Inzya, Bbaibbele lyakaambilalimwi kuti bunji bwabantu bayoocinca akubijilalimwi muciindi eeci ncotupona. Lyakaamba kuti bantu banji bayoozikaka zyeelelo zisumpukide zyakulilemeka zyalo zigwasya bantu kumvwana. a (2 Timoteyo 3:1-5) Alimwi, lyakaamba kuti kunooli bantu bayoobukaka bukkale oobu bubyaabi. Aboobo, kwiinda mukugwasyigwa a Leza, bayoosolekesya kuzunda kuyungwa, kumane bayakwiiya kucita zintu munzila iikkomanisya Leza.—Isaya 2:2, 3.

Mucibalo eeci tulalanga-langa makani aatobela:

•  Ncinzi Bbaibbele ncolyakaamba kujatikizya bantu mbobayeeya akucita zintu mazuba aano?

•  Ino bantu bamwi bayoojatikizyigwa buti abantu baliyanda?

•  Nkaambo nzi bantu banji ncobayakwiindila buya kubija?

•  Ino tweelede kucita buti ciindi notubona bantu kabacinca akubijilalimwi?

•  Sena bantu boonse bayakwiindila kubija?

•  Sena bantu kumbele bayakubija cakuti nyika inoozwide nkondo alimwi alupyopyongano?

 Bbaibbele lilatondezya tumpenda alimwi amicito mibyaabi iidumide kapati, iicitwa akaambo kakuliyanda. Bantu bayooba “basikuliyanda,” “bayandisya zyakulikondelezya kwiinda kuyandisya Leza,” alimwi “batalilesyi.” —2 Timoteyo 3:2-4.

 Kutondezya kuti businsimi oobu mbwamasimpe, bantu banji bayeeya buyo zintu zikonzya kugwasya mbabo balikke, kubaletela lukkomano, kubapa kulimvwa kuti buumi bwabo bulaampindu azimwi buyo. Kweelana abusinsimi, kuliyanda kwaduma kapati alimwi ciyanza eeci ciyaabwiindila buya. Kuyungizya waawo, ‘tabayandi bubotu,’ alimwi buya tabayandi akuba abube bubotu. ‘Tabalumbi,’ alimwi balimvwa kuti taakwe ambocibede kulumba kuzintu nzyobajisi naa bamwi nzyobabacitila.—2 Timoteyo 3:2, 3.

 Kunze lyaboobo, kuliyanda nkokupa bantu kucita micito iyakaambwa mu Bbaibbele kuti inoodumide mazuba aano:

•   Bulyato. Bantu banji “bayandisya mali” alimwi basyoma kuti mali naa zintu zyakumubili nzyobajisi zitondezya mbobazwidilila.—2 Timoteyo 3:2.

•   Kulisumpula. Ibanji ‘balalidunda, balalisumpula,’ alimwi ‘balalitukumuna.’ (2 Timoteyo 3:2, 4) Bantu bali boobu balalibonesya caboola kuzintu nzyobakonzya kucita , bube bwabo naa buvwubi.

•   Basikubejelezya. “Basikusampaula,” alimwi ‘abasikubejelezya’ balakonzya kujanwa kuli koonse. (2 Timoteyo 3:2, 3) Mabala aaya alakonzya kwaamba baabo batukila bamwi naa Leza naa babejekezya.

•   Batalaiki. Bantu banji ‘tabasyomeki,’ ‘tabanyoneki,’ ‘mbaasikwaaba bamwi,’ alimwi ‘tabalaiki.’ (2 Timoteyo 3:2-4) Balatondezya bube oobu kwiinda mukutazumina kubandika, kutajana nzila yakumana penzi naa kucita kweelana ambobakamvwana amweenzinyina.

•   Basinkondo. Bantu banji ‘mbakali’ alimwi balafwambaana kunyema, calo kanji-kanji cisololela kukulwana.—2 Timoteyo 3:3.

•   Kuvwula kwabubi. Jesu wakaambilalimwi kujatikizya “kuvwula kwabubi” muciindi eeci ncotupona. (Matayo 24:12) Alimwi wakaamba zyakuvwula ‘kwamanyongwe.’—Luka 21:9.

•   Kubula luyando mumukwasyi. Mbwaanga bantu “batamvwidi bazyali” alimwi “batajisi luyando [kuli banamukwasyi] lwakuzyalwa andulo” bavwula kapati, banamukwasyi banji balekelezyegwa, balatundululwa naa kweendelezyegwa calunya.—2 Timoteyo 3:2, 3.

•   Bukombi bwakuupaupa ameso. Bantu banji “balibonya mbuli kuti balilyaabide mubukombi.” (2 Timoteyo 3:5) Muciindi cakuti kabacita ncayanda Leza, batobela ncobaamba basololi bazikombelo balo ibabatekunya kumatwi.—2 Timoteyo 4:3, 4.

 Kuliyanda ikwavwula kapati kwapa kuti bantu banji baciswe bulwazi bwakukopana mumizeezo kwiinda mbocakabede kaindi. (Mukambausi 7:7) Mucikozyanyo, ibamwi ibayandisya mali balacenga naa kulida bamwi masuku amutwe. Bantu batajisi luyando lwakuzyalwa aandulo balakonzya kutundulula banamukwasyi, calo cikonzya kubapa kutyompwa naa kuyanda kulijaya. Alimwi bantu ibaaba bamwi balakonzya kupa kuti basikwaabwa kabapenga mumoyo. Kulimvwa boobu kulakonzya kutola ciindi.

 Bbaibbele lilaamba kaambo bantu banji ncobacinca:

•   Luyando kuli Leza alimwi akubantu luyaabuceya. (Matayo 24:12) Cili boobo akaambo kakuti kuliyanda kuyaabuvwula.

•   Saatani Diabolosi wakatandwa kujulu akuwaalwa anyika. (Ciyubunuzyo 12:9, 12) Kuzwa kuciindi eeco, uluujisi kuyunga bantu kuti kabaliyanda kapati.—1 Johane 5:19.

 Ijwi lya Leza lyaamba kuti: “Ibantu bali boobu kobatantamuka.” (2 Timoteyo 3:5) Eeci tacaambi kuti tweelede kulizandula kubantu bamwi. Muciindi caboobo, tweelede kweeleba kupanga cilongwe abaabo baliyanda alimwi bataponi kweelana azyeelelo zya Leza.—Jakobo 4:4.

 Peepe. Bbaibbele lyakasinsima kuti bamwi ‘bayakulila akutongela akaambo kazintu zyoonse zisesemya zicitika.’ (Ezekieli 9:4) Bayookukaka kuliyanda mpoonya akupona kweelana azyeelelo zya Leza. Mbobanikwaambaula alimwi akucita zintu kunooyindene abantu boonse. (Malaki 3:16, 18) Mucikozyanyo, bayoosola kukkala muluumuno abantu boonse, alimwi akweeleba nkondo akulwana.—Mika 4:3.

 Peepe. Bantu tabakaindili kubija cakumaninina. Muciindi caboobo, ino-ino Leza uyoobanyonyoona bantu batatobeli zyeelelo zyakwe. (Intembauzyo 37:38) Uyooleta “nyika mpya,” mwalo bantu babombe myoyo mobayoopona muluumuno kukabe kutamani. (2 Petro 3:13; Intembauzyo 37:11, 29) Bulangizi oobu tabuli bwakweezyeezya buyo pe. Noliba lino, Bbaibbele lili mukugwasya bantu kucinca buumi bwabo akupona kweelana anzila zya Leza ziluleme.—Baefeso 4:23, 24.