Mu March 2020, ciindi ba World Health Organization nobakaambilizya kubbuka kwabulwazi bwa COVID-19, ibanji tiibakali kuyeeyela kuti bulwazi oobu inga bwajatikizya nyika yoonse kwiinda amwaka omwe. Mamiliyoni aabantu, kubikkilizya a Bakamboni ba Jehova bamwi, bajatikizyigwa kumubili, mumizeezo alimwi akubula mali akaambo kabulwazi oobu. Mbuti Bakamboni ba Jehova mbobagwasyilizya muciindi eeci cabulwazi?

 Kwiinda mukusololelwa a Kkomiti Yabeendelezi ya Kabunga Keendelezya ka Bakamboni ba Jehova, ma Kkomiti Aagwasyilizya Nokwacitika Ntenda naa DRC mubufwaafwi, aainda ku 950 apangwa munyika yoonse kutegwa agwasyilizye muciindi eeci. Mumasena aamwi, makkomiti aaya apanga bubambe bwakuti bakwesu batambule lugwasyo kuzwa ku Bakamboni bali kumasena aayo, kumane kumwi, Bakamboni balagwasyigwa amfwulumende. Kuyungizya waawo, bapanga bubambe bwakugwasyilizya bantu banji aciindi comwe.

 Mucikozyanyo, atubone cakacitika ku Paraguay. Muteende umwi wakapa lipooti yakuti, akaambo kapenzi lyakubula mali ikwaba lyabulwazi oobu, “bantu banji mucisi eeci tabajisi zyakulya.” Pele ba DRC mucisi eeci bakalitalikide kale kupa zyakulya, zibelesyo zyakubelesya kusalazya, alimwi ansipa, zibelesyo zyoonse eezyi zyakali kukonzya kukkala kwansondo zyobilo aŋanda akkala bantu bone. Zintu zyakali kuunka aŋanda imwi aimwi zyakali kusika kumali aatandila ku $30 (U.S.).

 Mbuti babelesi aaba mbobalikwabilila akukwabilila bamwi kubulwazi bwa COVID-19? Inga basama ma mask alimwi akutobela mulawo wakutantamukana. Kumane balasinizya kuti kumakkampani nkobaula zintu kuli bulondo alimwi balatobela malailile cakulomya. Eeci cilabikkilizya akuba masimpe kuti aabo balanganya zintu zyaulwa basamide zyakulikwabilila, balajaya tuzunda kwiinda mukusanzya myoota yabo, alimwi akuyobola zintu zyaulwa mubusena busalala. Mpoonya, aabo batola zintu abalo balautobela mulawo wakutantamukana ciindi nobapa bakwesu zintu.

 Kuzoosika mu January 2021, Kkomiti Yabeendelezi yakazumizya mali aainda ku 25 million dollars (U.S.) kugwasyilizya lya COVID-19. Bakumitabi alimwi abamumakkomiti aa DRC baabelesya kabotu mali aaya aasangwa alimwi akubeleka canguzu kujana ziyandika amuulo waansi. Mucikozyanyo ku Chile, bakwesu ibabelekela mumulimo wakugwasyilizya nokwacitika ntenda bakali kuyanda kuula nyabo zilema makkilogilamu aali 750. Pele muulo wanyabo wakalitantide ziindi zyobilo mumwezi buyo omwe! Nokwakainda mawoola obilo kuzwa nobakazumina kuula nyabo amuulo waatala, sikusambala wakabaambila kuti sikuula umwi wakazijola nyabo nzyaakaulide. Muciindi cakubapa amuulo ngobakamvwanide, sikusambala wakaujola muulo akubasambalila amuulo wamwezi wainda!

 Nokuba boobo, ciindi bakwesu nobakaunka kuti bakaakubweze nyabo zyabo, sikusambala wakasola kubacincila maano, akubabejekezya kuti tiibakali kuzyaabanya kabotu zyakulya, mbuli mbunga zimbi mbozyakali kucita. Naakamana kupaila cakaumuumu, mukwesu umwi wakamupandulwida sikusambala kuti bakasaanguna kuvwuntauzya mumbungano imwi aimwi kutegwa bazyibe baabo ibayandika lugwasyo ncobeni. Bakwesu alimwi bakapandulula kuti, akaambo kakwiindana kwabaabo bakali kuyoopegwa, zyakulya bakali kuyoozibikka kweelana amboibulide mikwasyi iiyozitambula. Kumaminino, bakaambila sikusambala kuti mali oonse ngobabelesya Bakamboni ba Jehova asangwa buya, alimwi amulimo ngobabeleka ngwakulisungula buyo. Wakakkomana kapati kumvwa boobo. Sikusambala ooyu tanaakabajolela buyo muulo bakwesu, pele wakasanga anyabo zilema makkilogilamu aali 400 nobakamuula alimwi.

 Ba Lusu, bamukamufwu bacembeede baku Liberia, bakkala abanamukwasyi bosanwe. Bumwi buzuba nobakali kulya cakulya cakuseeni alimwi akulingaula lugwalo lwabuzuba, muzyukulu wabo uujisi myaka iili 7 wakabona kuti cakulya camana muŋanda. Wakabuzya kuti, “Ino tulacita buti?” Ba Lusu bakamwaambila kuti bakalipailide kale kulomba lugwasyo alimwi bakalisinizyide kuti Jehova wakali kuyoobagwasya. Buzuba mboonya obuya, ba Lusu bakatambula fooni kuzwa kubaalu bamu mbungano akubaambila kuti bazoobweze zyakulya. Kumane bakaamba kuti: “Muzyukulu wangu wakaamba kuti lino wazyiba kuti Jehova ulaswiilila akwiingula mipailo nkaambo wakawiingula wangu.”

 Bakaintu bamwi ku Democratic Republic of Congo babambene kukkala amukwasyi umwi wa Bakamboni. Nobakabona mukwasyi ooyu kautambula cakulya kuzwa kubasyominyina, bakaamba kuti, “Bwamana bulwazi, andiswe tulaba Bakamboni ba Jehova nkaambo balabalanganya ibanyina muziindi zikatazya.” Balumi babo bakababuzya kuti, “Sena mulaba Bakamboni ba Jehova akaambo buyo kasaka lyamupunga?” Bakaintu aabo bakaingula kuti, “Kutali boobo, pele saka lyamupunga iilya mbumboni bwaluyando lwini-lwini.”

 Bakamboni ba Jehova bacikonzya kufwambaana kujana nzyobayandika bakwesu abacizyi muciindi eeci cabulwazi akaambo kazyakusanga zyanu zizwa ansi aamoyo. Twamulumba kapati akaambo kakusanga nkomucita kubelesya nzila zitondezyedwe a donate.jw.org.