Ino inga mwacita buti mubukkale butobela?

1.   Bayi bamunyemena akaambo kakusunda mukkilasi.

    Sena mweelede kulilekelela kubayi banu, nokuba kuti muyeeya kuti baciindizya?

2.   Mulongwe wanu wazyiba kuti mwakali kumwaamba majwi mabi.

    Sena mweelede kulilekelela kumulongwe wanu, nokuba kuti nzyomwakaamba zyakali zyamasimpe?

3.   Mwanyemezyanya abauso mpoonya mwaamba majwi aatatondezyi bulemu.

    Sena mweelede kulilekelela kuli bauso, nokuba kuti mwalimvwa kuti mbabamutalika?

 Bwiinguzi kumibuzyo yoonse yotatwe mbwakuti inzya. Pele ino nkaambo nzi ncomweelede kwaamba kuti “amundijatile,” nokuba kuti mulimvwa kuti kunyina ncomwalubizya?

•  Nkaambo nzi ncomweelede kulilekelela?

•  Mbomukonzya kwaamba kuti “amundijatile”

•  Nzyobaamba beenzinyoko

•   Kulilekelela ncitondezyo cakuti mulisimide. Ciindi nomwazumina ncomwaamba naa kucita, citondezya kuti muyaabwiiya bube bumwi bwalo mbomuya kuyandika mwaakukomena.

   “Kulicesya alimwi akukkazika moyo kulakonzya kutugwasya kuti tulilekelele mpoonya akuswiilila ncayanda kwaamba muntu ooyo.”—Rachel.

•   Kulilekelela cilagwasya kubamba luumuno abamwi. Bantu ibaamba kuti “amundijatile” inga bayanda buyo kubamba luumuno kutali kupa bamwi milandu naa kulitondezya kuti balo mbabaluzi.

   “Nokuba kuti mwalimvwa kuti tamulubizyide, kubamba luumuno ayelede kuba ngamakanze aanu aakusaanguna. Alimwi buya ncuuba-uba kwaamba kuti ‘amundijatile,’ aboobo cilakonzya kubukulusya cilongwe.”—Miriam.

•   Kulilekelela kupa kuti mulimvwe kabotu. Ikuti mwamulubizyila muntu umwi kwiinda mucintu ncomwakaamba naa kucita, cilakonzya kumupa kulimvwa bubi kapati. Pele mbomwalilekelela buyo, muyoolimvwa kabotu. a

   “Kwakali ziindi nondatakali kubandika kabotu abazyali bangu. Ndakali kulimvwa bubi, pele alimwi cakali kundikatazya kulilekelela. Nokuba boobo, ikuti ndalilekelela ndakali kulimvwa kabotu nkaambo ndakali kubukulusya luumuno mumukwasyi.”—Nia.

 Sena kuli ciyandika kucita kutegwa mulilekelele? Inzya! Dena, mukaintu uucili mwana-mwana wakeelede kulilekelela ziindi zinji akaambo kakuba ankazi kuli banyina, wakaamba kuti: “Tacili cuuba-uba ikwaamba kuti ‘amundijatile.’ Cilimvwisya mbuli kuti kuli ciliko agoyooyo aboobo kunyina majwi aakonzya kuzwa!”

•   Ikuti kacikonzyeka amulilekelele cacigaminina. Kulilekelela cakaanzambwene cigwasya ngomwalubizyila kubona mbomuuside ncobeni. Pele ikuti mwalilekelela kwiinda mukulemba meseji, muntu ooyo ngomulembela inga tanaamusyoma. Nokuba kuti mwabelesya ka emoji katondezya kuusa, kulilekelela kwanu inga tiikwazwa ansi aamoyo.

   Muzeezo: Ikuti kamutacikonzyi kulilekelela cakaanzambwene, amusole kutuma fooni naa kulemba kakkaadi. Kufwumbwa nzila njomukonzya kubelesya, amubelesye majwi aali kabotu.

   Njiisyo yamu Bbaibbele: “Mululami ulazinzibala kuyeeya katanavwiila.”—Tusimpi 15:28.

•   Amulilekelele mpoonya-mpoonya. Ikuti mwatola ciindi kulilekelela, penzi lilakonzya kukomena alimwi acilongwe canu cilakonzya kunyongana.

   Muzeezo: Amulibikkile mbaakani, mucikozyanyo kwaamba kuti ‘ndilalilekelela sunu.’ Amusale ciindi nomutiililekelele mpoonya amucite oobo.

   Njiisyo yamu Bbaibbele: “Kofwambaana kubamba twaambo.”—Matayo 5:25.

•   Amulilekelele kuzwa ansi aamoyo. Ikwaamba kuti “Amundijatile kuti mwalimvwa boobo” takuli kulilekelela pe! “Ooyo ngomwakalubizyila uyoomulemeka ikuti wabona kuti mwacizumina ncomwakacita,” mbwaakaamba mukaintu uucili mwana-mwana wazina lyakuti Janelle.

   Muzeezo: Amulilekelele ncobeni. Mutaambi kuti, “Ndilalilekelela kucibeela cangu lilikke buyo kuti andinywe mulilekelele mpomwalubizya.”

   Njiisyo yamu Bbaibbele: “Atusungwaalile kucita zintu ziletela luumuno.”—Baroma 14:19.