go long Darius na ol i tok: ‘Mipela i pasim tok pinis long yu mas putim wanpela lo olsem, inap 30 de ol man i no ken beten long wanpela god o wanpela man, nogat, ol i mas beten long yu tasol. Sapos wanpela man i sakim dispela lo, orait yu mas tromoi em i go daun long hul bilong ol laion.’ Darius i no save long as na ol i laik bai em i putim dispela lo. Tasol em i ting dispela i gutpela tingting, olsem na em i putim dispela lo. Na ol i no inap senisim dispela lo.

Taim Daniel i save long dispela lo, em i go long haus na em i beten, olsem em i save mekim long olgeta taim. Ol dispela man nogut i save olsem Daniel i no inap lusim pasin bilong beten long Jehova. Ol i amamas, long wanem, i luk olsem dispela tingting bilong ol long bagarapim Daniel i wok gut.

Taim King Darius i save long as tru bilong dispela lo, em i bel hevi tru. Tasol em i no inap senisim dispela lo, olsem na em i givim tok olsem ol i mas tromoi Daniel i go long hul bilong ol laion. Tasol king i tokim Daniel: ‘Mi laik bai God bilong yu, em yu save lotuim, em i ken helpim yu.’

Darius i bel hevi tru na em i no inap slip. Long moningtaim tru em i kirap na wokabaut hariap i go long hul bilong ol laion. Yu inap lukim em long dispela piksa. Em i singaut olsem: ‘Daniel, yu wokman bilong God i gat laip! Dispela God yu save lotuim em i bin helpim yu o nogat?’

Daniel i bekim tok olsem: ‘God i bin salim ensel bilong em i kam pasim maus bilong ol laion na ol i no bagarapim mi.’

King i amamas tru. Em i tok na ol i pulim Daniel i kam antap. Orait nau em i tok na ol i kisim ol man nogut i laik bagarapim Daniel, na ol i tromoi ol long hul bilong ol laion. Ol i no pundaun yet long graun na ol laion i kalap na holimpas ol na brukim olgeta bun bilong ol.

Bihain Darius i tokim olgeta man long lain bilong em: ‘Mi putim dispela tok olsem olgeta man i mas daun long God bilong Daniel. Em i save wokim ol strongpela mirakel. Em i helpim Daniel na ol laion i no bagarapim em.’