Mazuba aano, Bakamboni ba Jehova batambula cakulya cakumuuya cinji kubelesya Intaneti kwiinda kaindi. Pele muzisi zinji, Intaneti iladula kapati. Kumane bamwi, bakkala mumasena Intaneti moikatazya naa moitako buya.

 Nokuba boobo, bakwesu abacizyi banji lino balakonzya kudauniloda zyakumwaya izijanika aintaneti! Ino bacikonzya buti kucita oobo?

 Kwiinda mububambe bwa JW Box. Aaka nkabbokesi kasyoonto nkozipegwa mbungano zili kumasena intaneti nkoikatazya. Kajisi ka router ikakaulwa buya, software yakapangwa aba Computer Department yaku Beteli, alimwi azyakumwaya amavidiyo izili aa jw.org. Kabbokesi aaka komwe kaulwa $75 U.S.

 Ku Ŋanda ya Bwami, bakwesu abacizyi balakkonekita mafooni amatabbuleti aabo ku JW Box akudauniloda zyakumwaya. Nobaba baabo ibajisi mafooni naa matabbuleti aakaindi naa aataduli balakonzya kukkonekita. Pele ikuti ambungano eeyo kakunyina intaneti, ino cikonzyeka buti kuba azyakumwaya zyaino-ino mukabbokesi? Bakumutabi balaakutuma ma Flash, alo aaulwa $4 U.S., aajisi zintu zipya zijanika a jw.org izikonzya kubikkwa mukabbokesi.

 Ino kabbokesi aaka kabagwasya buti bakwesu? Ba Nathan Adruandra, imuzyali uukkala ku Democratic Republic of Congo, bakaamba kuti: “Kwaciindi cilamfwu ndakali kusola kudauniloda vidiyo yakuti ‘O Jehova, . . . Nduwe Ngondisyoma’ ayakuti Amuyeeye Muka Loti, pele tiindakacikonzya, alimwi eeci cakali kundityompya. Lino ndilakonzya kwaadauniloda mavidiyo aaya afooni yangu, alimwi eeci cilatugwasya tobazyali kuyiisya kabotu bana besu.”

 Mukwesu uugwasyilizya mbungano kubelesya tubbokesi ootu ku Nigeria wakaamba kuti: “Bakwesu batubona kuti ncipego kuzwa kuli Jehova. Balikkomene kapati kuti lino balakonzya kudauniloda mabbuku amavidiyo aali mu Zibelesyo Nzyotubelesya Kapati Mukuyiisya.”

 Tubbokesi twiinda ku 1,700 twakatumwa kale kubakwesu ku Africa, Oceania, alimwi a South America, alimwi bubambe buli mukucitwa kutegwa tutumwe akumbungano zimbi. Ino mali aagwasyilizya bubambe oobu azwa kuli? Azwa kumali aasangwa kumulimo wanyika yoonse, ibunji bwangawo alasangwa kwiinda mukubelesya donate.jw.org. Tulamulumba kapati akaambo kakugwasyilizya camoyo woonse.