Kuzwa nondakazyalwa ndakali buyo kabotu, pele buzuba bumwi mu August 1967, kandili amyezi iili 18 mubili wakatalika kupya kapati masiku. Nondakabuka kuseeni ndakajana maulu aangu alebuka. Kumane ndakatolwa kucibbadela cakali munsi-munsi ankondakali kukkala mu Freetown, ku Sierra Leone, kwalo bamadokota nkobakajana kuti ndili abulwazi bwa polio, ibupa kulemana, kwaambisya kubana batanakkwanya myaka iili 5. Nokuba koolola tiikwakagwasya pe. Mukuya kwaciindi, akalebukilalimwi cakuti tiindakali kukonzya kweenda naa kwiimikila. Akaambo kabulema bwangu bataata bakali kunga bandaamba kuti “ndili sicilema.” Mbwaanga ndakali kukalaba buya, ndakali kulimvwa kubula mpindu, kulitenga alimwi akuba muntu waansi kapati.

 Mukkomponi mondakakomenena abamaama, bantu banji bakali bacete kapati. Nokuba kuti bantu bakali kundiyanda, iluyando mebo ndondakali kulombozya kapati ndwabataata, pele balo tiibakali kundiyanda. Bamwi bakali kuyeeya kuti ndakaloogwa buya. Mpoonya ibamwi bakali kwaambila bamaama kuti banditole kuŋanda yakali kulanganya bana balema. Bakali kuyeeya kuti bacita boobo balalemununwa. Nokuba boobo bakaukaka muzeezo ooyo, alimwi bakabeleka canguzu kundilanganya.

 Mbwaanga tiindakali kukonzya kwiimikila naa kweenda, ndakali kukalaba buya. Pele ndakali kulicisa akaambo kakukalaba aansi. Kutegwa ndilikwabilile, ndakali kusama zisani ziyumuyumu. Mpoonya kumaanza, ndakali kusama masilipa, aakali kubeleka mbuli kuti maguloovu. Kumbele, ndakatalika kubelesya zipulanga zyakapangidwe munzila iili kabotu zyakulikwabilizya kumaanza. Kutegwa ndeende, ndakali kuzibweza akuzibikka aansi, ndamana ndalikwelela kumbele. Kumane ndakali kukwela maulu kutozya kulubazu nkweena, kumwi kandibbendeka musana. Ndeenda ntaamu yomwe ndakeelede kuyiinduluka nzila njeena eeyi iikatazya. Aboobo ndakali kuminwa kapati mumaanza amumagwezyo. Eeci cakali kundipa kukatala kapati cakuti tiindakali kuvwula kuzwa aŋanda. Kunze lyaboobo, tiindakali kuunka kucikolo naa kusobana abana bamwi. Ndakali kulibilika kujatikizya mbondakali kunoopona ikuti naa bamaama bafwa.

 Ndakali kupaila kuli Leza kutegwa andigwasye kuti nditakabi sikulombelela. Ndakali kulimvwa kuti, Leza wakali kuyoondilanganya ikuti naa ndaswena kulinguwe akumubelekela munzila iiluzi. Aboobo, buzuba bumwi mu 1981, nokuba kuti cakali kukatazya kapati kukalaba, ndakaunka kucikombelo cakali munsi-munsi ankotwakali kukkala. Tiindakalikwaide akaambo kambobakali kundilanga bantu. Musololi wacikombelo tanaakanditambula, alimwi wakabakalalila bamaama akaambo kakuti ndakakkala abbenci ndyobakabbadelede bamwi. Kumane ndakalyaambila kuti nditakaunki kabili kucikombelo eeci.

 Bumwi buzuba kuseeni mu 1984, ciindi nondakali amyaka iili 18, ndakaunka muluumu yamujulu kumbali awindo alo mpondakali kukkala lyoonse. Aawa mpampawo mpondakali kubona zintu zyakali kucitika aanze. Kumane ndakayeeya kuti nduunke kuyookkalila aanze, alo aatakali kujanika-janika bantu. Nondakasika, ndakajana baalumi bobilo ibakali kuyaabukambauka kuŋanda aŋanda. Bakandaambila kujatikizya buumi bubotu bwakumbele kwalo buumi bwangu nkobuyoocinca. Kumane bakandibalila Isaya 33:24 alimwi a Ciyubunuzyo 21:3, 4. Mpoonya bakandipa broshuwa mbotu yakuti Mutangale Abuumi Butamani a-Nyika! alimwi bakandisyomezya kuti bakali kuyooboola alimwi kundiyiisya zinji.

 Nobakandiswaya alimwi, bakandaambila kuti bayooleta misyinali wakazwide aakusika, wazina lya Pauline, kuti azumanane amubandi wesu. Bakacita oobo, alimwi twakatalika kumvwana kapati aba Pauline cakuti cilongwe cesu cakaba mbuli cili akati kamwana abanyina. Bamaama bakali kundikulwaizya kwiiya Bbaibbele aba Pauline, balo ibakajisi luyando lwakulyaaba, luzyalo, kukkazika moyo, alimwi bakali kundilingula lyoonse. Bakandiyiisya kubala. Kunze lyaboobo, bakandigwasya kumuzyiba Taata siluyando walo ngondakali kulombozya, kwiinda mukubelesya bbuku lyakuti Bbuku Lyangu Lya Makani Aamu Bbaibbele.

 Zintu nzyondakaiya mu Bbaibbele zyakandikkomanisya kapati. Buzuba bumwi, ndakabuzya ba Pauline ikuti naa inga ndaakujanika kumuswaangano wa Bakamboni ba Jehova iwakali kwiitwa kuti Ciiyo Cabbuku Cambungano, a walo iwakali kucitilwa kuŋanda yamucizyi umwi Kamboni wa Jehova munsi-munsi ampondakali kukkala. Bakaingula kuti inzya. Nsondo yakatobela muli Bwabili, bakaboola kuŋanda akundilindila kuti ndilibambile kutegwa tuunke limwi kumuswaangano. Kumane muntu umwi wakandaambila kuti ndibaambile ba Pauline bandibbukiŋile moota, pele ndakati, “ndilaunka kandiyaabukalaba azipulanga zyangu.”

 Nondakali kuunka, bamaama abasimukoboma bakali kundilangilila mpoonya bakandifwida luse. Kumane bamwi bakatalika kufwubaazya ba Pauline akubaambila kuti, “Mumusungilizya buya!”

 Kumane ba Pauline bakandibuzya kuti “Jay, sena ulayanda kuunka?” Eeci cakali ciindi cakuti nditondezye kuti ndilamusyoma Jehova. (Tusimpi 3:5, 6) Ndakati “Inzya! Eeci ncakusala cangu.” Basimukoboma bakaile kuumuna buyo akulangilila ciindi nondali kuzwa ageeti. Nondakazwa bakatalika kundilumbaizya.

 Eelo kaka ndakaukkomanina kapati muswaangano! Wakandikatalusya! Boonse bakanditambula amaanza obilo. Kunyina bakandipa kulimvwa bubi. Ndakalilikwaide. Aboobo ndakatalika kuswaangana lyoonse. Kalitanalampa, ndakababuzya kuti naa inga kandijanika kumiswaangano mipati iicitilwa ku Ŋanda ya Bwami ya Bakamboni ba Jehova. Nokuba boobo, ndakali mucete, alimwi ndakajisi buyo madileesi obilo apeya yomwe yamabbusu. Pele, ndakalaalusyomo lwakuti bantu ba Leza bayoonditambula. Alimwi buya, mbocakaba oobo.

 Kutegwa ndikasike ku Ŋanda ya Bwami ndakeelede kukalaba buya kuya kumugwagwa, kumane ndakali kukkwela moota kusikila atala aamulundu alo mpoyakabede Ŋanda ya Bwami. Mpoonya bakwesu bakali kundinyamuna akunditola mu Ŋanda ya Bwami.

 Mbwaanga ndakabulabila bubotu bwa Jehova, ndakali kuyanda kuyubila mulinguwe. Aboobo ndakasala kuti kandinoojanika lyoonse kumiswaangano. (Intembauzyo 34:8) Mainza, kanji-kanji ndakali kusika ku Ŋanda ya Bwami kanditetede akubija mankandya, aboobo ndakeelede kucinca zisani; pele kucita boobo kwakali ampindu!

 Makani aajatikizya buumi bwangu alajanika mu Bbuku Lyaamwaka lya Bakamboni ba Jehova lyamu Cikuwa lyamu 1985. Ba Josette ibakkala ku Switzerland, nobakaabala makani aajatikizya buumi bwangu mu Bbuku Lyaamwaka, bakakulwaizyigwa kunditumina kacinga kabalema ikakajisi madikati alimwi amalifulekita aamibala mibotu. Kuzwa waawo, ndakali kweendeenda kakunyina kulisenda. Bana bakali kukanyomenena alimwi bakali kwaamba mbobakali kukkomana kundibona kandikkwelede kacinga kangu kacipaale. Kweendela akacinga kwandipa kuti ndicileke kulimvwa bubi, akutalika kulimvwa mbuli kuti ndime namalelo, alimwi akulimvwa kusumpuka.

 Tiicakandikatazya kuyaambele kumuuya akaambo kakuti ndakali kupona kale buumi buuba-uba alimwi akusalala mukulilemeka. Ndakatalika kutola lubazu mubukambausi akaambo kakacinga kangu, aboobo mu August 9, 1986, ndakabbapatizyigwa. Lubbapatizyo lwakacinca buumi bwangu cakumaninina, akundisumpula munzila njondatakali kuyeeyela. Akaambo kakujana Taata iwakali kundiyanda alimwi akuzungulukwa abantu bakali kundibikkila maano kapati, ndakaba alukkomano, kukkutila mubuumi, kulimvwa kuba ampindu, alimwi akucileka kulitenga.

 Kutegwa ndimulumbe Jehova, ndakayeeya kuti nditalike kubeleka mulimo wabupainiya bwaciindi coonse, pele tiindakali kusyoma kuti naa inga ndacikonzya. (Intembauzyo 116:12) Ndakaapailila makani aaya kumane ndakasala kuti ndisole. Ndakatalika bupainiya mu January 1, 1988, alimwi ndazumanana kuubeleka kusikila sunu. Eelo kaka eeci ncilongezyo citaliboteli kulindime! Ndilijisi bakwesu abacizyi ibandigwasya kusika ambaakani yangu yamwezi amwezi. Alimwi ndalibonena mbwaandigwasya Jehova kwiinda mumuuya wakwe uusalala.​—Intembauzyo 89:21.

 Mbwaanga mulimo wabupainiya bunji bwaziindi ngwakweendeenda, imaulu aangu akayuma nokuba kuti akacilebukide. Nokwakainda ciindi, ndakaunka kucibbadela cipya, kandili alusyomo lwakuti ndiyoojana basilisi bandoolola maulu alimwi akundibikka apulogilamu yakoololwa. Nokuba boobo, nesi wakandaambila kuti nditanoolipenzyi buyo kuunka akaambo kakuti ndakali kuyoofwa ino-ino. Ciindi mubelesinyina naakaamba majwi aaya ngeena, ndakatyompwa kapati. Aboobo nondakapiluka kuŋanda ndakapaila kuli Jehova kutegwa andiyumye akunditondezya nzila imbi iyakali kukonzya kundigwasya.

 Mulimo wabukambausi wakaba nzila yabusilisi iinda kubota kulindime. Wakandigwasya kunyanyaasya mubili. Nokwakainda myaka iili mbwiibede, nesi umwi iwakandaambilide kuti ndilafwa ino-ino wakainda munsi-munsi a Ŋanda ya Bwami kumane wakandibona. Wakagambwa naakabona kuti ndicipona!

 Nokuba kuti ndili mulema, ndilasoleka kujata bubi mumulimo wa Jehova. Bakwesu balandilumbaizya akaambo kabusungu alimwi akufwambaana kusika kumiswaangano. Lyoonse ndilacita oobo kutegwa ndijane ciindi cakwaanzya bakwesu abacizyi akutondezya kuti ndilababikkila maano.

 Ndabulabila bubotu bwa Jehova, alimwi ndalibonena zilongezyo zinji mubuumi bwangu. Ndilikkomene kuti ndakacikonzya kugwasya bantu botatwe kusika antaamu yakubbapatizyigwa. Umwi wabo, wazina lya Amelia, wakanjila cikolo ca Gileadi kkilasi namba 137. Mpoonya mebo ndakanjila Cikolo Camulimo Cabapainiya ziindi zili mbozibede, oobu mbubambe bubotu buzwa kuli Jehova! Kunze lyaboobo, Jehova wakandipa kuba alukkomano alimwi akucileka kulitenga. Lino bantu balandilemeka. Tandicilisendi pe. Ndilijisi balongwe beni-beni bali mukasimpe, okuno ku Freetown, icisi coonse alimwi amunyika yoonse.

 Lino kwainda myaka iibalilwa ku 40 kuzwa nondakaiya kujatikizya cisyomezyo ca Leza canyika mpya, ibulema mobuyoomana. Cisyomezyo eeci cazumanana kundikulwaizya, alimwi ndiliyandide kuyoobona mbociyoozuzikizyigwa. Ndilalindila cakukkazika moyo nkaambo ndilizyi kuti Leza wangu, Jehova, takamuki pe. (Mika 7:7) Kulindila cakukkazika moyo kwapa kuti ndilongezyegwe kapati. Jehova ulimukundigwasya kulwana mapenzi manji alimwi abukkale bukatazya. Lyoonse wali kundigwasya aciindi ceelede. Lino ndilikkomene akaambo kakuti ndakasumpulwa munzila njondatakali kuyeeyela ikuzwa aansi mpondakali kukalaba.