MAKANI AAYEEME AMUTWE UULI ACIVWUMBYO | SENA KULI MBOCIGWASYA KUPAILA
Sena Kuli Uuswiilila Mipailo?
Bantu bamwi bayeeya kuti kupaila nkusowa buyo ciindi, nkaambo kunyina uuswiilila mipailo. Bamwi balasola kupaila pele balimvwa kuti kunyina bwiinguzi mbobajana. Muntu umwi uutasyomi kuti Leza nkwali wakatalika kuyeeyela mbwabede Leza mpoonya wakapaila kuti: “Ndalomba undaambile buyo majwi masyoonto.” Pele wakaamba kuti Leza “kunyina naakaamba cili coonse.”
Nokuba boobo, Bbaibbele litusyomezya kuti kuli Leza uuswiilila mipailo yesu. Ibbaibbele lyakaamba kaambo aaka kubantu bakaindi noliti: “Masimpe [Leza] uyookufwida luzyalo mbwayakulimvwida buyo jwi lyako lyakulila kuti ugwasyigwe; mbwayakulimvwida buyo uyookuvwiila.” (Isaya 30:19) Kapango kambi kamu Bbaibbele kaamba kuti: “Mupailo wabalulami ulamubotela.”—Tusimpi 15:8.
Jesu wakapaila kuli Usyi, “eelyo wakamvwugwa.”—Bahebrayo 5:7
Alimwi Bbaibbele lilaamba zikozyanyo zyabantu ibali amipailo yakaingulwa. Kapango kamwi kaamba kuti Jesu wakapaila mupailo ‘wakulomba kuli yooyo iwakali kukonzya kumufwutula’ alimwi akuti “wakamvwugwa.” (Bahebrayo 5:7) Azimbi zikozyanyo zilajanika mulugwalo lwa Daniele 9:21 a 2 Makani 7:1.
Pele ino nkaambo nzi bantu bamwi ncobalimvwa kuti mipailo yabo tayiingulwi? Kutegwa mipailo yesu yiingulwe, tweelede kupaila buyo kuli Leza mukamwini Bbaibbele, Jehova * ikutali kuli leza uumbi uuli woonse nokuba kuli basikale. Alimwi Leza uyanda kuti ‘katulomba zintu zyeendelana akuyanda kwakwe’—zintu nzyakkomanina. Ikuti twapaila munzila eeyi, Leza utusyomezya kuti “ulatumvwa.” (1 Johane 5:14) Aboobo, kutegwa mipailo yesu yiingulwe, tweelede kumuzyiba Leza mukamwini Bbaibbele alimwi akwiiya kuyanda kwakwe.
Bantu banji basyoma kuti mupailo tacili cintu cicitwa buyo mubukombi, pele kuti Leza ulaiswiilila mipailo akuyiingula. Ba Isaac baku Kenya, bakaamba kuti: “Ndakapaila kulomba lugwasyo lwakuti ndicikonzye kumvwisya Bbaibbele. Tiilyakalampa, umwi muntu wakandisikila akundipa lugwasyo ndondakali kuyandika.” Ku Philippines, ba Hilda bakali kuyanda kuleka kufweba. Nobakaalilwa kwaziindi zili mbozibede, balumi babo bakabaambila kuti, “Ino mbuti kuti mwapaila kuli Leza kulomba lugwasyo?” Bakacita oobo mpoonya bakaamba kuti: “Ndakagambwa kapati kubona mbwaakandigwasya Leza. Kulombozya kufweba kwakatalika kumana asyoonto-syoonto. Ndakacikonzya kucilekela limwi kufweba.”
Sena Leza inga wayanda kumugwasya kujatikizya zintu nzyomulibilika zyeendelana akuyanda kwakwe?
^ par. 6 Jehova ndezina lya Leza kweelana ambolyaamba Bbaibbele.
