TUPANGO TWAMU BBAIBBELE TWAPANDULULWA

Marko 1:15—“Bwami bwa-Leza Buliswenede Afwaafwi”

AMULIZYE

“Ciindi cibikkidwe cazuzikizyigwa, alimwi Bwami bwa Leza bwaswena. Amweempwe alimwi amube alusyomo mumakani mabotu.”—Marko 1:15, Bbaibbele lya Busanduluzi Bwanyika Mpya.

“Casika ciindi, Bwami bwa-Leza buliswenede afwaafwi. Amweempwe, muzuminine Makani Mabotu.”—Marko 1:15, The Bible in Tonga Lyamu 1963.

Bupanduluzi bwa Marko 1:15

Jesu Kristo wakaambila baswiilizi bakwe kuti Bwami bwa Leza a bwakali “afwaafwi,” naa ‘bwakaliswenede,’ nkaambo walo, iwakali kuyooba Mwami wa Bwami oobo wakali aambabo.

Jesu tanaakaamba kuti Bwami bwakalitalikide kale kweendelezya. Mane buya, nokwakainda ciindi wakaambila basikwiiya bakwe kuti Bwami bwakali kuyooba kumbele. (Milimo 1:6, 7) Nokuba boobo, wakasikila aciindi ceelede, nkokuti mumwaka ngoona Bbaibbele ngolyakasinsima kuti wakali kuyoolibonya kali Mwami wakumbele. b Nkakaambo kaako Jesu wakaamba kuti: “Ciindi cibikkidwe cazuzikizyigwa,” ciindi cakuti walo atalike mulimo wakwe wakubuleya wakukambauka makani mabotu aa Bwami.—Luka 4:16-21, 43.

Kutegwa bantu bagwasyigwe amakani mabotu aa Bwami, bakali kuyandika kweempwa, nkokuti, kulimvwa bubi akaambo kakubisya nkobakacita musyule alimwi akupona kweelana azyeelelo zya Leza. Aabo ibakeempwa bakatondezya kuti bakalijisi lusyomo mumakani mabotu aa Bwami bwakumbele.

Makani aayengelede lugwalo lwa Marko 1:15

Jesu wakaamba majwi aali kulugwalo lwa Marko 1:15 kumatalikilo aamulimo wakwe ku Galilaya. “Kuzwa kuciindi eeco,” kweelana acibalo cikozyene cili ku Matayo 4:17, Jesu wakali kukambauka kujatikizya bwa Bwami bwa Leza. Bwami ngowakali mutwe wamakani wamulimo wa Jesu. Mane buya, Bwami bulaambidwe ziindi ziinda ku 100 mumabbuku one aa Makani Mabotu c, kanji-kanji mumajwi ngaakali kwaamba Jesu. Mu Bbaibbele, Jesu wakaamba zinji kujatikizya Bwami bwa Leza ikwiinda mbwaakali kwaamba makani aamwi.

Amubale Marko caandaano 1 kubikkilizya abupanduluzi buyungizyidwe, makani aakozyene, zifwanikiso, alimwi amaapu.

a Bwami bwa Leza nimfwulumende yakujulu yakatalisyigwa a Leza kutegwa azuzikizye makanze aakwe kujatikizya nyika. (Daniele 2:44; Matayo 6:10) Kutegwa muzyibe makani manji, amubone cibalo cakuti “Ino Bwami bwa Leza Ninzi?”

b Jesu wakali kuyandika kuba mwami kutegwa azuzikizye mikuli yakwe kali Mesiya iwakasyomezyegwa, mwiiminizi waalubazu wa Leza. Kutegwa muzyibe makani manji kujatikizya mwaka Mesiya mwaakali kuyoolibonya, amubone cibalo cakuti “Ibusinsimi bwa Daniele Mbobusinsima Kusika kwa Mesiya.”

c Mabbuku aa Makani Mabotu ngaakusaanguna mu Magwalo aa Banakristo aa Chigiriki, ngobaita kuti Cizuminano Cipya, alo aamba buumi bwa Jesu alimwi amulimo wakwe.