Ndakazyalilwa mudolopo lya Baku, ku Azerbaijan. Tuzyedwe tobilo, mebo ndendime muniini. Bataata bakali ba Mozilemu mpoonya bamaama bakali ba Juda. Bazyali bangu bakali kumvwana kapati alimwi umwi aumwi wakali kuzizumina nzyaakali kusyoma mweenzinyina. Bamaama bakali kubagwasyilizya bataata ciindi nobakali kuliimya kulya ciindi ca Ramadan, abalo bataata bakali kubagwasyilizya bamaama ciindi nobakali kucita Pobwe lya Kwiindilila. Muŋanda yesu twakajisi Koran, Torah alimwi a Bbaibbele.

Mebo ndakali kulyaamba kuti ndili mu Mozilemu. Nokuba kuti tiindakali kudooneka kuti Leza nkwali, kwakali makani aakali kundinyonganya. Ndakali kulibuzya kuti, ‘Ino Leza wakabalengela nzi bantu alimwi ino cigwasya nzi kuti muntu kapenga buumi bwakwe boonse mumulilo Wahelo? Mbwaanga bantu bakali kwaamba kuti zintu zyoonse zicitika nkuyanda kwa Leza, ndakali kulibuzya kuti, ‘Sena Leza nguuletela bantu mapenzi alimwi ulanonezyegwa kulangilila bantu kabapenga?’

Nindakali amyaka iili 12, ndakatalika kupaila mipailo ya namaz, nkokuti cilengwa caba Mozilemu cakupaila ziindi zyosanwe abuzuba. Aciindi eeco, Bataata bakatutola kucikolo caba Juda. Akati kaziiyo izyakali kuyiigwa, twakali kuyiisyigwa zilengwa zyamu Torah alimwi amwaambo wa Chihebrayo. Abuzuba katutanatalika kwiiya, twakali kusaanguna kupaila kweelana azilengwa zyaba Juda. Aboobo, mafwumofwumo kuŋanda ndakali kupaila mipailo ya namaz, mpoonya mubuzuba mbweena oobo, ndakali kutola lubazu mumipailo yaci Juda kucikolo.

Ndakali kuyandisisya kujana bwiinguzi bukkazika moyo kumibuzyo yangu. Cakwiinduluka-induluka ndakali kubabuzya basololi bacikombelo bakucikolo kuti: “Ino Leza wakabalengela nzi bantu? Ino Leza ubabona buti bataata bakomba kucikombelo ca Mozilemu? Bukkale bwabo buli kabotu, pele nkaambo nzi ncobabonwa kuti tabasalali? Ino Leza wakabalengela nzi?” Bwiinguzi busyoonto mbondakajana tiibwakali kumvwika alimwi tiindakakkutila ambubo.

Lusyomo ndondakajisi muli Leza lwakamana mu 2002. Mbotwakalongela buyo kuya ku Germany, kwakainda buyo nsondo yomwe, bataata bakaciswa bulwazi bwakulebuka mubili mpoonya bakanetuka akutalika kufwumba bulamfwu. Kwamyaka minji ndakali kupaila kuti bamukwasyi wangu kabapona buumi buli kabotu. Mbwaanga ndakali kusyoma kuti alikke Singuzuzyoonse nguujisi nguzu zyakupa buumi alimwi anguzu zyakuzunda lufwu, abuzuba ndakali kukombelezya mumupailo kuti bataata batafwi. Ndakali kuyeeya kuti ncuuba-uba kuli Leza kuzuzikizya kulombozya kwangu kuzwa aansi amoyo. Ndakalisinizyide kuti ulakwiingula kulomba kwangu. Pele bataata bakafwa.

Ndakagambwa kuti Leza tanaakabikkila maano, aboobo ndakatyompwa kapati. Eeci cakandipa kutalika kuyeeya kuti, ‘Tandipaili bweelede, alimwi akuti Leza tako?’ Ndakazyingwa, kuzwa waawo tiindakapaila limbi mipailo ya namaz. Zikombelo zimwi ndakali kuzibona kuti tazigwasyi, aboobo ndakayeeya kuti taakwe Leza.

Nokwakainda myezi iili cisambomwe, Bakamboni ba Jehova bakatuswaya aŋanda yesu. Mbwaanga twakali kuzyuubaula kapati zikombelo zya Bunakristo, mebo amupati wangu twakali kuyanda kubatondezya cabulemu kuti nzyobakali kusyoma tiizyakaluzi. Twakababuzya kuti: “Ino nkaambo nzi Banakristo ncobamukomba Jesu, ciingano, Mariya alimwi amituni iimbi kakuli Milawo Iili Kkumi ilakasya kucita oobo?” Kwiinda mukubelesya Magwalo, Bakamboni ba Jehova bakatutondezya bumboni busalede bwakuti Banakristo bakasimpe tabeelede kukomba mituni alimwi akuti mipailo yeelede kugamikwa buyo kuli Leza. Makani aaya akandigambya kapati.

Mpoonya twakabuzya kuti: “Mbuti kujatikizya Butatu? Ikuti Jesu kali Leza, ino inga wapona buti anyika mpoonya akujaigwa abantu?” Alimwi bakaingula kubelesya Bbaibbele, kumane bakapandulula kuti Jesu tali Leza alimwi teelene a Leza pe. Bakamboni bakaamba kuti akaambo kaceeci, tabasyomi mu Butatu. Ndakagambwa akuyeeya kuti, ‘Ino aaba Mbanakristo bali buti?’

Nokuba boobo, ndakacili kuyanda kuzyiba ikaambo bantu ncobafwida alimwi akaambo Leza ncalekela kupenga. Bakamboni bakanditondezya bbuku lyakuti Luzibo Lutola Kubuumi Butamani, * lyakajisi zibalo izyakali kwiingula mibuzyo yangu. Mpoonya-mpoonya bakatalika kwiiya Bbaibbele andime.

Muciiyo cili coonse, ndakali kujana bwiinguzi bumvwika bwamu Bbaibbele kumibuzyo yangu. Ndakaiya kuti zina lya Leza ngu Jehova. (Intembauzyo 83:18) Bube bwakwe bupati nduyando. (1 Johane 4:8) Wakalenga bantu kutegwa abalo babe aacipego cabuumi. Ndakazyiba kuti nokuba kuti Leza ulakuzumizya kutalulama, mubwini kulamucima akuti ino-ino uyookugwisya kukabe kutamani. Ndakaiya kuti buzangi bwaba Adamu a Eva bwakabanjizya mumapenzi bantu boonse. (Baroma 5:12) Akati kamapenzi aayo, ndufwu lwabayandwa besu mbuli bataata. Nokuba boobo, Leza uyakwaagwisya mapenzi oonse aaya munyika mpya iiboola, oomo aabo ibakafwa mobayoopona alimwi.—Milimo 24:15.

Kasimpe kamu bbaibbele kakandigwasya kujana bwiinguzi buzulide. Ndakatalika kumusyoma Leza alimwi. Mbondakali kuyaabubazyiba kabotu Bakamboni ba Jehova, ndakazyiba kuti balijisi bunyina bwanyika yoonse. Lukamantano alimwi aluyando lwabo lwakandikkomanisya kapati. (Johane 13:34, 35) Nzyondakaiya kujatikizya Jehova zyakandipa kuti ndiyande kumubelekela, aboobo ndakaba umwi wa Bakamboni ba Jehova. Ndakabbapatizyigwa mu January 8, 2005.

Bupanduluzi bwamu Bbaibbele bumvwika bwakandigwasya kucinca alimwi akuzilanga kabotu zintu. Bupanduluzi busyomeka mbondakajana mu Jwi lya Leza bwandipa kuliiba mumizeezo. Ndilakkomana kapati akuumbulizyigwa akaambo kabulangizi bwakuyoobabona alimwi bataata kwiinda mububuke busyomezyedwe mu Jwi lya Leza.—Johane 5:28, 29.

Lino kwainda myaka iili cisambomwe kuzwa nindakakwatwa kubalumi bangu ibamuyanda kapati Leza ba Jonathan. Toonse twaiya kuti kasimpe kajatikizya Leza kalamvwika alimwi nkauba-uba kukateelela, alimwi buya ndubono luyandika kapati. Nkakaambo kaako tulakkomana kwaambila bamwi kujatikizya lusyomo ndotujisi alimwi abulangizi. Lino ndabazyiba bwini mbobabede Bakamboni ba Jehova kuti Mbanakristo bakasimpe.