Cakusaanguna, amuzyibe kaambo aaka kamasimpe: Leza ulaabwene mapenzi aali munyika, alimwi ujisi makanze aakwaamana. (Intembauzyo 72:13, 14) Mujwi lyakwe Bbaibbele, Leza usyomezya kuti aabo ‘ibapenzyegwa lino, bayookatalusyigwa.’ Ino bayookatalusyigwa lili? “Aakuyubunuka Mwami Jesu kuzwa kujulu abangelo bakwe basinguzu . . . eelyo aakusubula baabo batamuzyi Leza abaabo bataswiilili makani mabotu aa Mwami wesu Jesu.” (2 Batesalonika 1:7, 8) Kuyubunuka kwa Jesu ooku kuyoocitika kumbele muciindi Bbaibbele ncolyaamba kuti “nkondo yabuzuba bupati bwa Leza Singuzuzyoonse,” buzuba oobu alimwi bwiitwa kuti Amagedoni.—Ciyubunuzyo 16:14, 16.

Munkondo eeyo iiboola kumbele, Leza takabelesyi bantu pe, uyoobelesya Mwanaakwe, Jesu Kristo, antoomwe azilenge zimwi zyamuuya zilaanguzu kutegwa zilwane bantu babi. Bangelo bayookumanizya kudyaaminina kwamisyobo yoonse.—Isaya 11:4; Ciyubunuzyo 19:11-16.

Kusikila sunu, Leza tacincide mbwazibona nkondo. Ucizibona kuba nzila iiluzi yakumana kudyaaminina alimwi abubi. Pele kweelana ambocakabede kuzwa kaindi, Leza nguujisi nguzu zyakusala ciindi nkondo  zili boobo nozyeelede kuba alimwi abaabo ibeelede kutola lubazu. Mbubwenya mbotwabona kale, Leza wasala kale kuti nkondo yakumana bubi akuvwuna bantu badyaamininwa iyoocitika kumbele alimwi akuti iyoolwanwa a Mwanaakwe, Jesu Kristo. Eeci caamba kuti nkondo ziliko mazuba aano tazizumizyidwe a Leza, kufwumbwa naa kuli kaambo kaboneka mbuli kuti kalamvwika ncozilwaninwa.

Mucikozyanyo: Amweezyeezye banabokwabo bobilo ibalwana ciindi bausyi nobatako. Mpoonya baleka kulwana kwakaindi kasyoonto akutumina bausyi fooni. Omwe akati kabo waambila bausyi kuti mwanookwabo ngowatalisya nkondo, awalo ooyu uumbi waamba kuti tanaayendelezyegwa kabotu. Boonse baambila bausyi, aumwi ulangila kuti bausyi balaba kulubazu lwakwe mumazwanga aabo. Nokuba boobo, bausyi nobamana kumvwa mbazu zyoonse zyobilo, baambila bana babo kuti bacileke kulwana akuti babalindile kutegwa bazikwaabambe makani basika. Aboobo banabokwabo aaba balindila. Pele kalitanalampa, batalika kulwana alimwi. Bausyi nobasika aŋanda, bacimwa akaambo kancobacita bana babo mpoonya babasubula boonse akaambo kakutabamvwida.

Mazuba aano zisi zilwana, kanji-kanji inga zilomba kuti Leza azigwasye. Pele Leza tagwasyilizyi munkondo zyamazuba aano. Muciindi caboobo, mu Jwi lyakwe Bbaibbele, cakusalazya waamba kuti: “Mutapilusizyi muntu uuli woonse bubi,” akuti “Mutapilusizyi muntu cibi.” (Baroma 12:17, 19) Kuyungizya waawo, bantu wabaambila kuti ‘bamulindile cakukkazika moyo’ kutegwa abweze ntaamu, yalo njayoobweza lya Amagedoni. (Intembauzyo 37:7, bupanduluzi buyungizyidwe) Ciindi zisi nozilwana muciindi cakulindila Leza kuti abweze ntaamu, Leza ubona kuti kulwana nkobacita ooko, ncitondezyo cakulisumpula calo cipa kuti anyeme. Aboobo, lya Amagedoni, Leza uyootondezya bukali bwakwe akwaamanizya mazwanga aamasi kwiinda “mukumanizya nkondo munyika yoonse mboizulwa.” (Intembauzyo 46:9; Isaya 34:2) Mubwini, Amagedoni inooli nkondo iiyoomanizya nkondo zyoonse.

Kumana kwankondo ncimwi cazilongezyo zinji iziyooletwa a Bwami bwa Leza. Jesu wakaamba kujatikizya mfwulumende eeyo mumupailo uuzyibidwe kapati naakati: “Abuboole Bwami bwako. Akucitwe kuyanda kwako ansi aano mbubonya mbuli kujulu.” (Matayo 6:10) Bwami bwa Leza tabukamanizyi buyo nkondo zyoonse, pele alimwi buyoogwisya aceeco cileta nkondo, nkokuti bubi. * (Intembauzyo 37:9, 10, 14, 15) Nkakaambo kaako basikutobela Jesu caluyandisisyo balangila kumbele kuzilongezyo zya Bwami bwa Leza.—2 Petro 3:13.

Pele ino tweelede kulindila kwaciindi cilamfwu buti kuti Bwami bwa Leza bukagwisye kupenga, kudyaaminina, alimwi abubi boonse? Kuzuzikizyigwa kwabusinsimi bwamu Bbaibbele kutondezya kuti tupona “kumazuba aamamanino” abweende bwazintu oobu. (2 Timoteyo 3:1-5) * Ino-ino, Bwami bwa Leza buyakwaamanizya mazuba aaya aamamanino kwiinda munkondo ya Amagedoni.

Mbubwenya mbokwaambwa kale, aabo ibayoonyonyoonwa munkondo eeyi yamamanino mbaabo “bataswiilili makani mabotu aa Mwami wesu Jesu.” (2 Batesalonika 1:8) Pele amuyeeye kuti, Leza kunyina nalukkomanina lufwu lwamuntu uuli woonse, kubikkilizya ababi. (Ezekieli 33:11) Mbwaanga “tayandi kuti muntu uuli woonse anyonyoonwe” munkondo eeyi yamamanino, wapa kuti makani mabotu aajatikizya Mwami wesu Jesu ‘akambaukwe munyika yoonse kuti bube bumboni kumasi oonse’ mamanino kaatanasika. (2 Petro 3:8, 9; Matayo 24:14; 1 Timoteyo 2:3, 4) Inzya, kwiinda mumulimo wakukambauka uucitwa nyika yoonse a Bakamboni ba Jehova, bantu bapegwa coolwe cakumuzyiba Leza, kuswiilila makani mabotu aajatikizya Jesu, alimwi akuyoopona ciindi nokutakabi limbi nkondo.