Sena Bwami bwa Leza Buli Mumoyo Wanu?
Bwiinguzi bwamu Bbaibbele
Peepe, Bwami bwa Leza tacili cintu cili mumyoyo ya Banakristo. a Bbaibbele lilaamba kwini nkobubede kwiinda mukwaamba kuti “Bwami bwakujulu.” (Matayo 4:17) Amulange-lange Bbaibbele mbolitondezya kuti Bwami bwa Leza nimfwulumende iini-ini iilela kujulu.
Bwami bwa Leza bulijisi baleli, balelwa, milawo, alimwi anguzu zyakupa kuti kuyanda kwa Leza kucitwe kujulu alimwi aanyika.—Matayo 6:10; Ciyubunuzyo 5:10.
Mfwulumende ya Leza, naa Bwami, buyoolela “bantu boonse, zisi zyoonse alimwi abantu bamyaambo yoonse” bali anyika. (Daniele 7:13, 14) Nguzu nzyobujisi zyakulela tazizwi kubalelwa, pele zizwa kuli Leza.—Intembauzyo 2:4-6; Isaya 9:7.
Jesu wakaambila baapostolo bakwe basyomeka kuti bayoomusangana mu Bwami bwakujulu kutegwa ‘bakakkale azyuuno zyabwami.’—Luka 22:28, 30.
Bwami bulijisi basinkondonyina, mbobuyoonyonyoona.—Intembauzyo 2:1, 2, 8, 9; 110:1, 2; 1 Bakorinto 15:25, 26.
Bbaibbele taliyiisyi kuti Bwami bwakujulu buli mumoyo wanu mukuti bulalela kwiinda mumoyo wamuntu. Pele lilatondezya kuti “ijwi lya Bwami” naa “makani mabotu aa Bwami” alakonzya alimwi aleelede kwiijatikizya myoyo yesu.—Matayo 13:19; 24:14.
Ino majwi aakuti “Bwami bwa-Leza buli mukati kanu” aamba nzi?
Bamwi bantu banyongana kujatikizya busena nkobubede Bwami akaambo kambolulembedwe lugwalo lwa Luka 17:21 muma Bbaibbele aamwi. Mucikozyanyo, Bbaibbele lya The Bible in Tonga lyaamba kuti “Bwami bwa-Leza buli mukati kanu.” Kutegwa tukamvwisye kabotu kapango aaka, tweelede kulanga-langa makani aamwi aajatikizyidwe.
Bwami bwa Leza tiibwakali mumyoyo yabasikukazya Jesu bayumu myoyo alimwi bajayi
Jesu wakali kubandika aba Farisi, kabunga kabasololi bacikombelo bakali kumukazya alimwi ibakatola lubazu mukumujaya. (Matayo 12:14; Luka 17:20) Sena ncamaano kuyeeya kuti Bwami bwakali mumyoyo yabo miyumu? Jesu wakabaambila kuti: “Mukati muzwide kuupaupa ameso alimwi abubi.”—Matayo 23:27, 28.
Ma Bbaibbele aamwi alaasalazya majwi aa Jesu aali mulugwalo lwa Luka 17:21 kwiinda mukwaamba kuti: “Bwami bwa Leza buli andinywe.” (Ndiswe twasendeka bbala; Contemporary English Version) “Bwami bwa Leza buli akati kanu.” (Busanduluzi Bwanyika Mpya) Bwami bwakujulu bwakali aba Farisi naa “akati” kaba Farisi, mukuti Jesu, walo wakabikkwa a Leza kuti alele kali Mwami, wakaliimvwi kumbele lyabo.—Luka 1:32, 33.
a Zikombelo zinji zya Bunakristo ziyiisya kuti Bwami bwa Leza buli mumuntu, naa mumoyo wamuntu. Mucikozyanyo, ku United States, cikombelo ca Southern Baptist Convention cakaamba kuti Bwami bwa Leza “mbulelo bwa Leza buli mumoyo alimwi amubuumi bwamuntu.” Mbubwenya buyo, awalo Pope Benedict XVI, mubbuku lyakwe litegwa Jesus of Nazareth wakaamba kuti “Bwami bwa Leza bulaboola kwiinda mukuba amoyo uuswiilila.”
Andiza Inga Mwaakkomanina Ayaaya
NJIISYO ZYAMU BBAIBBELE ZIYANDIKA
Ino Bwami bwa Leza Ninzi?
Mumulimo wakwe woonse, Jesu wakayiisya kapati kujatikizya Bwami bwa Leza kwiinda makani aambi. Kwamyaka minji, basikumutobela balikubupailila Bwami oobo kuti buboole.
TUPANGO TWAMU BBAIBBELE TWAPANDULULWA
Lugwalo lwa Marko 1:15 Lwapandululwa—“Bwami bwa-Leza Buliswenede Afwaafwi”
Amubale Marko 1:15 kuzwa mubusanduluzi bwama Bbaibbele bwiindene-indene, alimwi amakani aayengelede, antoomwe amakani aakozyene alimwi atwaambo tugwasya mukwiiya. Amwiiye bupanduluzi bwakapango kamu Bbaibbele aaka.
NGAZI YAMULINDIZI
Ino Nguni Mwami wa Bwami bwa Leza?
Balembi ba Bbaibbele banji bakalemba makani aajatikizya mbotukonzya kumuzyiba ooyo iwakali kuyooba Mwami wa Bwami bwa Leza. Kuli buyo muntu omwe iweelela bupanduluzi oobu.
MIBUZYO YAMU BBAIBBELE YAINGULWA
Ino Bwami bwa Leza Buyoocita Nzi?
Amwiiye zyintu nzyomukonzya kujana ciindi mfwulumende ya Leza noiyakulela nyika.
NJIISYO ZYAMU BBAIBBELE
Amulembe Foomu Kuti Kamuyanda Kwiiya
Amwiiye Bbaibbele amwiiyi kakunyina kubbadela.