Jop 14:1-22
-
Jop i bekim tok i go moa (1-22)
14 “Stat long taim mama i karim man,Em i save stap sotpela taim tasol+ na laip bilong em i pulap long kain kain hevi.*+
2 Man i olsem ol plaua i kamap na bihain ol i drai pinis;*+Em i olsem sedo i kamap na i pinis kwiktaim.+
3 Yu save putim ai long em,Na yu bringim em* i go long kot bai yu ken kotim em.+
4 Olsem wanem? Wanpela sinman inap kamapim man i no gat sin?+
Nogat tru!
5 Laip bilong em i gat mak bilong en,Na namba bilong hamas mun em i ken i stap laip, i stap long han bilong yu;Yu bin putim mak bilong hamas yia em i ken i stap laip na em i no inap skruim hap taim moa long laip bilong em.+
6 Yu tanim na no ken lukluk long em na bai em i ken malolo,I go inap olsem man ol i haiarim i save malolo taim wok bilong em i pinis long apinun.+
7 I gat rot long diwai inap gro gen.
Sapos ol i katim, em inap putim nupela kru gen,Na ol nupela han bilong en bai i wok long gro.
8 Maski ol rop bilong en insait long graun i olpela pinisNa as bilong en insait long graun i drai,
9 Sapos ol i putim liklik wara long en, orait nupela kru bai i kamap;Na em bai putim ol han olsem nupela diwai.
10 Tasol taim wanpela man i dai, em i no inap mekim wanpela samting;Taim man i dai, em i no stap moa.*+
11 Wara i save lusim solwara na i pinis,Na wara i save ron i go na i save drai olgeta.
12 Olsem tasol, man i save dai na i no save kirap.+
Inap long skai i pinis, bai ol i slip i stap,Na i no gat wanpela samting inap kirapim ol long slip.+
13 I gutpela sapos yu haitim mi long Matmat,*+Yu haitim mi inap belhat bilong yu i pinis,Na yu ken makim wanpela taim bilong tingim mi gen!+
14 Sapos wanpela man i dai, em inap kisim laip gen?+
Mi bai wet i stap inap long haptaim mi mas wet long en i pinis*Na mi bai lusim dispela ples.+
15 Yu bai singautim mi, na mi bai bekim.+
Bai yu gat bikpela laik tru long lukim samting em yu yet i bin wokim.
16 Tasol nau, yu wok long kaunim olgeta wokabaut bilong mi;Yu wok long lukluk tasol long ol sin bilong mi.
17 Yu putim ol rong bilong mi insait long beg na pasim,Na yu pasim long glu bai ol rong bilong mi i stap insait.
18 Maunten i save bruk na pundaun na kamap graun natingNa bikpela ston i save surik na lusim ples em i bin stap long en,
19 Strong bilong wara i save mekim ol ston i go liklikNa i save rausim graun i go,Olsem tasol, yu mekim na ol samting em man i bilip na wet long en i no kamap gut.
20 Yu wok long daunim em i go inap long em i pinis;+Yu senisim lukluk bilong em na yu salim em i go.
21 Ol i givim biknem long ol pikinini man bilong em, tasol em i no inap save long dispela;Ol i kamap samting nating, tasol em i no inap save long dispela.+
22 Em i save pilim tasol pen taim em i stap laip;Na em i save krai sori tasol taim em i stap laip.”
Ol Futnot
^ O, “pulap long wari.”
^ O ating, “na ol i katim.”
^ Hib., “mi.”
^ Hib., “em i stap we?”
^ Dispela i makim long matmat.
