Kisim Bek 36:1-38
36 “Besalel bai wok wantaim Oholiap na olgeta man i gat save* long wok em Jehova i bin givim gutpela save na savetingting long ol na bai ol inap wokim olgeta samting bilong haus lotu sel olsem Jehova i bin tok long mekim.”+
2 Orait Moses i singautim Besalel na Oholiap na ol man i gat save long wok em Jehova i bin givim savetingting long ol,+ em ol man em bel bilong ol i kirapim ol long mekim wok+ long i kam.
3 Na Moses i givim ol dispela man olgeta kontribiusen+ em ol Israel i bin bringim i kam bilong wokim haus lotu sel. Na long olgeta moning ol manmeri i wok yet long bringim ol samting ol i laik givim olsem ofa.
4 Bihain long ol i kirapim wok holi, ol man em ol i gat save long wok, ol i wok long kam,
5 na tokim Moses olsem: “Ol manmeri i wok long bringim planti samting tumas i kam winim mak bilong ol samting bilong mekim wok em Jehova i tok long mekim.”
6 Olsem na Moses i salim tok i go long ol manmeri long kem olsem: “Yupela ol man na meri i no ken bringim moa ol samting bilong givim olsem kontribiusen bilong haus lotu sel.” Ol manmeri i harim dispela tok na ol i no bringim moa ol samting i kam.
7 Ol samting ol manmeri i bringim i kam em inap bilong mekim olgeta wok na planti samting moa i stap yet.
8 Orait olgeta man i gat save long wok,+ ol i wokim haus lotu sel+ long 10-pela laplap bilong sel em ol i wokim long gutpela tret linen, blupela tret, pepol wul na retpela tret.* Na em* i kisim tret na wokim piksa bilong ol serap antap long ol dispela laplap.+
9 Longpela bilong wan wan laplap em inap 28 kiubit* na bikpela bilong ol em inap 4-pela kiubit. Longpela na bikpela bilong olgeta laplap i wankain.
10 Orait em i samapim 5-pela laplap wantaim na ol i kamap wanpela laplap, na em i samapim arapela 5-pela laplap wantaim na ol i kamap wanpela laplap.
11 Na bihain em i wokim ol ring long blupela rop long arere bilong laspela laplap long hap we 2-pela laplap bai join wantaim. Em i mekim wankain samting long arere bilong laspela laplap long narapela sait, long hap we ol bai join wantaim.
12 Em i wokim 50 ring long arere bilong wanpela laplap na 50 ring long arere bilong narapela laplap long hap we 2-pela laplap bai join na bai ol ring i stap sait sait.
13 Na em i wokim 50 gol huk na joinim dispela 2-pela hap laplap wantaim na ol i kamap wanpela bikpela laplap.
14 Bihain em i wokim ol laplap long gras bilong meme bilong karamapim haus lotu sel. Em i wokim 11-pela bilong dispela laplap.+
15 Longpela bilong wan wan laplap em inap 30 kiubit na bikpela bilong ol inap 4-pela kiubit. Longpela na bikpela bilong olgeta dispela 11-pela laplap i wankain.
16 Bihain em i samapim 5-pela laplap wantaim na ol i kamap wanpela laplap, na em i samapim narapela 6-pela laplap wantaim na ol i kamap wanpela laplap.
17 Na em i wokim 50 ring long arere bilong namba 1 laplap. Em i wokim ol dispela ring long ples we ol bai join. Na em i wokim 50 ring long arere bilong namba 2 laplap long ples we ol bai join wantaim namba 1 laplap.
18 Na em i wokim 50 kopa huk bilong pasim 2-pela laplap wantaim na bai 2-pela i kamap wanpela bikpela laplap.
19 Em i wokim karamap bilong haus sel long skin bilong sipsip man em ol i bin daim i kamap retpela. Na antap long dispela em i wokim narapela karamap long skin bilong animal sil.+
20 Na em i kisim diwai akas+ na wokim ol panel freim* bilong haus lotu sel na em i sanapim ol.+
21 Olgeta wan wan panel freim i go antap inap 10-pela kiubit na bikpela bilong ol em inap 1 na hap kiubit.
22 Na long as bilong olgeta wan wan panel freim i gat 2-pela liklik lek* i stap sait sait long narapela narapela. Em i bihainim wankain pasin na wokim olgeta panel freim bilong haus lotu sel.
23 Na long hap saut bilong haus lotu sel em i wokim ol panel freim. Em i wokim 20 panel freim i feisim hap saut.
24 Na em i kisim silva na wokim 40 soket beis bilong i stap aninit long dispela 20 panel freim. Tupela liklik lek i stap long as bilong panel freim i mas i gat 2-pela soket beis+ long sanapim freim long en. Na ol arapela panel freim tu i mas wankain.
25 Na long narapela sait bilong haus lotu sel long hap not, em i wokim 20 panel freim,
26 na 40 silva soket beis bilong ol. Na em i putim 2-pela soket beis aninit long wanpela panel freim, na long ol arapela freim tu em i putim 2-pela soket beis.
27 Na em i wokim 6-pela panel freim+ long baksait bilong haus lotu sel long hap wes.
28 Em i wokim 2-pela panel freim bilong stap olsem pos bilong 2-pela kona long baksait bilong haus lotu sel.
29 Wan wan panel freim i gat 2-pela hap bilong en, kirap long daunbilo na i go antap. Dispela 2-pela hap i join long namba 1 ring long antap. Em i wokim olsem long 2-pela pos bilong kona.
30 Olsem na i gat 8-pela panel freim olgeta wantaim 16 silva soket beis bilong ol. Na tupela soket beis i stap aninit long olgeta wan wan panel freim.
31 Na em i kisim diwai akas na sapim ol i kamap longpela ba bilong holim ol panel freim wantaim. Em i wokim 5-pela longpela ba bilong ol panel freim long wanpela sait bilong haus lotu sel.+
32 Na em i wokim 5-pela longpela ba bilong ol panel freim long narapela sait bilong haus lotu sel na 5-pela longpela ba bilong ol panel freim long baksait bilong haus lotu sel long hap wes.
33 Na em i wokim longpela ba bilong holim ol panel freim long namel. Longpela bilong en i kirap long namba 1 panel freim i go inap long laspela panel freim.
34 Em i karamapim ol dispela panel freim long gol, na em i wokim ol ring bilong ol long gol. Ol dispela ring i bilong holim ol dispela ba. Na em i karamapim tu ol dispela ba long gol.+
35 Na em i wokim wanpela keten+ long blupela tret, pepol wul, retpela tret, na gutpela tret linen. Na em i yusim tret na samapim piksa bilong ol serap+ antap long dispela keten.+
36 Na em i kisim diwai akas na em i wokim 4-pela strongpela pos bilong keten na karamapim ol dispela pos long gol. Na em i wokim ol huk long gol na em i wokim 4-pela silva soket beis bilong ol.
37 Na em i wokim wanpela laplap bilong dua* bilong haus sel. Em i wivim+ blupela tret, pepol wul, retpela tret, na gutpela tret linen bilong wokim dispela laplap.
38 Na em i wokim 5-pela strongpela pos bilong dispela laplap na ol huk bilong ol. Na em i karamapim het bilong ol pos na ol samting bilong joinim* ol pos long gol. Tasol em i kisim kopa na wokim 5-pela soket beis bilong ol.
Ol Futnot
^ Hib., “olgeta man i gat save bilong bel.”
^ Ol i kisim kala bilong daim dispela tret long binatang ol i kolim kokes.
^ Em i klia olsem dispela em Besalel.
^ O ating, “ol longpela pos.”
^ O, “keten.”
^ O, “ol ring bilong joinim.”
