Banyama bategwa sea cucumber bakkala kunsi aamaanzi alimwi amuma coral reefs. Ibamwi lukanda lwabo lulaatukoto-koto, ibamwi tuyasa-yasa. Balacinca cakufwaambaana, balakonzya kuteteeta mbuli bunzuka naa kuyuma kapati mbuli cisamu mumaminiti buyo masyoonto naa tuvwalu-vwalu. Eeci cibapa kwiinda mutupulo tusyoonto kapati, mpoonya akuyuma kutegwa basinkondonyina batacikonzyi kubakwela. Banyama aaba balacikonzya kucita oobo akaambo kambolupangidwe lukanda lwabo.

Amulange-lange: Lukanda lwamunyama ooyu lulakonzya kucinca muzibeela zyotatwe, nkokuti kuyuma kapati, kuba akati-kati naa kuteteeta. Kutegwa kucinca ooku kucitike, milambi yamulukanda lwabanyama aaba ilaangana naa kulekezyanya. Balacita oobo kwiinda mukubelesya ma protein aayumya naa aapa kuti milambi iteteete.

Ma protein aayumya apa kuti milambi ijatane akupa kuti lukanda luyume kapati. Mpoonya ma protein aapa kuti iteteete, apa kuti milambi ilekezyanye, akupa kuti lukanda luteteete. Lukanda lwabanyama aaba lulakonzya kuteteeta kapati akulibonya mbuli kuti lwanyenguluka.

Basayaansi batalika kupanga zintu zicita mbuli mbolucita lukanda lwabanyama aaba. Makanze aamwi ngakupanga tubulo twakubikka mubongo kuti muntu uciswa cilwazi cipa kuti mubili kautanyanyaali kabotu, aboobo tubulo ootu tuyandika kuti katuli tuyumu kutegwa katubikkwa abusena mpoonya mpotuyandika pele alimwi katuteteeta. Ikuti tubulo ootu katupangidwe boobo, kulalangilwa kuti inga twabeleka kabotu mumuntu.

Ino muyeeya buti? Sena lukanda lwamunyama uutegwa sea cucumber lwakasanduka buya naa lwakalengwa buya?