Lufwu ngusinkondoma uuyoosya kapati. Tulasola kululwana anguzu zyesu zyoonse. Cilatukatazya kuzumina ciindi notwafwidwa muntu ngotuyanda. Ambweni ciindi notuli bakubusi inga tulaanguzu kapati cakuti tatuyeeyi akuti sinkondoma ooyu ulakonzya kutusikila, muzeezo uli boobu inga katuujisi kwaciindi cilamfwu.

Kunze lyaba Farao bakaindi, kwakali buyo bantu basyoonto ibakali kuyeeya kujatikizya buumi butafwi. Mubuumi bwabo boonse kubikkilizya abuumi bwabantu banji, bakali kusoleka kucita zyintu zimwi kutegwa kabatafwi. Zyuumbwe zipati nzyobakali kuyaka zilatondezya makanze ngobakajisi alimwi mbumboni bwakuti bakaalilwa.

Bami baku China abalo bakajisi muzeezo nguwenya ooyo wakuyandaula buumi butafwi, pele balo bakabelesya nzila iimbi—kunywa musamu ngobakali kuyeeyela kuti inga wabapa kupona kukabe kutamani. Mwami Qin Shi Huang wakaambila basyaazibwene bakwe kuti bajane musamu wamasalamuzi uukonzya kupa kuti bantu kabatafwi. Pele misamu minji njobakali kuvwelenganya yakajisi mercury iikola, alimwi kulangilwa kuti umwi akati kamisamu eeyi ngowakamujaya.

Kuluulwa kuti mumwaka wa 1513 C.E., sikulingula masena wazyina lya Juan Ponce de León, wakeenda mulweendo lwamulwizi kuya ku Puerto Rico kuyooyandaula musamu wakutacembaala. Mulweendo ndulonya oolo wakazyiba masena mbuli Florida, U.S.A., pele wakafwa nokwakainda buyo myaka misyoonto kuzwa naakalwana abana America bakubusena ooko. Kuzwa leelyo kunyina musamu wakutacembaala wakajanwa.

Bama Farao, bamami, alimwi abasikulingula masena boonse bakali kuyanda kuzunda lufwu. Nguni akati kesu uunga waamba kuti tauyandi muzeezo ngobakajisi, nokuba kuti bakali kubelesya nzila nzyotutakkomanini? Kuzwa ansi aamoyo, toonse tulayanda kuzumanana kupona.

Ino nkaambo nzi ncotutaluyandi lufwu? Ibbaibbele lilakapandulula kaambo. Kujatikizya Mulengi wesu, Jehova Leza, * lyaamba kuti: “Wacita kuti zintu zyoonse  zibote kuziindi zyazyo zyeelede. Wabika bulangizi bwabuumi buteeli mumyoyo yabo.” (Mukambausi 3:11) Tuyanda kuzumanana kukkomana azyintu zibotu zyamunyika, ikutali kwamyaka iili 80 buyo naa kwiinda waawo. (Intembauzyo 90:10) Eeci ncouyanda moyo wesu.

Ino nkaambo nzi Leza ncaakabikkila “bulangizi bwabuumi buteeli” mumyoyo yesu? Sena wakali kuyanda kututyompya buyo? Peepe. Leza utusyomezya kuti uyooluzunda lufwu. Cakwiinduluka-induluka Bbaibbele lilaamba kujatikizya kugwisyigwa kwalufwu alimwi acisyomezyo ca Leza cabuumi butamani.—Amubone kabbokesi kakuti,  “Kuzunda Lufwu.”

Jesu Kristo wakaamba kuti: “Eeci caamba buumi butamani, ikuti bakuzyiba yebo O Leza mwini-mwini ooli olikke, ayooyo ngookatuma, Jesu Kilisito.” (Johane 17:3) Aboobo, nkondo yakuzunda lufwu taili yabuyo pe. Jesu wakaamba kuti Leza alikke nguukonzya kutulwanina nkondo eeyi akuzunda.