Kisim Bek 39:1-43
39 Ol i kisim blupela tret, pepol wul, retpela tret*+ na ol i wokim ol gutpela klos em ol i samapim gut bilong mekim wok long ples holi. Na ol i wokim ol klos holi bilong Aron+ olsem Jehova i bin tokim Moses.
2 Em* i kisim tret gol, blupela tret, pepol wul, retpela tret, na gutpela tret linen, na wokim ifot.*+
3 Ol i paitim gol long hama na i kamap flet na ol i katim liklik liklik tru i kamap olsem tret na ol i bilasim long ifot em ol i bin wokim long blupela tret, pepol wul, retpela tret, na gutpela linen.
4 Na ol i wokim 2-pela liklik hap laplap bilong ifot em ol i samapim long 2-pela solda bilong joinim 2-pela laplap wantaim.
5 Ol i yusim ol wankain samting olsem bilong ifot na wokim belt bilong pasim ifot na bai em i stap stret long ples bilong en.+ Ol i kisim tret gol, blupela tret, pepol wul, retpela tret, na gutpela tret linen, na ol i wokim belt olsem Jehova i bin tokim Moses long en.
6 Na ol i putim 2-pela ston oniks* insait long ol bilas gol, na ol i katim nem bilong ol pikinini man bilong Israel antap long ol ston olsem ol i save katim ol tok o piksa long ol ston samting.+
7 Na em i pasim dispela 2-pela ston antap long 2-pela liklik hap laplap long solda bilong ifot na bai God i lukim na tingim ol Israel,+ olsem Jehova i bin tokim Moses.
8 Na em i wokim liklik laplap bilong pasim long bros.+ Em i mekim wok long ol wankain samting olsem ol i bin yusim bilong wokim ifot. Em i yusim tret gol, blupela tret, pepol wul, retpela tret, na gutpela tret linen+ bilong bilasim dispela liklik laplap.
9 Taim ol i foldim dispela laplap, em i kamap skwe. Ol i wokim dispela liklik laplap na taim ol i foldim, longpela bilong en inap 1-pela span* na bikpela bilong en inap 1-pela span.
10 Na ol i pasim 4-pela lain ston long dispela laplap. Long namba 1 lain ol i pasim ston rubi, ston topas, na ston emeral.
11 Na long namba 2 lain ol i pasim ston tekois, ston sapaia, na ston jaspa.
12 Na long namba 3 lain ol i pasim ston lesem,* ston aget, na ston ametis.
13 Na long namba 4 lain ol i pasim ston krisolait, ston oniks, na ston jeid. Ol i pasim ol wan wan ston long liklik bilas gol na bihain ol i pasim ol ston long laplap.
14 Olgeta dispela ston i makim nem bilong wan wan bilong 12-pela pikinini man bilong Israel. Ol i katim nem bilong ol wan wan long ol dispela ston, wankain olsem ol i save katim mak bilong ol man antap long ring samting. Wan wan nem long ston i makim 12-pela traib.
15 Na ol i kisim gutpela gol+ na twistim i kamap olsem sen. Na dispela sen i stap long dispela liklik laplap bilong bros.
16 Na ol i wokim 2-pela bilas gol na 2-pela ring gol. Na ol i putim dispela 2-pela ring long 2-pela kona bilong liklik laplap bilong bros.
17 Na bihain ol i putim 2-pela sen gol i go insait long 2-pela ring gol i stap long 2-pela kona bilong liklik laplap bilong bros.
18 Na ol i putim 2-pela narapela hap bilong dispela 2-pela sen i go insait long 2-pela bilas gol, na ol i pasim ol antap long 2-pela liklik hap laplap long solda bilong ifot long fran bilong en.
19 Na bihain ol i wokim 2-pela ring gol na pasim ol long 2-pela kona long baksait bilong liklik laplap bilong bros. Dispela 2-pela ring i stap baksait na feisim ifot.+
20 Na ol i wokim 2-pela moa ring gol na putim ol long fran bilong ifot. Dispela 2-pela ring i stap daunbilo long 2-pela liklik hap laplap long solda, klostu long hap we em i join wantaim, antap liklik long belt we i pas wantaim ifot.
21 Na ol i pasim blupela rop long ol ring bilong liklik laplap bilong bros i go long ol ring bilong ifot. Na dispela i holim liklik laplap bilong bros na bai em i stap long ples bilong en long ifot, antap long belt. Ol i mekim ol dispela samting olsem Jehova i bin tokim Moses.
22 Na bihain em i kisim blupela tret+ tasol na wivim wantaim na wokim wanpela longpela siot i no gat han, bilong werim aninit long ifot.
23 Na hul bilong putim het i stap namel long dispela siot, wankain olsem hul bilong klos pait. Ol i wivim arere bilong hul bilong siot na bai siot i no ken bruk.
24 Na long arere long daunbilo bilong siot ol i tanim blupela tret, pepol wul, na retpela tret na wokim ol pomigranet.*
25 Na ol i kisim gutpela gol na wokim ol belo na ol i putim ol belo namel long ol pomigranet raunim arere bilong daunbilo bilong siot,
26 olsem wanpela belo na wanpela pomigranet, na wanpela belo na wanpela pomigranet. Ol i mekim olsem raunim arere bilong dispela siot bilong mekim wok pris. Ol i mekim ol dispela samting olsem Jehova i bin tokim Moses.
27 Na ol i wivim gutpela tret linen na wokim ol longpela klos bilong Aron na ol pikinini man bilong em,+
28 na ol i kisim gutpela linen na wokim wanpela spesel laplap bilong raunim long het,+ na laplap bilong raunim long het olsem bilas,+ na ol sotpela trausis+ ol i wokim tu long gutpela tret linen.
29 Na ol i wokim belt long gutpela tret linen, blupela tret, pepol wul, na retpela tret olsem Jehova i bin tokim Moses.
30 Orait ol i kisim gutpela gol na wokim wanpela medal holi* na ol i katim tok antap long dispela medal olsem man i save katim tok long ol ston samting. Ol i katim dispela tok: “Pasin holi i bilong Jehova.”+
31 Na ol i kisim blupela tret na wokim rop bilong pasim dispela medal long laplap i raunim het, olsem Jehova i bin tokim Moses.
32 Olsem na ol i pinisim olgeta wok bilong haus lotu sel, em haus sel bilong bung. Ol Israel i mekim olgeta samting olsem Jehova i bin tokim Moses.+ Ol i bihainim olgeta tok.
33 Orait ol i bringim haus lotu sel+ i go long Moses. Ol i bringim haus sel+ wantaim olgeta samting bilong en: ol huk,+ ol panel freim,*+ ol longpela ba,+ ol pos na ol soket beis bilong en;+
34 karamap bilong haus sel ol i wokim long ol skin bilong sipsip man em ol i bin daim i kamap retpela,+ na karamap ol i wokim long ol skin bilong animal sil, na keten bilong haitim Bokis Kontrak;+
35 na Bokis Kontrak, ol longpela stik bilong en,+ na ai bilong Bokis Kontrak;+
36 na tebol wantaim olgeta samting bilong en+ na bret bilong putim i stap long ai bilong God;
37 lamsten em ol i wokim long gutpela gol, na ol lam bilong en+ i stap long lain, na olgeta samting bilong en,+ na oil bilong putim long ol lam;+
38 na alta+ ol i wokim long gol, oil holi,+ na paura bilong kamapim smok i gat gutpela smel,+ na laplap*+ bilong pasim long dua bilong haus sel;
39 alta ol i wokim long kopa,+ waia rek bilong alta ol i wokim long kopa, ol longpela stik bilong en,+ olgeta samting bilong alta,+ na dis na tebol bilong en;+
40 laplap bilong banis bilong ples bung, ol pos na ol soket beis bilong en,+ ol rop bilong en na ol longpela pin+ bilong taitim na strongim banis, na keten+ bilong dua bilong ples bung, na olgeta samting bilong mekim wok long haus lotu sel;
41 ol gutpela klos em ol i samapim gut bilong mekim wok long ples holi, em klos holi bilong pris Aron,+ na ol klos bilong ol pikinini man bilong em bilong mekim wok pris.
42 Ol Israel i mekim olgeta wok olsem Jehova i bin tokim Moses.+
43 Orait Moses i sekim olgeta samting ol i bin wokim na em i lukim olsem ol i wokim olgeta samting olsem Jehova i bin tok. Na Moses i blesim ol.
Ol Futnot
^ Ol i kisim kala bilong daim dispela tret long binatang ol i kolim kokes.
^ I luk olsem “em” long dispela ves na ves 7, 8, na 22 i makim Besalel.
^ Ol i no save em wanem kain ston i dia tumas, ating em ston amber, hyacinth, opal, o tourmaline.
^ Wanpela prut em kala bilong en i marun na i luk olsem apol.
^ Hib., “mak holi bilong dedikesen.” Dispela mak holi i soim olsem Aron i dediket long God.
^ O, “keten.”
