1 Stori 15:1-29
15 Devit i wokim ol haus bilong em yet long Taun Bilong Devit na em i redim wanpela ples bilong putim Bokis Kontrak bilong God tru, na em i sanapim wanpela haus sel bilong Bokis Kontrak long dispela ples.+
2 Na Devit i tok: “I no gat wanpela man i ken karim Bokis Kontrak bilong God tru, nogat. Ol Livai tasol i mas karim Bokis Kontrak, long wanem, Jehova i bin makim ol long karim Bokis Kontrak bilong Jehova na long mekim wok bilong em inap oltaim.”+
3 Na Devit i singautim olgeta Israel i kam bung long Jerusalem na bai ol i ken bringim Bokis Kontrak bilong Jehova i go antap long dispela ples em i bin redim bilong putim Bokis Kontrak.+
4 Devit i bungim ol tumbuna pikinini bilong Aron+ na ol Livai.+
5 Long lain Kohat, Uriel em hetman na 120 man long lain bilong em;
6 long lain Merari, Asaia+ em hetman na 220 man long lain bilong em;
7 long lain Gersom, Joel+ em hetman na 130 man long lain bilong em;
8 long lain famili bilong Elisafan,+ Semaia em hetman na 200 man long lain bilong em;
9 long lain famili bilong Hebron, Eliel em hetman na 80 man long lain bilong em;
10 long lain famili bilong Usiel,+ Aminadap em hetman na 112 man long lain bilong em.
11 Na tu, Devit i singautim pris Sadok,+ na pris Abiatar,+ na ol Livai em Uriel, Asaia, Joel, Semaia, Eliel, na Aminadap.
12 Na Devit i tokim ol olsem: “Yupela i hetman bilong lain bilong tumbuna papa bilong yupela em ol Livai. Yupela na ol brata bilong yupela i mas mekim yupela yet i kamap holi, na yupela i mas bringim Bokis Kontrak bilong Jehova, God bilong Israel, i go antap long dispela ples mi bin redim bilong en.
13 Yupela i no bin karim Bokis Kontrak long namba 1 taim,+ olsem na Jehova, God bilong yumi, i belhat nogut tru long mipela,+ long wanem, mipela i no bin painimaut na bihainim stretpela pasin bilong karim Bokis Kontrak.”+
14 Olsem na ol pris na ol Livai i mekim ol yet i kamap klin na bai ol i ken bringim Bokis Kontrak bilong Jehova, God bilong Israel, i kam.
15 Na ol Livai i karim Bokis Kontrak bilong God tru antap long solda bilong ol wantaim 2-pela longpela stik bilong en,+ olsem tok bilong Jehova em Moses i bin tokim ol long en.
16 Na Devit i tokim ol hetman bilong ol Livai long makim ol man long lain bilong ol, em ol singa, long singsing amamas na paitim ol instramen bilong mekim musik: ol kain kain instramen i gat string, ol harp,*+ na ol simbol.+
17 So ol dispela Livai i makim namel long lain bilong ol, Heman,+ pikinini man bilong Joel, Asap,+ pikinini man bilong Berekaia, na Etan,+ pikinini man bilong Kusaia, long lain famili bilong Merari.
18 Ol i makim ol na ol brata bilong ol long namba 2 grup,+ em Sekaraia, Ben, Jaeisiel, Semiramot, Jehiel, Uni, Eliap, Benaia, Masea, Matitia, Elifelehu, na Miknea. Na Obet-idom na Jeiel em ol wasman bilong geit.
19 Ol singa em Heman,+ Asap,+ na Etan, ol i mas paitim ol kopa simbol;+
20 na Sekaraia, Esiel, Semiramot, Jehiel, Uni, Eliap, Masea, na Benaia i paitim ol instramen i gat string em ol i tiunim long Alamot;*+
21 na Matitia,+ Elifelehu, Miknea, Obet-idom, Jeiel, na Asasia i pilaim ol harp em ol i tiunim long Seminit.*+ Olgeta dispela man i mekim wok olsem dairekta bilong musik.
22 Kenania,+ hetman bilong lain Livai, i bosim wok bilong karim Bokis Kontrak, long wanem, em i save gut long mekim dispela wok.
23 Na Berekaia na Elkana, tupela i wasman bilong Bokis Kontrak.
24 Na pris Sebania, Josafat, Netanel, Amasai, Sekaraia, Benaia, na Elieser, olgeta i winim strong trampet long ai bilong Bokis Kontrak bilong God tru.+ Na Obet-idom na Jehia i mekim wok tu olsem wasman bilong Bokis Kontrak.
25 Bihain Devit na ol hetman bilong ol Israel na ol kepten bilong 1,000 soldia i wokabaut i go long haus bilong Obet-idom+ bilong bringim Bokis Kontrak bilong Jehova i kam. Ol i amamas wantaim na i go.+
26 God tru i bin helpim ol Livai taim ol i karim Bokis Kontrak bilong Jehova, olsem na ol i sakrifaisim 7-pela yangpela bulmakau man na 7-pela sipsip man.+
27 Devit i werim wanpela longpela siot i no gat han em ol i wokim long gutpela laplap. Na ol Livai i karim Bokis Kontrak, ol singa, na Kenania, man i bosim wok bilong karim Bokis Kontrak na ol singa, ol tu i werim wankain klos olsem Devit; na Devit i werim tu wanpela laplap ifot.*+
28 Na olgeta Israel i bringim Bokis Kontrak bilong Jehova i kam antap na ol i amamas na singaut strong+ na ol i winim kom bilong sipsip man wantaim ol trampet,+ na ol i paitim ol simbol, na ol i pilaim ol instramen i gat string na ol harp+ na krai bilong musik i kamap bikpela moa.
29 Tasol taim ol i bringim Bokis Kontrak bilong Jehova i kam insait long Taun Bilong Devit,+ Mikal, pikinini meri bilong Sol,+ i sanap i stap long windo na em i lukluk i go daun na em i lukim King Devit i wok long kalap na amamas; na em i bel nogut long Devit.+
