Ndakakomenena mudolopo lya Alicante, kujwe aankomwe yacisi ca Spain. Mukwasyi wangu tiiwakakamantene naaceya, aboobo nindakacili mukubusi ndakali kujanika kapati mumigwagwa. Afwaafwi ampotwakali kukkala kwakali busena mpobakali kumendela mataila. Ndakaba amulongwe iwakali kubelekela abusena oobo wazina lya José María. Wakali kabotu kapati alimwi wakali kundibikkila maano kwiinda bamukwasyi wangu. Muziindi zyamapenzi, wakali mbuli mwanookwesu ngotwakazyalwa limwi—mulongwe mwini-mwini, nokuba kuti wakali mupati kulindime amyaka iili 20.

José María wakali kwiiya Bbaibbele a Bakamboni ba Jehova. Ndakali kubona kuti wakali kuliyanda kapati Bbaibbele, alimwi kanji-kanji wakali kundaambila nzyaakali kwiiya. Ndakali kumuswiilila buyo ikutondezya bulemu, pele tiindakali kuzikkomanina nzyaakali kwaamba. Ndakali kuyeeya buyo zintu zimbi zyabukubusi. Nokuba boobo, zintu zyakali afwaafwi kucinca.

Tandiyandi kwaamba zinji kujatikizya ntenda yamumugwagwa iilya. Ncondinga ndaamba buyo ncakuti ndakali mufwubafwuba alimwi ndakali muyamba. Mubuzuba bomwe buyo, buumi bwangu bwakacinca cakumaninina. Ndakali mukubusi uulaanguzu, pele cakutayeeyelwa ndakalebuka mubili akujatwa mucibbadela. Cakandiyumina kapati kuti ndibuzumine bukkale oobu. Ndakazumanana kulibuzya kuti, ‘Ino cini ncondiponena ncinzi?’

Ba José María bakaboola kuzoondibona, mpoonya cakufwambaana bakapanga bubambe bwakuti Bakamboni ba Jehova ibakali mumbungano yaafwaafwi bandiswaye kucibbadela. Kuswaya nkobakali kucita lyoonse kwakandinjila mumoyo. Mbondakazwida buyo muwaadi yabantu bacisidwe kapati, ndakatalika kwiiya Bbaibbele. Ndakakazyiba kasimpe kujatikizya kaambo bantu ncobapenga akufwa alimwi akaambo Leza ncazumizya zintu zibyaabi kucitika. Alimwi ndakaiya kujatikizya zisyomezyo zya Leza zyakumbele, ciindi nyika yoonse noiyoozula bantu balondokede oomo imutakabi muntu naba omwe uuyaakwaamba kuti: “Ndaciswa.” (Isaya 33:24) Eeci cakali ciindi cakusaanguna mubuumi bwangu kuba abulangizi bwini-bwini butaliboteli.

Nondakazwa mucibbadela, ndakafwambaana kuyaambele muzintu nzyondakali kwiiya mu Bbaibbele. Kwiinda mukubelesya kacinga kabalema kapangidwe kabotu, ndakali kuswaangana a Bakamboni ba Jehova akutola lubazu mumulimo wabo wakukambauka. Mu November 5, 1988, ndakabbapatizyigwa mucibbaafa cipati, kandili amyaka iili 20 yakuzyalwa. Jehova Leza wakandigwasya kuzilanga kabotu zintu. Pele ino ncinzi ncodakali kukonzya kucita kutondezya kulumba?

Ndakalikanzide kuti nditalekeli bulema bwangu kundilesya kubelekela Jehova kusikila mpondigolela. Ndakali kuyanda kuyaambele. (1 Timoteyo 4:15) Kumatalikilo tiicakali cuuba-uba pe, nkaambo bamukwasyi wangu tiibakakkomana kuti ndajana lusyomo lupya. Pele ndakalijisi basyomima, ibakali bakwesu abacizyi bakumuuya. Bakali kundigwasya lyoonse kutegwa kandijanika kumiswaangano alimwi akutola lubazu mumulimo wakukambauka.

Nokuba boobo, mukuya kwaciindi cakalibonya antangalala kuti ndakali kuyandika kulanganizyigwa ciindi coonse. Nindakayandaula kwaciindi cilamfwu, ndakajana busena bwabalema mudolopo lya Valencia, makkilomita aali 160 Alicante nkoili kunyika. Busena oobu mbobwakaba munzi wangu.

Nokuba kuti tiindakali kubuka, ndakalikanzide kuzumanana kubelekela Jehova. Kwiinda mukubelesya mali ngobapegwa bantu balemene alimwi amali aamwi, ndakaula kkompyuta yalo iyakabikkwa kumbali aabulo bwangu. Alimwi ndakaula afooni. Lyoonse mafwumofwumo, aabo bandilanganya balandiyasyila kkompyuta alimwi afooni. Kutegwa ndikonzye kwiibelesya kkompyuta, ndibelesya kancini kubelesya mweebo. Kuyungizya waawo ndilijisi akasamu nkondibelesya amulomo. Kasamu aaka kalandigwasya kutaipa mabala aali akkiibboodi alimwi akutyanka manamba afooni yangu.

Ino lusumpuko lwamincini oolu lwandigwasya buti? Cakusaanguna, eeci cindipa coolwe cakulanga a webbusaiti ya jw.org alimwi a LAIBBULALI YAA INTANETI ya Watchtower. Eelo kaka zyandigwasya kapati zibelesyo eezyi zibotu! Kanji-kanji ndilatola ciindi cilamfwu kubala alimwi akuvwuntauzya mabbuku aamba zyamu Bbaibbele kutegwa ndizumanane kwiiya kujatikizya Leza alimwi abube bwakwe butaliboteli. Alimwi kufwumbwa naa ndalendelelwa naa kutyompwa, lyoonse inga ndilajana cintu cimwi a webbusaiti cikonzya kundiyumya-yumya.

Alimwi kkompyuta yangu ilandigwasya kuswiilila akutola lubazu mumiswaangano yambungano. Ndilaingula, kupaila, kupa makani, nokuba kubala magazini ya Ngazi Yamulindizi ikuti ndapegwa coolwe cakucita boobo. Nokuba kuti tandikonzyi kujanika cacigaminina kumiswaangano eeyi, pesi ndilimvwa kuti ndicili cibeela cambungano.

Kuyungizya waawo, ikuba afooni alimwi akkompyuta kulandigwasya kuti nditole lubazu cakumaninina mumulimo wakukambauka. Masimpe ngakuti tandikonzyi kuunka ŋanda aŋanda mbuli mbobacita Bakamboni ba Jehova. Pesi eeco tacindilesyi kukambauka pe. Kwiinda mukubelesya zibelesyo eezyi, ndilakonzya kwaambila bamwi nzyondisyoma. Akaambo kakuti ndilabukkomanina bukambausi bwaafooni, baalu bakandilomba kuti kandilanganya bukambausi bwaalubazu bwaafooni. Bukambausi bwamusyobo ooyu bwabagwasya kapati bakwesu abacizyi bamumbungano ibatacikonzyi kuzwa mumaanda aabo.

 Nokuba boobo, buumi bwangu tabuyeeme buyo azibelesyo eezyi pe. Buzuba abuzuba, beenzuma balaboola kundibona. Inga balaboola antoomwe abasimukobonyina alimwi abalongwe babo ibakkomana kubandika makani aamu Bbaibbele. Kanji-kanji balandilomba kuti kandisololela mumibandi ciindi notuli antoomwe ambabo. Zimwi ziindi, mikwasyi inga ilandiswaya akundilomba kuti ndibasangane ciindi nobakomba mumukwasyi. Cilandikkomanisya kapati, kwaambisya ciindi bana baniini nobakkala afwaafwi abulo bwangu akundaambila ikaambo ncobamuyandila Jehova.

Ndilakkomana kapati kuswaigwa abantu banji. Ziindi zinji ŋanda yangu ilazula bantu ibaboola kundibona kuzwa kumasena aali afwaafwi alimwi akule. Mbobandibikkila maano, kulabagambya kapati basikundilanganya abusena mpondikkala. Lyoonse ndilamulumba Jehova akaambo kakundipa coolwe cakuba akati kabunyina oobu bubotu kapati.

Ikuti naa muntu wandaanzya akundibuzya mbondilimvwide, inga ndivwiila buyo kuti, “Ndime yuuno, ndicipona!” Pesi ndilizyi kuti tandili ndelikke mupenzi eeli. Kufwumbwa naa tuli mubukkale buli buti, Banakristo boonse kuli nkondo njobalwana—“nkondo mbotu yalusyomo.” (1 Timoteyo 6:12) Ino ncinzi candigwasya kuzumanana kupona nokuba kuti nciyumu? Ndilapaila lyoonse alimwi ndilamulumba Jehova akaambo kakundigwasya kuzyiba ncondiponena. Ndilasolekesya kujata bubi mumulimo wa Leza, akubikkila maano kubulangizi ibuli kumbele.

Kanji-kanji ndilayeeya kujatikizya nyika mpya ambocinoobede kuzuza akusotauka alimwi. Zimwi ziindi, inga ndilaseka amweenzuma mulema wazina lya José María kujatikizya mbotuyoobalika antoomwe mumuzundano wakubalika. Inga ndimubuzya kuti, Ino nguni uutiikasiye mweenzinyina?” Walo inga wiingula kuti, “Tacikwe makani naa nguni uutiikasiye mweenzinyina. Ciyandika kapati ncakuyooba mu Paradaiso kutegwa tukazuze.”

Tiicali cuuba-uba kubuzyibila bulwazi bwangu. Ndilizyi kuti nondakacili mukubusi, ndakacita cintu cabufwubafwuba calo cakandiletela penzi eeli litaambiki. Pele ndilikkomene kuti Jehova tanaandilekelezya pe. Wandicitila zinji kapati—wandipa mukwasyi mupati wakumuuya, buumi, lukkomano lwakugwasya bamwi, alimwi abulangizi bwakumbele butaliboteli. Ikuti naa ndaambilwa kuti ndaambe majwi masyoonto kujatikizya mbondilimvwa, inga ndaamba kuti Jehova wandipa zinji kwiinda nzyondeelede.