Mucizyi umwi mukubusi waku Colombia wazina lya Nicole wakaamba kuti: “Ndilaiyanda Ŋanda yesu ya Bwami. Mbobusena nkondikonzya kujanika buyo abanamukwasyi bakumuuya.” Sena andinywe mulimvwa mbuli mucizyi ooyu?

 Nyika yoonse, Bakamboni ba Jehova balaswaangana mu Maanda aa Bwami aabalilwa ku 63,000. Masena aaya apa kuti katukomba Leza cakuliiba. Pele kuli amakani aamwi. Mupainiya waciindi coonse wazina lya David waku Colombia wakaamba kuti: “Maanda eesu aa Bwami apa kuti bantu baukkomanine kapati mulumbe wesu. Basikuswaya banji balagambwa kubona mbotwiibamba kabotu Ŋanda yesu ya Bwami.” Eeci tacilicitikili pe. Tulabeleka canguzu kwaasalazya akwaabamba Maanda eesu aa Bwami. Ino mulimo ooyu ucitwa buti?

 Mbungano izibelesya Ŋanda ya Bwami imwi aimwi nzyezijisi mukuli wakwiibamba. Kutegwa bacite oobo, bakwesu abacizyi balaisalazya Ŋanda yabo ya Bwami lyoonse. Kunze lyaboobo, balacita amilimo imwi iikwabilila Ŋanda ya Bwami kuti itanyonyooki akubambulula oomo moyanyonyooka asyoonto.

 Kutegwa bagwasye mbungano kubamba kabotu Ŋanda ya Bwami, ba Local Design/Construction Department (LDC) balasala bakwesu ibayiisya bamwi kubamba kabotu Ŋanda ya Bwami, nkokuti ma maintenance trainers. Mukwesu umwi aumwi uupedwe mulimo ooyu ulanganya Maanda aa Bwami aali 6 kusikila ku 10. Ulabaswaya basikumwaya ibali mumbungano eezyi akubayiisya mbobakonzya kwiilanganya kabotu Ŋanda ya Bwami yabo. Kwainda myaka yotatwe, ulailanga-langa Ŋanda ya Bwami imwi aimwi kutegwa abone naa kuli mpoiyandika kubambululwa.

 Bakwesu abacizyi balalumba kulwiiyo ndobapegwa abakwesu aaba. Ba Indhumathi, mucizyi waku India, bakaamba kuti: “Lwiiyo lwakali lubotu. Cakali kukkomanisya kwiiya mbotukonzya kwiibamba kabotu Ŋanda yesu ya Bwami.” Ba Evans, mukwesu waku Kenya, bakaamba kuti: “Twakaiya mbotukonzya kuyobola mali kwiinda mukufwambaana kubamba moyanyonyooka muciindi cakulindila mane yanyonyookela limwi.”

 Mweelwe wamali aabelesyegwa mwaka amwaka kubamba kabotu Ŋanda ya Bwami ulaindana kweelana abusena nkoibede Ŋanda ya Bwami eeyo, noyakayakwa alimwi amweelwe wambungano ziibelesya. Mbuti mbotwaajana mali aaya?

 Kubamba Ŋanda ya Bwami kulagwasyilizyigwa azyakusanga. Ba Alexander, mukwesu uukkala ku Kazakhstan wakaamba kuti: “Mali aamwi alabelesyegwa kubbadelela intaneti alimwi azintu zimwi mbuli maanzi amalaiti. Mpoonya aamwi alabelesyegwa kuula ziyandika mbuli magulove, zintu zyakubelesya kusalazya alimwi apeenti.” Mali asyaala alasangwa kumulimo wanyika yoonse kugwasyilizya mapulojekiti mapati alimwi aayandika mali manji kapati munyika yoonse.

 Ikuti Ŋanda ya Bwami kaiyandika kubambulula kumane mulimo ooyo uyootola mali manji kwiinda mali ngobabelesya a Ŋanda ya Bwami eeyo mumyezi yobilo naa yotatwe, baalu bayoobazyibya ba LDC maintenance trainer. Ikuti ba LDC baizumizya pulojekiti eeyo, nkokuti ilabambululwa kubelesya mali aasangwa kumulimo wanyika yoonse. Mumwaka wamulimo wa 2023, mapulojekiti aasika ku 8,793 akacitwa kubelesya mali aasika ku $76.6 miliyoni. a Amubone mapulojekiti aaya obilo.

 Kucisi ca Angola, Ŋanda ya Bwami iyakakkala myaka iili 15 yakali kuyandika kubambululwa mumwi. Malaiti akali kuyandika kulangwa-langwa, bwaanda bwakalaandaukide alimwi bantu bakkala munsi-munsi bakali kutongooka kuti yanoowa mvwula, meenda akali kunjila mumabuwa aabo. Ba LDC bakapanga bubambe bwakuti ibambululwe. Pulojekiti eeyi yakatola mali aasika ku $9,285. Bantu bakkala munsi-munsi bakalumba kapati alimwi bakakkomana kubona mbowakabelekwa mulimo.

 Kucisi ca Poland, ciluli ca Ŋanda ya Bwami cakali kuzwizya alimwi kkapeti yakanyongana cakuti kunyina noyakali kukonzya kubambululwa. Ba LDC bakazumizya kuti kubikkwe ciluli cimbi akucinca kkapeti. Pulojekiti eeyi yakatola mali aasika ku $9,757. Akaambo kaceeci, Ŋanda ya Bwami taikayandiki kubambululwa kwamyaka iili mbwiibede.

 Mulimo wakubambulula taugwasyi buyo kwaabelesya kabotu mali pele alimwi upa kuti Jehova atembaulwe. Ba Shaun, mukwesu uukkala ku Tonga, wakaamba kuti: “Akaambo kamulimo wakubamba akubambulula ngotucita, tulakonzya kumukomba Jehova mubusena busalala, buli kabotu alimwi amu Ŋanda ya Bwami iibeleka kabotu yalo iipa bantu bamucilawo kumutembaula Jehova. Alimwi buya tulakkomana kutamba bantu ku Ŋanda yesu ya Bwami.”

 Toonse tulakonzya kugwasya kwiinda mukusalazya alimwi akububamba kabotu busena bwesu bwakukombela. Ba Marino, ba maintenance trainer kucisi ca Australia, bakaamba kuti: “Toonse tulakonzya kutola lubazu mumulimo ooyu uukkomanisya wakwaabamba kabotu Maanda eesu a Bwami. Twacita oobo, tupa kuti mali aasangwa kaayobolwa alimwi akuti kaabelesyegwa ooko kuyandika lugwasyo.”

 Ba Joel, mukwesu uukkala ku India, ulakukkomanina kwiibamba kabotu Ŋanda ya Bwami. Wakaamba kuti: “Kubelekela antoomwe abakwesu kundigwasya kweezyeezya mbokunoobede munyika mpya.” Ba Nicole, ibaambwa kale, bakaamba kuti: “Lino-lino, bakwesu bakali kubamba aakali kuzwa meenda mucimbuzi mpoonya mebo ndakali kukolopa meenda aakali kunjila mu Ŋanda ya Bwami. Nokuba kuti tiindakalimana penzi eelyo, ndakagwasyilizya kuti kutacitiki ntenda.”

 Ikuti kamuyanda kugwasyilizya kubambulula Ŋanda yanu ya Bwami, amwaambile baalu bamumbungano yanu. Kuyungizya waawo, mali ngomusanga taagwasyilizyi buyo Ŋanda yanu ya Bwami, pele alagwasyilizya a Maanda aa Bwami nyika yoonse. Mali aaya alakonzya kusangwa mutubbokesi twakusangila naa kubelesya donate.jw.org. Eelo kaka tulamulumba kapati akaambo kamuuya wanu wabwaabi.