MAKANI AAYEEME AMUTWE UULI ACIVWUMBYO | SENA LEZA ULAYANDIKA KULINDISWE?

Ikaambo Leza Ncayandika Kulindiswe

Basyaazibwene mukusilika malwazi aamumizeezo baamba kuti, ikutegwa bantu bakkomane ncobeni tabayandiki buyo kuba azyintu zyakumubili, kuli azimwi nzyobayandika. Eeci cilalibonya mukuti bantu balayanda kuzulilwa kucintu cimwi cisumpukide kwiinda mbabo. Kutegwa bazuzikizye makanze aabo, bantu bamwi babelesya ciindi cabo cakulikondelezya kwiinda mukweebelela zilenge, zyintu zyakupanga-panga, nyimbo alimwi azimwi buyo. Nokuba boobo, bunji bwabo tabajani lukkomano lwini-lwini muzyintu eezyi.

Akaambo kakuti bantu bakazyalwa kabajisi luyandisisyo lwakuzyiba Leza, basikubala Bbaibbele tacibagambyi eeci pe. Zyaandaano zyakusaanguna mubbuku lya Matalikilo zitondezya kuti naakamana kulenga banabukwetene bakusaanguna, Leza wakali kwaambaula ambabo lyoonse, kutegwa babambe cilongwe anguwe. (Matalikilo 3:8-10) Leza tanaakalenga bantu kuti kabalyeendelezya; pele wakabalenga kabajisi luyandisisyo lwakubandika a Mulengi wabo. Ibbaibbele lilaamba kujatikizya luyandisisyo oolu cakwiinduluka-induluka.

Mucikozyanyo, Jesu wakaamba kuti: “Balikkomene aabo bazyi kuti bayandika zyintu zyakumuuya.” (Matayo 5:3) Kuzwa mumajwi aaya, tulakonzya kuzyiba kuti cintu ciyandika kapati kutegwa tujane lukkomano alimwi akukkutila mubuumi, nkuba aaluyandisisyo lwakuzyiba Leza. Mbuti mbotukonzya kucita oobo? Jesu wakapa bwiinguzi ciindi naakaamba kuti: “Muntu teelede kuponena acinkwa calo, pele weelede kuponena amajwi oonse aazwa kumulomo wa Jehova.” (Matayo 4:4) Muunzila nzi majwi aazwa kuli Leza, nkokuti mizeezo alimwi amalailile aa Leza aajanika mu Bbaibbele mbwaakonzya kutupa kupona buumi bukkomanisya alimwi bulaampindu? Atulange-lange nzila zyotatwe ziyandika kapati.

Tuyandika Busolozi Bubotu

Mazuba aano, kuli basyaazibwene banji kapati ibapa lulayo mumakani aajatikizya zilongwe, luyando, buumi bwamumukwasyi, kumana mazwanga, kujana lukkomano alimwi akupona buumi bulaampindu. Nokuba boobo, nguni weelela kutupa busolozi buli kabotu muzyintu eezyi kunze lya Mulengi, Jehova Leza?

Mucikozyanyo: Ikuti naa mwaula cintu cipya, mbuli  kkamela naa kkompyuta, mulangila kujana kabbuku kamalailile, ikapandulula kabotu-kabotu mbocikonzya kubelesyegwa cintu eeco. Bbaibbele inga twalyeezyanisya kukabbuku kamalailile. Ndibbuku lipandulula buumi bwabantu, ndyaatupa Leza sikutupanga, kutegwa tulibelesye. Eeli “bbuku lyamalailile” lilapandulula mbotwakapangwa alimwi ambotukonzya kupona kutegwa tugwasyigwe.

Mbubwenya mbuli kabbuku kamalailile ikakalembwa kabotu, alyalo Bbaibbele lilabacenjezya basikubala kujatikizya bukkale butali kabotu. Nokuba kuti lulayo bamwi ndobakonzya kutupa inga lwaboneka kuti luli kabotu alimwi talukatazyi kutobela, pele sena tacili camaano kuyeeya kuti tulakonzya kugwasyigwa alimwi akweeleba mapenzi kuti twaatobela malailile aa Mulengi?

Nokuba kuti Jehova Leza ulatupa busolozi alimwi amalailile, tatusinikizyi kwaatobela. Muciindi caboobo, akaambo kakuti ulatuyanda alimwi uyanda kutugwasya, calukkomano utwaambila kuti: “Ndime Jehova Leza wako. Ndime uukwiiyisya kuti ugwasigwe. Ndime uukweenzya munzila njoelede kutola. Nicakabota niwakaswiilila milazyo yangu! Lino luumuno lwako nilwakaba mbuli mulonga, abululami bwako nibwakaba mbuli mayuwe aalwizi.” (Isaya 48:17, 18) Mubufwaafwi inga twaamba kuti, ikuti twaatobela malailile aa Leza, tuyoopona kabotu. Munzila imwi inga twaamba kuti, kutegwa tupone kabotu alimwi katukkomene, Leza ulayandika kulindiswe.

Tuyandika Bwiinguzi Kumapenzi Amubuumi

Bantu bamwi baamba kuti Leza tayandiki mubuumi bwabo akaambo kakuti kuli twaambo tunji tubakatazya kapati tuteendelani akusyoma muli Leza siluyando. Mucikozyanyo, balakonzya kubuzya kuti: ‘Nkaambo nzi bantu bali kabotu ncobapenga?’ ‘Nkaambo nzi bana banyina milandu ncobazyalwa kabali balema?’ ‘Nkaambo nzi bantu bamwi ncozitabeendeli kabotu zyintu mubuumi?’ Eeyi mibuzyo ilayandika kapati, alimwi kujana bwiinguzi bukkazyika moyo cilakonzya kucinca buumi bwesu. Pele muciindi cakufwambaana kupa Leza mulandu akaambo kamapenzi aali boobu, atulange-lange Jwi lya Leza, Bbaibbele, ncolyaamba kujatikizya makani aaya.

Mucaandaano catatu mubbuku lya Matalikilo, tujana makani aamba zya Saatani, walo kali muciimo canzoka, iwakasunka banabukwetene bakusaanguna kutegwa batatobeli malailile aa Jehova Leza aakuti tiibakeelede kulya kucisamu cakuzyiba cibi acibotu. Saatani wakaambila Eva kuti: “Ne! Tamukonzyi kufwa pe. Nkaambo Leza ulizi kuti mubuzuba obo mbubonya mbomuyooulya, meso aanu ayoojuka, lino muyooba mbuli Leza, muyooziba bubotu abubi mbububede.”—Matalikilo 2:16, 17; 3:4, 5.

Kwiinda mumajwi aayo, Saatani tanaakali kwaamba buyo kuti Leza mubeji pele alimwi wakali kwaamba kuti bweendelezi bwa Leza tabululeme pe. Diabolosi wakali kwaamba kuti bantu balakonzya kupona kabotu ikuti baswiilila nguwe. Ino makani aaya akali kuyoobambwa buti? Pele Jehova wakazumizya kuti kwiinde ciindi cili mbocibede kutegwa bantu boonse balibonene naa majwi aa Saatani aakali aakubeja naa pe. Mubwini Leza wakali kupa Saatani alimwi abaabo bali kulubazu lwakwe ciindi cakuti batondezye naa bantu balakonzya kupona kabotu kakunyina kweendelezyegwa a Leza.

 Kweelana ambozibede zyintu, sena makani ngaakaamba Saatani ngamasimpe? Sena bantu balakonzya kupona kabotu akulyeendelezya kakunyina Leza? Mapenzi aacitikila bantu mbuli kutalulama, kuciswa, lufwu, bugwebenga, kutalilemeka, nkondo, kujaya cijaye-jaye, alimwi azyintu zimwi buyo izyapenzya bantu kwamyaka minji, zyoonse eezyi zitondezya kuti bantu tabakonzyi kupona kabotu akulyeendelezya kakunyina Leza. Muciindi cakupa Leza mulandu kujatikizya mapenzi aacitikila bantu, Bbaibbele lilatondezya cipa kuti kakuli mapenzi noliti: ‘Muntu weendelezya muntunyina kukumubisizya.’—Mukambausi 8:9.

Kujatikizya kaambo aaka, cilasalala kuti tuyandika Leza kutegwa tujane bwiinguzi kumibuzyo iijatikizya mapenzi aabantu alimwi ambwaakonzya kumanizyigwa. Ino Leza uyoocita nzi?

Tuyandika Lugwasyo lwa Leza

Kwaciindi cilamfwu bantu bali kuyanda kwaanguluka kuzwa kumalwazi, kucembaala, alimwi akufwa. Babelesya ciindi cinji, mali, alimwi anguzu kutegwa bazuzikizye makanze aabo, pele kunyina nizyabagwasya pe. Bamwi basyoma kuti kwiinda mukubelesya misamu iisiyene-siyene, kunywa meenda amwi aalibedelede naa kukkala mubusena bumwi cilakonzya kubapa kuti batacembaali. Kusolekesya kwabo koonse kwaile kubatyompya.

Leza uyanda kuti bantu kabapona kabotu alimwi kabakkomene. Aaya ngaakali makanze aakwe naakalenga bantu, alimwi ucayeeyede makanze aaya. (Matalikilo 1:27, 28; Isaya 45:18) Tulijisi lusyomo lwakuti kufwumbwa ncaakasyomezya Jehova Leza ciyoocitika ncobeni. (Isaya 55:10, 11) Bbaibbele lilatwaambila kujatikizya cisyomezyo ca Leza cakupilusya buumi bwamu Paradaiso mbobakasweekelwa banabukwetene bakusaanguna. Mubbuku lyamamanino mu Bbaibbele, tujana majwi aakuti: “[Jehova Leza] uyoosindula misozi yoonse kumeso aabo, alimwi lufwu talukooyoobako limbi, akwalo koomoka, kulila nokuba kucisa takukooyoobako limbi. Zyintu zyakaindi zyamana.” (Ciyubunuzyo 21:4) Ino Leza uyoocita nzi kutegwa kube bukkale oobu bubotu, alimwi mbuti mbotukonzya kugwasyigwa acisyomezyo eeci?

Mwana aa Leza, Jesu Kristo, wakayiisya basikumutobela kupailila kuti luyando lwa Leza lucitwe. Bantu banji baluuzyi alimwi balawiinduluka-induluka mupailo ooyu, walo bantu bamwi ngobaamba kuti Mupailo wa Mwami. Ooyu mupailo waamba kuti: “Taateesu ooli kujulu, alisalazyigwe zyina lyako. Abuboole Bwami bwako. Akucitwe kuyanda kwako ansi aano mbubonya mbuli kujulu.” (Matayo 6:9, 10) Bwami bwa Leza ninzila njayoobelesya Jehova Leza kugwisya zyintu zibyaabi zyaletwa abweendelezi bwabantu alimwi uyooleta nyika mpya yabululami njaakasyomezya. * (Daniele 2:44; 2 Petulo 3:13) Ncinzi ncotweelede kucita kutegwa tugwasyigwe acisyomezyo ca Leza?

Jesu Kristo wakaamba nzila iitakatazyi kutobela njotweelede kubweza naakati: “Eeci caamba buumi  butamani, ikuti bakuzyiba yebo O Leza mwini-mwini ooli olikke, ayooyo ngookatuma, Jesu Kilisito.” (Johane 17:3) Masimpe ngakuti, cilakonzyeka kupona buumi butamani munyika mpya yakasyomezyegwa kwiinda mukugwasyigwa a Leza. Bulangizi oobu bulakonzya kumupa kusyoma ncokuyandika kwiingula kuti inzya kumubuzyo ooyu wakuti, Sena Leza ulayandika kulindiswe?

Ecino Nceciindi Cakuyeeya Leza

Myaka iili 2,000 yainda, ku Aleyopagi naa ku Mars Hill, mu Atene, mwaapostolo Paulo wakaamba boobu kujatikizya Leza kubana Atene kuti: “Walo mwini nguupa bantu boonse buumi, muya alimwi azyintu zyoonse. Nkaambo walo nguutupa buumi, kweenda akupona mbubonya basikweema banu bamwi mbobaamba kuti, ‘Nkaambo aswebo tuli lunyungu lwakwe.’”—Milimo 17:25, 28.

Makani Paulo ngaakaambila bana Atene acili amasimpe. Mulengi wesu ulatupa muya ngotuyoya, cakulya alimwi ameenda ngotunywa. Mubwini tatukonzyi kupona kakunyina zyintu zibotu nzyatupa Jehova izigwasyilizya buumi. Pele ino nkaambo nzi Leza ncaazumanana kupa zyintu zili boobu kubantu boonse, nokuba kuti balamuyanda naa pe? Paulo wakaamba kuti: “Kutegwa bayandaulisye Leza, nokuba kwaampaampa buya akumujana ncobeni nokuba kuti mubwini tali kulamfwu kuli umwi aumwi wesu.”—Milimo 17:27.

Sena mulayanda kumuzyiba kabotu Leza, nkokuti, kwiiya zinji kujatikizya makanze aakwe alimwi alulayo lujatikizya mbotukonzya kupona kabotu lino alimwi kukabe kutamani? Ikuti naa mulayanda, tumukulwaizya kuti mukabandike amuntu iwakamupa magazini eeyi naa basikumwaya ba magazini eeyi. Bayookkomana kapati kumugwasya.

[Bupanduluzi buyungizidwe]

[Cifwanikiso icili apeeji 7]

Leza uyanda kuti bantu kabakkomene lino alimwi kukabe kutamani

[Cifwanikiso icili apeeji 4]

Mbubwenya mbuli kabbuku kamalailile, alyalo Bbaibbele ndibbuku lyamalailile aamba zyabuumi

[Majwi aakwelelezya sikubala aali apeeji 5]

“Ndime Jehova Leza wako. Ndime uukwiiyisya kuti ugwasigwe. Ndime uukweenzya munzila njoelede kutola. Nicakabota niwakaswiilila milazyo yangu! Lino luumuno lwako nilwakaba mbuli mulonga, abululami bwako nibwakaba mbuli mayuwe aalwizi.” —Isaya 48:17, 18

[Cifwanikiso icili apeeji 6]

Mu Bbaibbele, tulakonzya kubujana busolozi alimwi alugwasyo ndotuyandika