Yu lukim dispela liklik gel long piksa?— Em i pikinini gel bilong wanpela man nem bilong em Jepta. Baibel i no kolim nem bilong em, tasol yumi save olsem em i bin mekim papa bilong em na Jehova i amamas tru. Yumi ken kisim save long em na papa bilong em Jepta.

Jepta em i gutpela man na em i save lusim planti haptaim bilong skulim pikinini gel bilong em long Jehova. Na tu, em i wanpela strongpela man na gutpela lida. Olsem na lain Israel i askim em long lidim ol i go pait long ol birua bilong ol.

Jepta i beten long God long helpim em winim pait. Jepta i promis olsem sapos em i winim pait, taim em i kam bek, fes man o meri i kam ausait long haus na bungim em, em bai givim em long Jehova. Dispela man o meri bai stap na wok  long haus lotu sel bilong God long laip olgeta bilong em. Haus lotu sel em ples we ol manmeri i save go long en long lotuim God long dispela taim. Jepta i winim pait! Taim em i kam bek long haus, yu save husat i fes long kam ausait long haus na bungim em?—

Yes, em pikinini meri bilong Jepta! Jepta i gat wanpela pikinini tasol na nau em i mas salim em i go. Dispela i mekim em i bel hevi tru. Tasol tingim, em i bin mekim wanpela promis. Orait, pikinini meri bilong em i tok, ‘Papa, yu mekim promis long Jehova so yu mas truim dispela tok promis bilong yu.’

Pikinini meri bilong Jepta tu i bel hevi. Long haus lotu sel, em bai i no inap marit na kamapim pikinini. Tasol em i gat laik tru long bihainim promis bilong papa bilong em na mekim Jehova i amamas. Dispela em i bikpela samting moa long em. So em i lusim haus bilong em na em i go stap long haus lotu sel long laip olgeta bilong em.

Yu ting disisen bilong em i mekim papa bilong em na Jehova i amamas?— Yes, papa bilong em na Jehova i amamas! Yu ken bihainim pasin bilong pikinini meri bilong Jepta, em i laikim Jehova na bihainim tok bilong em. Taim yu mekim olsem, papamama bilong yu na Jehova bai amamas tru long yu.