Ba Adamu a Eva mbabakali bantu bakusaanguna kubisya. Ciindi nobatakamumvwida Leza kwiinda mukulya ‘kucisamu cakuzyiba bubotu abubi,’ bakacita cibi. a (Matalikilo 2:16, 17; 3:6; Baroma 5:19) Ba Adamu a Eva tiibakazumizyidwe kulya kucisamu eeco nkaambo cakali kwiiminina bweendelezi bwa Leza, naa nguzu zyakusalila bantu ciluzi acitaluzi. Kwiinda mukulya kucisamu, ba Adamu a Eva bakalipa nguzu zyakulisalila lwabo beni kucita cintu ncobatakeelede. Kwiinda mukucita boobo bakakaka kweendelezyegwa a Leza.

•  Ino cibi ncobakacita ba Adamu a Eva cakabajatikizya buti?

•  Ino cibi eeco citujatikizya buti swebo?

•  Sena tulakonzya kwaangununwa kuzintu ziboola akaambo kacibi?

•  Mizeezo iitaluzi kujatikizya cibi

 Akaambo kakuti bakabisya, ba Adamu a Eva bakacembaala alimwi akufwa. Bakacinyonganya cilongwe cabo a Leza alimwi bakasweekelwa bulangizi bwakupona kukabe kutamani kabajisi buumi buli kabotu.—Matalikilo 3:19.

 Ba Adamu a Eva bakayambukizya lunyungu lwabo loonse icibi. Eeci cili mbuli bazyali mbobayambukizya bana babo malwazi naa bulema. (Baroma 5:12) Nkakaambo kaako, bantu boonse bakazyalwa “mucibi,” b caamba kuti tatulondokede akuti ncuuba-uba kulindiswe kucita cibi.—Intembauzyo 51:5; Baefeso 2:3.

 Akaambo kacibi ncotwakakona, naa kutalondoka, tulaciswa, kucembaala alimwi akufwa. (Baroma 6:23) Alimwi tulapenga akaambo kakulubizya kwesu tobeni alimwi akulubizya kwabamwi.—Mukambausi 8:9; Jakobo 3:2.

 Inzya. Bbaibbele lyaamba kuti Jesu wakafwa kali “cipaizyo cakumanya zibi zyesu akutuyanzanya a Leza.” (1 Johane 4:10) Cipaizyo ca Jesu cilakonzya kutwaangununa kuzintu ziboola akaambo kacibi ncotwakakona alimwi akupa kuti cikonzyeke kuba abulangizi bwakupona kukabe kutamani alimwi akuba abuumi bubotu mbobakasweekelwa ba Adamu a Eva.—Johane 3:16. c

 Muzeezo uutaluzi: Akaambo kacibi tatukonzyi kuba acilongwe a Leza.

 Kaambo kamasimpe: Leza kunyina natupa mulandu akaambo kanzyobakacita ba Adamu a Eva. Ulamvwisya kuti tatulondokede, alimwi talangili kuti inga twacita zintu nzyotutakonzyi kucita. (Intembauzyo 103:14) Nokuba kuti tulapenga akaambo kacibi ncotwakakona, tulijisi coolwe cakuba acilongwe a Leza.—Tusimpi 3:32.

 Muzeezo uutaluzi: Kubbapatizyigwa kwaangununa muntu kucibi, aboobo bana bavwanda beelede kubbapatizyigwa.

 Kaambo kamasimpe: Nokuba kuti kubbapatizyigwa nintaamu iiyandika kutegwa muntu akafwutulwe, pele kuba alusyomo mucipaizyo ca Jesu kulikke nkokukonzya kusalazya muntu kucibi. (1 Petro 3:21; 1 Johane 1:7) Akaambo kakuti lusyomo lwini-lwini luyeeme aluzyibo, inga tiicakonzyeka kubana bavwanda kuba alusyomo iluboola akaambo kaluzyibo. Nkakaambo kaako Bbaibbele talikulwaizyi bana bavwanda kubbapatizyigwa. Kaambo aaka kakalibonya ku Banakristo bakusaanguna. Tiibakali kubbapatizya bana bavwanda, pele bantu ibakali kusyoma, nkokuti “ibaalumi alimwi abamakaintu” ibakajisi lusyomo mu Jwi Leza.—Milimo 2:41; 8:12.

 Muzeezo uutaluzi: Leza wakabasinganya bamakaintu akaambo kakuti Eva ngowakali wakusaanguna kulya mucelo wakakasyidwe.

 Kaambo kamasimpe: Muciindi cakusinganya bamakaintu, Leza wakasinganya “simwaaba ooyo mupati, imuzoka ooyo wakaindi, uutegwa Diabolosi a Saatani,” walo wakayunga Eva kuti abisye. (Ciyubunuzyo 12:9; Matalikilo 3:14) Alimwi buya, Leza wakapa Adamu mulandu akaambo kacibi eeco kutali mukaintu wakwe.—Baroma 5:12

 Nkaambo nzi Leza ncaakaambila kuti Adamu wakali kunooyendelezya mukaintu wakwe? (Matalikilo 3:16) Naakali kwaamba kaambo aaka, tanaakali kuubya-ubya ncaakacita. Wakali kwaamba zintu zibi izyakali kuyoobola kumbele akaambo kacibi. Leza ulangila kuti mulumi kamuyanda akumulemeka mukaintu wakwe alimwi akubalemeka kapati bamakaintu boonse.—Baefeso 5:25; 1 Petro 3:7.

 Muzeezo uutaluzi: Cibi cakacitwa kwakali koonana.

 Kaambo kamasimpe: Cibi cakacitwa tiikwakali koonana akaambo katwaambo tutobela:

•   Leza wakalailila Adamu kutalya kucisamu cakuzyiba bubotu abubi ciindi naakacili alikke, kanyina mukaintu.—Matalikilo 2:17, 18.

•   Leza wakalailila ba Adamu a Eva kuti ‘bazyalane bavwule akuzuzya nyika,’ nkokuti kuba abana. (Matalikilo 1:28) Nolwakaba lunya kuli Leza kusubula banabukwetene aaba ibakacita cintu ncaakabalailila.

•   Ba Adamu a Eva tiibakabisya aciindi comwe pe, Eva ngowakasaanguna mpoonya nokwakainda kaindi mulumi wakwe wakatobela.—Matalikilo 3:6

•   Bbaibbele lilazumizya koonana akati kamulumi alimwi amukaintu ibakwetene.—Tusimpi 5:18, 19; 1 Bakorinto 7:3.