Sena kuli mukubusi ngomuzyi ulaabulwazi bupati? Sena mujisi bulwazi bupa kuti kamutaciti zyintu zimwi nzyobacita bamusela wanu?

 Ikuti kacili boobo, tacigambyi kuti zimwi ziindi mulimvwa kutyompwa. Nokuba boobo, mu Bbaibbele kuli twaambo tobilo tuumbulizya kapati.

•   Mulengi wanu, Jehova Leza, ulibuzyi bukkale bwanu. Kuyungizya waawo, “ulamubikkila maano.”​—1 Petulo 5:7.

•   Makanze aa Jehova Leza ngakumanya kuciswa koonse! Makani aaya mulakonzya kwaabala mu Bbaibbele mulugwalo lwa Isaya 33:24 alimwi alwa Ciyubunuzyo 21:​1-4.

 Bakubusi banji baciswa-ciswa bagwasyigwa kwiinda mukuba alusyomo muli Leza alimwi amuzisyomezyo zyakwe. Amulange-lange zikozyanyo zyone.

•  YEIMY

•  MATTEO

•  BRUNA

•  ANDRÉ

 Nindakakkwanya myaka yakuzyalwa iili 11, ndakali kuyandika kacinga kabalema kakweendela. Noiba milimo myuuba-uba ilandikatazya kwiicita.

 Nindakajisi myaka yakuzyalwa yosanwe, ndakajanwa abulwazi butasilikiki bwa muscular dystrophy, bwalo bupa kuti milambi kiitabeleki kabotu alimwi bupa kuti kanditakonzyi kucita zyintu zimwi. Zimwi ziindi ndilatyompwa akaambo kakuti tandicikonzyi kucita zyintu bamusela wangu nzyobakonzya kucita. Pele bazyali bangu alimwi abakwesu mumbungano balandigwasya kumubili, kumuuya, alimwi akunduumbulizya. Ndili mupainiya waciindi coonse, alimwi Banakristoma balandisangana ciindi nondisololela ziiyo zya Bbaibbele kubantu balaaluyandisisyo.

 Jesu wakaamba kuti buzuba buli boonse bunooli azyakulibilika zyambubo. (Matayo 6:34) Aboobo ndiyeeya buyo zyasunu, akutalibilika kujatikizya ziyoocitika junza, alimwi ndilalibikkila mbaakani nzyondikonzya kuzuzikizya. Ndilangila kuyooba ‘abuumi bwini-bwini’ munyika mpya ya Leza ciindi nokutakabi bulwazi oobu.​—1 Timoteyo 6:19.

 Ncomweelede kuyeeya: Yeimy wabona kuti cilamugwasya ‘kulibikkila mbaakani nzyakonzya kuzuzikizya.’ Mbuti mbomukonzya kucita oobo andinywe?​—1 Bakolinto 9:26.

 Musana wangu wakatalika kucisa nindakajisi myaka yakuzyalwa iili cisambomwe, kumatalikilo bamadokota bakaamba kuti ndakali kulimvwa boobu akaambo kakuti ndakali kuyaabukomena. Nokwakainda mwaka omwe, bamadokota bakajana kuti ndakajisi cikoto kumoongolola.

 Ndakaandulwa, pele dokota wakagusya buyo 40 pesenti yacikoto. Mpoonya mumyezi buyo yobilo, cikoto cakakomena alimwi. Kuzwa leelyo, ndakali kupimwa ziindi zinji, kupegwa misamu minji, alimwi akutyompwa ziindi zinji.

 Zimwi ziindi cikoto eeci cilacisa mbuli kuti bandiyasaula acipeni mubili woonse, kwaambisya kumusana amucamba. Nokuba boobo ndilasoleka kuliyumya mubukkale oobu. Ndilaliyeezya kuti kuli abamwi bacitikilwa zyintu zibyaabi pele bacikonzya kuliyumya. Icindigwasya kapati kutegwa ndiliyumye nkuba alusyomo lwakuti buzuba bumwi Jehova Leza uyakuzuzikizya cisyomezyo cakwe cakumana mapenzi oonse.​—Ciyubunuzyo 21:4.

 Ncomweelede kuyeeya: Ino kuyeeya kujatikizya cisyomezyo ca Leza cakumana mapenzi inga camugwasya buti kuliyumya, mbubwenya mbocakamugwasya Matteo?​—Isaya 65:17.

 Akaambo kakuti kunyina citondezya kuti ndilaciswa, bantu bamwi inga bayeeya kuti ndili buyo mutolo. Pele mubwini, zyintu zyoonse zilandiyumina, zyintu mbuli kucita milimo yaaŋanda, kubala, nokuba kubuka abulo.

 Nindakajisi myaka yakuzyalwa iili 16, ndakajanwa abulwazi bwa multiple sclerosis, ibulwazi bucisa kapati ibwapa kuti kanditabeleki kabotu nokuba kutola lubazu mbuli mbondiyanda mumilimo ya Bunakristo. Ndakabala cakwiinduluka-induluka lugwalo lwa 1 Petulo 5:​7, ilwaamba kuti: “Kamuwaala makatazyo aanu oonse kulinguwe [Leza], nkaambo ulamubikkila maano.” Ndilayumizyigwa kuzyiba kuti Jehova ulatubikkila maano umwi aumwi kumugama. Eeci cilandikulwaizya kusikila sunu.

 Ncomweelede kuyeeya: Mbuti mbomukonzya kugwasyigwa kwiinda mukuwaala makatazyo aanu kuli Jehova, mbuli mbwaakacita Bruna?​—Intembauzyo 55:22.

 Nzyobacita bantu bamwi kulindime, bazicita mbuli kuti bacitila mwana uujisi myaka yakuzyalwa iili kkumi. Inga tiindabapa mulandu, mbwaanga ndiboneka mbuli mwana.

 Nindakajisi myaka yakuzyalwa yobilo, bakandijana abulwazi bwakkansa bwakatalikila kumoongolola akuyandalala kusikila kubongo. Bamadokota bakacikonzya kundisilika, pele misamu yakapa kuti kanditakomeni. Lino ndilampa mamita aali 1.37. Bantu banji babona mbuli kuti ndilabeja ndabaambila kuti ndijisi myaka yakuzyalwa iili 18!

 Mumbungano ya Bunakristo, bantu balandilemeka. Tabandisobanyi mbuli mwana, mbuli mbobakali kucita basicikoloma. Ndilasoleka kukkomana nomuba mubukkale bwangu. Cintu cibotu kapati cikonzya kucitikila muntu anyika cakandicitikila​—ndakamuzyiba Jehova! Kufwumbwa zyintu zikonzya kundicitikila, ndilasyoma kuti Jehova unoondilanganya. Ikuyeeya nyika mpya mbotu Jehova Leza njasyomezya cilandigwasya kuba muntu uukkomene.​—Isaya 33:24.

 Ncomweelede kuyeeya: Nkaambo nzi ikuzyiba Jehova ncocili ‘cintu cibotu kapati cikonzya kucitikila muntu, kweelana ambwaakaamba André?​—Johane 17:3.