Basyaazibwene balijisi twaambo tubapa kusyoma kuti Jesu wakaliko ncobeni. Kujatikizya mabbuku aakalembwa abasyaazibwene mumakani aakaindi bamumwaanda wamyaka wakusaanguna awabili kujatikizya Jesu alimwi a Banakristo bakusaanguna, Encyclopædia Britannica, 2002 Edition, yaamba kuti: “Zibalo eezyi zisinizya kuti mumazuba aakaindi nobaba basikukazya Bunakristo tiibakaadooneka makani aakuti Jesu wakaliko ncobeni, alo aakatalika kukazyigwa ciindi cakusaanguna kakunyina twaambo tuyakomoonga kumamanino aamwaanda wamyaka wa 18, mumwaanda wamyaka wa 19, alimwi akumatalikilo aamwaanda wamyaka wa 20.”

 Mu 2006, bbuku lyakuti Jesus and Archaeology lyakaamba kuti: “Mazuba aano kunyina syaazibwene uudooneka kuti muntu mu Juda uutegwa Jesu mwana wa Josefa wakaliko ncobeni; banji balazumina kuti lino kuli makani ngobazyi kujatikizya milimo yakwe alimwi anzyaakali kuyiisya.”

 Bbaibbele lyaamba kuti Jesu wakali muntu wini-wini. Lilaamba mazyina aabamasyanyinakulu alimwi abamukwasyi wakwe. (Matayo 1:1; 13:55) Alimwi lilaamba amazyina aabeendelezi bakajisi mpuwo ibakali kupona ciindi ncaakali kupona Jesu. (Luka 3:1, 2) Twaambo ootu tugwasya basikuvwuntauzya kusinizya mboziluzi zibalo zyamu Bbaibbele.