Mumwaka wa 2022, mfwulumende zyamunyika yoonse zyakabelesya mali manji kwiinda kaindi aasika kumadola aali 2.24 tililiyoni (U.S.), kugwasyilizya basikalumamba babo. Cakaba boobo akaambo kacisi ca Russia icili mukulwana cisi ca Ukraine. Kweelana alipooti yakamwaigwa mu April 2023 aba Stockholm International Peace Research Institute (SIPRI), mu 2022:

•   Mali ngobakabelesya basikalumamba baku Europe akayungizyigwa a 13 pesenti mumwaka ooyu, ooku kwakali kuyungizyika kupati mu Europe kuzwa nokwakali nkondo mu 1991.”

•   “Cisi ca Russia…cakayungizya a 9.2 pesenti, calo cakapa kuti cizwe anamba 5 akuunka anamba 3 munyika yoonse.”

•   Cisi ca United States cakazumanana kuba atala kubelesya mali aabusikalumamba, “akaambo kakuti calo cakasika ku 39 pesenti kwiinda zisi zyoonse zili munyika.”

 “Akaambo kakuti myaka yamusyule mfwulumende zyazumanana kuyungizya mali ngozibelesya mubusikalumamba, eeci citondezya kuti tupona munyika iitakwabilidwe,” mbobakaamba ba Dr. Nan Tian, basikulemba lipooti ya SIPR.

 Bbaibbele lyakasinsima kuti mfwulumende izilaanguzu kapati zyakali kuyoobukilana, alimwi litwaambila cintu cilikke cikonzya kuleta luumuno lwini-lwini.

•   Bbaibbele lyaamba ciindi ncotupona kuti ‘nciindi cibikkidwe cakumamanino.’—Daniele 8:19.

•   Bbuku lya Daniele lyakasinsima kuti aciindi eeco, kunooli kuzundana kwabeendelezi bamunyika. Aaba beendelezi bamunyika bakali ‘kuyootonkana,’ naa kuzundana kutegwa umwi abe nguwe ubeendelezya boonse. Kuzundana ooku kwakali kuyootola “lubono” lunji kapati, naa mali manji.—Daniele 11:40, 42, 43.

 Kutegwa muzyibe zinji kujatikizya businsimi oobu bukkomanisya bwamu Bbaibbele, amweebelele kavidiyo kakuti Businsimi Ibwakazuzikizyigwa—Daniele Caandaano 11.

•   Bbaibbele lyaamba kuti Leza uyoozigwisya mfwulumende zyabantu. “Uyoobikka bwami ibutakanyonyoonwi pe. Bwami oobo tabukapegwi kubantu bambi pe. Buyoopwayaula akumanizya mami aaya oonse, mpoonya bwalo bulikke buyakwiima nji mane kukabe kutamani.”—Daniele 2:44.

•   Jehova a Leza ino-ino uyoocita cintu ncobaalilwa kucita bantu, nkokuti kuleta luumuno lwini-lwini lutakamani. Munzila nzi? Bwami bwakwe bwakujulu buyoonyonyoona zilwanyo zyoonse zyankondo alimwi akumana bubi boonse.—Intembauzyo 46:8, 9.

 Kutegwa mwiiye zinji kujatikizya ncobuyoocita Bwami bwa Leza, amubale cibalo cakuti “Mubweendelezi bwa Bwami bwa Leza ‘Luumuno Luyoovwula.’”