Buk Song 58:1-11
-
Wanpela God i save skelim ol manmeri
-
Beten bilong panisim man nogut (6-8)
-
Tok i go long dairekta; singim long nek ol i kolim “No Ken Bagarapim.” Singsing bilong Devit. Miktaim.*
58 Yupela ol man, olsem wanem yupela inap mekim stretpela tok taim yupela yet i save pasim maus tasol?+
Na ating yupela inap skelim ol samting long pasin i stret, a?+
2 Nogat tru. Yupela i save tingting tasol long mekim pasin i no stret,+Na long han bilong yupela, yupela i save pait na bagarapim ol man long graun.+
3 Kirap long taim mama i karim ol,* ol man nogut i lusim gutpela rot;*Kirap long taim ol i bon, ol i lusim gutpela rot na ol i save mekim tok giaman.
4 Toktok bilong ol i olsem posin bilong snek nogut;+Ol i save pasim yau bilong ol olsem snek kobra i pasim yau bilong en na i no harim tok.
5 Em bai i no harim nek bilong posinman,Maski em i hapman tru bilong mekim musik.
6 God, yu mas brukim ol tit bilong ol na bai i kamaut!
Jehova, yu mas brukim ol wasket bilong ol dispela laion.
7 Ol i mas lus olsem wara i ran i go na i pinis olgeta.
God i ken taitim banara bilong em na sutim ol long ol spia bilong em na bai ol i pundaun.
8 Ol i ken kamap olsem ol demdem i drai na i pinis;Na olsem bebi i stap yet long bel bilong mama na i dai na em i bon na em i no lukim san.
9 Yu mekim paia long ol liklik diwai i gat nil, tasol paslain long pot i kamap hat,God bai mekim strongpela win+ i rausim ol i go, maski ol liklik diwai i wet o drai.
10 Stretpela man bai i amamas, long wanem, em i lukim God i bekim rong bilong ol man nogut;+Blut bilong ol man nogut bai i pulap long lek bilong em.+
11 Orait ol man bai tok olsem: “Tru tumas, stretpela man bai kisim gutpela pe.+
Tru tumas, i gat wanpela God i save skelim ol manmeri bilong graun.”+
