Mu January 2021, bamu Kabunga Keendelezya bakaambilizya kumwaigwa kwabbuku mpya libelesyegwa kwiiya Bbaibbele, bbuku lya Amupone Kukabe Kutamani! a Ino mwakalimvwa buti nomwakamvwa cakwaambilizya eeci? Ba Matthew, baku Canada, bakaamba kuti: “Ndakakkomana kapati! Alimwi lukkomano lwangu lwakaindila buya ciindi nondakali kuswiilila makani akweebelela mavidiyo aapandulula kaambo ncolyakamwaigwa alimwi ambolyakasolwa. Ndakaliyandide kulibona alimwi akutalika kulibelesya.”

 Bbuku lya Amupone Kukabe Kutamani! lyakajalula nzila mpya yakusololela ziiyo zya Bbaibbele. Nokuba boobo, ooku takuli kwiindana kulikke kuli akati kabbuku eeli mpya alimwi amabbuku ngotwakali kubelesya kaindi. Ikuti mubelesya bbuku lisimbidwe lya Amupone Kukabe Kutamani! ambweni mwakabona kuti liliindene. Kutegwa mubone kwiindana kuliko, atulange-lange mbolipangidwe.

 Pepa ndemu. Nkaambo nzi ncokwakali kuyandika kubelesya pepa ndemu? Bbuku eeli lijisi zifwanikiso zibotu kapati ziinda ku 600, nkokuti ziindi zitandila ku 10 kwiinda mubbuku lya Bbaibbele Ncolituyiisya! Kunze lyaboobo, lijisi cibeela cipati citalembedwe cili coonse. Ikuti bbuku kalijisi pepa lyuuba, mabala alimwi azifwanikiso izili kupeeji limbi zilalibonya. Kutegwa citacitiki eeci, bakwesu bamu International Printing Department (IPD), ku Wallkill, New York, U.S.A., bakasola mapepa aaindene-indene aali 4 ngobabelesya lino. Mpoonya bakaatola kuli bamu Kkomiti Iilanganya Zilembwa ya Kabunga Keendelezya balo ibakaalanga-langa akusala pepa litabalangali kapati. Nokuba kuti pepa eeli liladula kapati kwiinda pepa ndyotuvwula kubelesya mumabbuku eesu aambi, lipa kuti sikwiiya Bbaibbele kabala izili apeeji limwi alimwi kakunyina kunyonganizyigwa azili kunze lyapeeji.

 Civwumbyo ciindene. Civwumbyo cabbuku lyesu lipya ciliindene azivwumbyo zyamabbuku eesu aambi nkaambo calo atala cilambaikidwe pepa lili mbuli pulasitiki. Muciindi cakubelesya pulasitiki iitowa mumeso, kwakabelesyegwa pulasitiki iitatowi, calo cakapa kuti cifwanikiso icili aacivwumbyo kacilibonya kabotu. Kuyungizya waawo, pulasitiki eeyi ikwabilila bbuku kukuyauka naa kubija akaambo kakubelesyegwa kapati. Nokuba boobo, pulasitiki eeyi iladula ziindi zili 5 kwiinda pulasitiki iitowa mumeso. Aboobo, bakumitabi minji bakabelekela antoomwe kutegwa kuulwe pulasitiki eeyi.

 Nkaambo nzi ncokwakasalwa kuti kubelesyegwe zibelesyo zidula kupanga bbuku eeli? Mukwesu uubelekela kudipatimenti ya IPD wakaamba kuti: “Tulangila kuti bbuku eeli liyoobelesyegwa kapati, aboobo tuyanda kuti kalilibonya kabotu nokuba kuti lyabelesyegwa ziindi zinji.” Ba Eduardo, ibabelekela ku Printery Office kumutabi waku Brazil, bakaamba kuti: “Tulikkomene kapati kubona mbunga ya Jehova mboyakabelesya zibelesyo zidula kupanga bbuku eeli mbotu, liyumu alimwi likkomanisya kubelesya, pele aciindi ncomunya, kwaabelesya kabotu mali aasangwa.”

 Twakatalika kupulinta bbuku lya Amupone Kukabe Kutamani! mu March 2021. Eeci cakali ciindi cabulwazi bwa COVID-19, calo cakapa kuti kube buyumuyumu. Akaambo kakujalilwa a Beteli, babelesi beenda buya ibakali kugwasyilizya kupulinta bakaima alimwi aciindi eeci tiibakacili kwiita babelesi bapya a Beteli. Aboobo, mincini imwi yakanyina bantu bakwiibelesya, mpoonya imwi yakali jalilidwe kwaciindi cili mbocibede akaambo kamilawo yamfwulumende.

 Ino twakabuzunda buti buyumuyumu oobu? Ciindi cakupulinta casika, bakwesu alimwi abacizyi baku madipatimenti amwi bakali kugwasyilizya. Ba Joel ibabelekela kudipatimenti ya IPD bakaamba kuti, “Muuya wabo wakulyaaba alimwi akulisungula kwiiya mulimo mupya wakapa kuti tucikonzye kucita milimo yakali kuyandika.

 Nokuba kuti kwali buyumuyumu, twakacikonzya kupulinta mamiliyoni aamabbuku aa Amupone Kukabe Kutamani! Kutegwa mabbuku aaya apangwe kuyandika zibelesyo zinji ziindene-indene, mbuli pepa, inki, gulu, alimwi apulasitiki yakubikka acivwumbyo. Mumyezi buyo yakusaanguna iili 5, kwakabelesyegwa mali aainda ku $2.3 miliyoni (U.S.) kuula buyo zibelesyo. Kutegwa mali ayobolwe, tupulinta buyo mweelwa wamabbuku aawoodwa ambungano.

 Ino mbuti bamayi ba Bbaibbele alimwi abasikwiiya mbobalimvwa kujatikizya cibelesyo eeci cipya? Ba Paul, mukwesu waku Australia, bakaamba kuti: Bbuku lya “Amupone Kukabe Kutamani! nimbotu kubelesya cakuti lilandikulwaizya kusololela ziiyo zya Bbaibbele. Mbolipangidwe alimwi ambolilibonya lilakwelelezya. Lijisi twaambo twiindene-indene tutakazyi kumvwa, mibuzyo iisika aamoyo, mavidiyo, zifwanikiso, maccaati, alimwi ambaakani zyabasikwiiya. Mbozizekawudwe zifwanikiso zyandigwasya kuyaambele mukuyiisya kwangu.”

 Sikwiiya Bbaibbele umwi ku United States wakaamba kuti: “Ndilaliyanda kapati bbuku mpya. Zifwanikiso zilandigwasya kumvwisya twaambo tupati-pati. Mavidiyo andisika aamoyo alimwi alandikulwaizya kubweza ntaamu.” Sikwiiya Bbaibbele ooyu ulaiya ziindi zyobilo mumvwiki alimwi lyoonse ulajanika kumiswaangano.

 Kuciyandika kupulinta mabbuku manji aabbuku lya Amupone Kukabe Kutamani! mumyaambo minji. Alimwi buya, bamu Kabunga Keendelezya bakazumizya kuti bbuku eeli limwaigwe mumyaambo iili 710. Eeci caamba kuti kulayungizyigwa myaambo iili 340 ali yeeyo lyakamwaigwa bbuku lya Bbaibbele Ncolituyiisya!

 Ino mali aakupulintila azwa kuli? Azwa kumali aasangwa kumulimo wanyika yoonse, ibunji bwangawo alasangwa kwiinda mukubelesya donate.jw.org. Tulamulumba kapati akaambo kamuuya wanu wabwaabi, walo uutugwasya kumwaya mabbuku aakubelesya kuyiisya Bbaibbele kubantu bayanda kuzyiba kujatikizya Jehova alimwi ‘akupona kukabe kutamani.’—Intembauzyo 22:26.