Mibuzyo Yamu Bbaibbele Yaingulwa
Ino Buzuba Bwalubeta ninzi?
Nkaambo nzi buzuba bwalubeta ncobunooli ciindi calukkomano?
Mumazuba aansiku, Leza wakali kubelesya babetesi kufwutula bantu bakwe kuzwa kukutalulama. (Bab. 2:18) Bbaibbele lyaamba buzuba bwalubeta kuba bwalukkomano eelyo Jehova, walo uuli ngo Mubetesi wanyika yoonse, nayoofwutula bantu kuzwa kukutalulama.—Amubale Intembauzyo 96:12, 13; Isaya 26:9.
Leza wakasala Jesu kubacitila bululami bantu baumi alimwi abafwide. (Milimo 10:42; 17:31) Bantu banji bakafwa kabatamuzyi Leza. Mu Buzuba Bwalubeta, Jesu uyoobabusya bantu aaba kutegwa bakamuzyibe akumuyanda Leza wakasimpe.—Amubale Milimo 24:15.
Nkaambo nzi Buzuba Bwalubeta ncobuyootola myaka iili cuulu?
Bafwide bayoobusyigwa mumyaka iili cuulu. (Ciyubunuzyo 20:4, 12) Bayooyandika kupegwa ciindi kutegwa baiye nzila zya Leza alimwi akumumvwida. Mukwiimpana ambobayeeya bantu banji, Bbaibbele litondezya kuti bantu bayoobetekwa kweelana azyobayoocita caakwiinda ciindi cakubusyigwa.—Amubale Baroma 6:7.
Bbaibbele alimwi lyaamba buzuba bwalubeta kuti buyooboola cakutayeeyela, kaitanatalika myaka iili cuulu. Buzuba oobo bwiitwa kuti mamanino, kweelana ambokwabandikwa muzibalo zili kumatalikilo aamagazini eeyi. Mubuzuba oobo, Leza uyoobanyonyoona boonse aabo basampaula Leza, ibantu babyaabi. (2 Petro 3:7) Aboobo, tweelede kutondezya kuti tulamuyanda Leza.—Amubale 2 Petro 3:9, 13.
