•  Ncinzi cipa kucita boobo?

•  Mibuzyo nzi njomweelede kubuzya?

•  Ino ninjiisyo nzi zyamu Bbaibbele izikonzya kumugwasya?

 Mukubusi umwi wazina lya Ryan wakaamba kuti: “Ndiyeeya kuti nsimbo zimwi zitondezya milimo mibotu yasikuzekaula.”

 Makanze ngajisi muntu inga apa kuti asimbwe naa pe. Mucikozyanyo, mukubusi wazina lya Jillian wakaamba kuti: “Ciindi musimbi ngondakali kuunka limwi kucikolo naakacili muniini, banyina bakafwa. Aboobo naakaba mukubusi, wakasimba zina lyabanyina kumakosi. Ndiyeeya kuti kusimbwa kuli boobo nkubotu.”

 Kufwumbwa naa ncinzi cipa kusimbwa, mweelede kuyeeya kapati kamutanasala kusimbwa cintu citakazwi alukanda lwanu! Ino mibuzyo nzi njomweelede kulanga-langa ikuti kamuyeeya kusimbwa? Ino ninjiisyo nzi zyamu Bbaibbele izikonzya kumugwasya kusala kabotu?

 Ino cileta ntenda nzi kubuumi bwanu? Webbusaiti ya Mayo Clinic yakaamba kuti: “Kusimbwa kunyonyoona lukanda, calo cikonzya kupa kuti mube aamalwazi aalukanda. Zimwi ziindi kulaba tukoto aali nsimbo. Alimwi nsimbo zilakonzya kupa kuti mube azibata.” Kuyungizya waawo, webbusaiti yakaamba kuti: “Ikuti cibelesyo icabelesyegwa kusimba kacijisi bulowa ibujisi tuzunda, mulakonzya kuciswa andinywe.”

 Ino inga caijatikizya buti mpuwo yanu? Kufwumbwa naa mulayanda naa pe, mbomulibonya kuli ncocaamba. Citondezya kuti mulisimide naa tamusimide, mulasyomeka naa tamusyomeki. Mukubusi wazina lyakuti Samantha wakaamba kuti: “Kufwumbwa ndabona muntu uusimbidwe, ndimuyeeyela kuba cakolwa naa sikuciindilizya kulikondelezya.”

 Melanie uujisi myaka iili 18 uzibona munzila imbi zintu. Wakaamba kuti: “Kulindime, nsimbo zisisa bubotu bwamuntu. Cili mbuli kuti aabo ibasimbwa tabayandi kuti mubone bwini mbobabede, aboobo balalisisa kwiinda munsimbo.”

 Sena munoociyanda lyoonse? Mukuya kwaciindi, kuneneya naa kucembaala buyo asyoonto kulakonzya kunyonganya mboilibonya nsimbo. Mukubusi wazina lya Joseph wakaamba kuti: “Ndakabona nsimbo mboziboneka kumuntu nokwainda myaka minji, tazilibonyi kabotu.”

 Allen uujisi myaka yakuzyalwa iili 21 wakaamba kuti: “Kanji-kanji nsimbo zilaleka kubonwa kuti kuli ncozyaamba. Cintu icakali kuboneka kuti cilayandika kapati kuli mukamwini cilakonzya kubula muli mo kumbele aamazuba.”

 Allen ulijisi kaambo kamvwika. Masimpe ngakuti, ciindi bantu nobayaabucembaala, balacinca mbobazibona zintu, nzyobayanda zilacinca, pele nsimbo tazicinci. Mukubusi wazina lya Teresa wakaamba kuti: “Kuba ansimbo izindiyeezya buyo zintu zyabufwubafwuba ncintu nconditayandi kulemba amulongo wazintu izindipa kuusa kwainda myaka.”

 Muntu uusimide ulatola ciindi kulanga-langa twaambo toonse tujatikizyidwe katanasala. (Tusimpi 21:5; Bahebrayo 5:​14) Aboobo amulange-lange njiisyo zyamu Bbaibbele izitobela izyaamba makani aajatikizya nsimbo.

•  Bakolose 3:​20: “Nywebo nobana, amubamvwide bazyali banu muzintu zyoonse, nkaambo eeci cilakkomanisya mu Mwami.”

    Nzintu nzi zibyaabi izikonzya kumucitikila kuti kamukkala aŋanda abazyali pele kamwaalilwa kutobela milawo yabo?

•  1 Petro 3:​3, 4: “Kulisakatizya kwanu kutabi buyo kwaatala​—kwakoosa masusu akusama zintu zyangolida naa zisani zidula kapati​—pele akube kulisakatizya kwamuntu wamukati kamoyo uusamide cisani citanyonyooki camoyo uukkede alimwi mubombe.”

    Muyeeya kuti nkaambo nzi Bbaibbele ncolikankaizya “muntu wamukati kamoyo”?

•  1 Timoteyo 2:9: “Bamakaintu beelede kulisakatizya . . . cabulemu alimwi acakulibatamika.”

    Ino bbala lyakuti “cabulemu” lyaamba nzi? Mukuya kwaciindi, nkaambo nzi bulemu ncobuyandika kwiinda nsimbo?

•  Baroma 12:1: “Mutuule mibili yanu kaili cipaizyo cuumi, cisalala, cizuminwa a Leza, nkokuti imulimo uusetekene ngomubeleka kwiinda mukubelesya maano.”

    Nkaambo nzi ncaali makani mapati kuli Leza kujatikizya nzyomucita amubili wanu?

 Kweelana atwaambo ootu, bantu banji tabayandi kuba ansimbo. Mubwini kuli ncobajana icibotu kwiinda zyaando. Teresa iwaambwa kumatalikilo wakaamba kuti: “Ikuti kuli majwi ngomuyanda ncobeni naa muntu ngomuyanda kapati, nkokuti mweelede kupona kweelana amajwi aayo naa kumwaambila muntu ooyo mbomumuyanda. Muciindi cakuba ansimbo, amupone kweelana anzyomusyoma.”