Mbomukonzya Kuzwidilila Mucikwati Cabili
NZILA ZIKONZYA KUPA MUKWASYI KUKKOMANA
Mbomukonzya Kuzwidilila Mucikwati Cabili
HERMAN: * “Bakaintu bangu bakafwa abulwazi bwa kkansa nikwakainda myaka iili 34 kuzwa ciindi nitwakakwatana. Ciindi nindakakwata alimwi, mukaintu wangu Linda wakali kulimvwa mbuli kuti ndilamweezyanisya kumukaintu wangu wakusaanguna. Kuyungizya waawo, balongwe bangu bakaindi kanji-kanji bakali kwaamba kujatikizya bube bubotu mbwaakajisi mukaintu wangu wakafwa, aboobo eeci cakali kumunyemya mukaintu wangu Linda.”
LINDA: “Nitwakakwatana aba Herman, ndakali kulimvwa kuti balumi bangu tiibakali kundibona kuti ndilayandika mbuli mbobakali kubona mukaintu wabo wakusaanguna. Wakali kuyandwa kapati, akulumbaizyigwa, alimwi akulemekwa. Zimwi ziindi inga ndilalibuzya naa kuli nobayoondiyanda ba Herman mbuli mbobakali kumuyanda.”
Ba Linda bakalekana abalumi babo. Balo aba Herman balikkomene kuti bakakwatana. Nokuba boobo, balazumina kuti cikwati cabili cilakonzya kuleta buyumuyumu butakonzyi kujanika mucikwati cakusaanguna. *
Ikuti naa mwakakwata naa kukwatwa alimwi, ino mulimvwa buti kujatikizya cikwati canu cabili? Mukaintu uutegwa Tamara, iwakakwatwa alimwi nikwakainda myaka yotatwe kuzwa ciindi nobakalekana abalumi bakwe, wakaamba kuti: “Ciindi nowakwatwa ciindi cakusaanguna inga kuli kulimvwa kuti cikwati canu tacikamani. Pele mucikwati cabili ambweni inga tiiwalimvwa boobo nkaambo lyoonse ulizyi kuti cikwati cako cakusaanguna cakamana.”
Nokuba boobo, banabukwetene banji bajana lukkomano lutamani mucikwati cabili. Bazwidilila mucikwati cabo, aboobo andinywe mulakonzya kuzwidilila! Munzila nzi? Amulange-lange buyumuyumu botatwe budumide kapati alimwi ambozikonzya kumugwasya njiisyo zyamu Bbaibbele. *
BUYUMUYUMU BWAKUSAANGUNA: CILAMUKATAZYA KULUBA CIKWATI CANU CAKUSAANGUNA KUTEGWA CITANYONGANYI CIKWATI CANU CIPYA.
Ba Ellen ibakkala ku South Africa bakaamba kuti: “Tandikonzyi kuluba mbozyakabede zyintu mucikwati cangu cakusaanguna, kwaambisya kuti twaunka kubusena nkukonya nkotwakali kuunka abalumi bangu bakusaanguna mumazuba aakulyookezya. Zimwi ziindi inga ndatalika kweezyanisya mulumi wangu mupya kumulumi wangu wakaindi.” Kulubazu lumwi, kuti muntu ngomukwetene limwi wakalikwete kaindi, cilakonzya kumucima kuti kanji-kanji kaamba makani aajatikizya ngobakakwetene limwi kaindi.
MUZEEZO UUKONZYA KUGWASYA: Mweelede kuzyiba kuti nywebo naa ngomukwetene limwi tamukonzyi kwiile kuluba mbozyakabede zyintu mucikwati cakusaanguna, kwaambisya kuti mwakali kwetene kwamyaka minji. Bamwi balazumina kuti zimwi ziindi bakali kulubizya akubelesya zyina lyamuntu ngobakwetene limwi kaindi kwiita muntu ngobakwetene limwi lino! Ino inga mwacita buti mubukkale buli boobu naa bukozyenye aboobu? Ibbaibbele lilailila kuti: “Amube amuzeezo omwe.”—1 Petulo 3:8.
Mutalekeli buzuba kupa kuti kamumukasya ngomukwetene limwi kwaamba zili zyoonse zijatikizya cikwati cakusaanguna. Ikuti naa ngomukwetene limwi wayanda kubandika kujatikizya buumi mbobwakabede angobakakwetene limwi kaindi, amuswiilile calweetelelo alimwi calubomba. Alimwi mutafwambaani kuyeeya kuti umweezyanisya buya. Ba Ian, ibakakwata alimwi myaka iili 10 yainda, bakaamba kuti: “Mukaintu wangu Kaitlyn kunyina naakali kubona kuti cilatondwa kubandika makani aajatikizya mukaintu wangu wakafwa. Muciindi caboobo, wakacibona kuti ninzila yakuzyiba cakapa kuti kandili boobu mazuba aano.” Mulakonzya kujana kuti mibandi iili boobu inga yamugwasya kuyumya cilongwe canu amuntu ngomukwetene limwi lino.
Amubikkile maano kubube bubotu mbwajisi muntu ngomukwetene limwi lino. Masimpe, ngomukwetene limwi ulakonzya kuti katajisi bube bumwi naa katakonzyi kucita zyintu zimwi nzyaakali kucita muntu ngomwakakwetene limwi kaindi. Pele kulalangilwa kuti awalo muntu ngomukwetene limwi lino kuli zyintu nzyacita kabotu kwiinda. Aboobo, amuyumye cilongwe canu amuntu ngomukwetene limwi lino ‘ikutali akaambo kakumweezyanisya amuntu uumbi,’ pele kwiinda mukuyeeya akulumba zyintu nzyomuyanda kujatikizya nguwe. (Bagalatiya 6:4) Mwaalumi umwi uutegwa Edmond, iwakakwata alimwi ziindi zyobilo wakaamba kuti: “Mbubwenya mbuli mbokutakwe zilongwe zikozyenye, taakwe zikwati zikozyenye.”
Ino inga mwacita buti kutegwa kubandika zyintu zibotu zyakamucitikila mucikwati canu cakusaanguna zitamunyemyi ooyo ngomukwetene limwi lino? Ba Jared bakaamba kuti balalumba kujatikizya zyintu zibotu zyakabacitikila abakaintu babo bakusaanguna alimwi ciindi aciindi balaziyeeya. Nokuba boobo, balikkomene abakaintu babo bapya.
AMUSOLE NZILA EEYI: Amumubuzye ngomukwetene limwi naa kuli nalimvwa kubijilwa ciindi nomutalika kubandika makani aajatikizya cikwati canu cakusaanguna. Amuzyibe ziindi nomuteelede kubandika makani aajatikizya cikwati cakusaanguna.
BUYUMUYUMU BWABILI: CILAMUKATAZYA KUYANZANA ABALONGWE BAKAINDI BATANAZYIBILANA ANGOMUKWETENE LIMWI.
Ba Javier, ibakakwata alimwi nokwakainda myaka iili cisambomwe kuzwa ciindi nobakalekana abakaintu babo bakusaanguna bakaamba kuti: “Kwaciindi cilimbocibede kuzwa ciindi nondakakwata alimwi, mukaintu wangu wakali kulimvwa kuti balongwe bangu bamwi bakali kumusunka. Ba Leo bakajisi penzi liindene. Bakaamba kuti: “Bantu bamwi bakali kwaambila mukaintu wangu kuti bakali kubayanda kapati akubazimba balumi bakwe bakusaanguna—bakali kwaamba boobo andime kandimvwide!”
MUZEEZO UUKONZYA KUGWASYA: Amusole kulibikka muciimo camweenzinyoko. Ba Ian ibaambwa kumatalikilo, bakaamba kuti: “Ndiyeeya kuti zimwi ziindi cilabakatazya balongwe bakaindi kuyanzana amuntu omwe buyo kakuli bakalizibilene abantu boonse bobilo. Aboobo, ‘kamunyoneka, akutondezya kubomba moyo cakumaninina kubantu boonse.’ (Tito 3:2) Amubape ciindi balongwe banu abamukwasyi wanu kutegwa bacince. Mbwaanga cikwati canu cakacinca, abalo balongwe banu balakonzya kucinca. Ba Javier, ibaambwa kale, bakaamba kuti mukuya kwaciindi, balo abakaintu babo bakacikonzya kubukulusya zilongwe zyakaindi. Bakayungizya kwaamba kuti: “Pele alimwi tulasoleka kupanga balongwe bapya, eeci catugwasya kapati.”
Amubikkile maano mbwalimvwa ngomukwetene limwi mwanooli antoomwe abalongwe banu bakaindi. Mucikozyanyo, kuti mwatalika kubandika makani aajatikizya muntu ngomwakakwetene limwi kaindi, amubelesye bupampu kutegwa ngomukwetene limwi lino atalimvwi kuti tiimwamubikkila maano. Kaambyo kamwi kamu Bbaibbele kaamba kuti: “Majwi aabantu bamwi alayasa mbuli ipanga, pele lulimi lwabasongo lulaponya.”—Tusimpi 12:18.
AMUSOLE NZILA EEYI: Amuyeeyele limwi bukkale bukonzya kumupa kutalikwaya nywebo naa ooyo ngomukwetene limwi. Kakucili ciindi, amubandikile limwi mbomukonzya kwiingula mibuzyo njobakonzya kubuzya balongwe banu alimwi amajwi ngobakonzya kwaamba kujatikizya cikwati cakusaanguna.
BUYUMUYUMU BWATATU: CILAMUKATAZYA KUMUSYOMA NGOMUKWETENE LIMWI LINO NKAAMBO NGOMWAKAKWETENE LIMWI KAINDI TAAKASYOMEKA.
Ba Andrew ibakasiigwa kubakaintu babo bakusaanguna bakaamba kuti: “Ndakali kuyoowa kusiigwa alimwi. Mukuya kwaciindi, bakakwata ba Riley, ibakaintu mbobajisi lino. “Kanji-kanji ndakali kulibilika kuti naa inga ndacikonzya kuba mulumi uuli kabotu mbuli mbobakabede balumi ba Riley bakusaanguna. Mane ndakali kuyeeya kuti ambweni inga babona kuti tandili kabotu mpoonya akusala kukwatwa kuli umbi.”
MUZEEZO UUKONZYA KUGWASYA: Amwaanguluke kumwaambila zyintu zimulibilisya ngomukwetene limwi. Ibbaibbele lyaamba kuti: “Makanze alasinkinizigwa na kwabula lulayo.” (Tusimpi 15:22) Kubandika kwabagwasya ba Andrew aba Riley kutegwa kabasyomana. Ba Andrew bakaamba kuti: “Ndakaambila ba Riley kuti kunyina nondiyooyeeya zyakulekana kuti njenzila nguba-uba yakumana mapenzi, mpoonya abalo ba Riley bakandisyomezya mbubwenya oobo. Mukuya kwaciindi, ndakabasyoma cakumaninina.”
Ikuti naa muntu wakakwetene ayooyo ngomukwetene limwi lino taakasyomeka, amusolekesye kucita zyintu zikonzya kupa kuti ooyo ngomukwetene limwi amusyome. Mucikozyanyo, ba Michel aba Sabine, ibakalekana abantu mbobakakwetene limwi kusaanguna, bakazuminana kuti kabaambilana kufwumbwa kuti babonana naa kubandika afooni abaabo mbobakakwetene limwi. Ba Sabine bakaamba kuti: “Kucita boobu kwakatupa kulimvwa kukwabililwa.”—Baefeso 4:25.
AMUSOLE NZILA EEYI: Amube aampomugolela caboola kumakani aakubandika amuntu ngomwiindene zizo, nokuba kubandika mulomo mpande, afooni, naa a Intaneti.
Bantu banji ibakwata naa kukwatwa alimwi bazwidilila muzikwati zyabo, aboobo acalo cikwati canu cilakonzya kuzwidilila. Alimwi kayi cino ciindi mulilizyi kabotu, kwiinda ciindi nomwakakwata naa kukwatwa ciindi cakusaanguna. Ba Andrew ibaambwa kumatalikilo bakaamba kuti: “Ndajana lukkomano lutaambiki mucikwati cesu amukaintu wangu Riley. Mumyaka iili 13 njotwakkala mucikwati, twaba acilongwe ciyumu ncotutayandi kusweekelwa.”
[Bupanduluzi buyungizidwe]
^ munc. 3 Mazyina amwi acincwa.
^ munc. 5 Masimpe, cikwati icakamana kwiinda mukufwidwa ciliindene acikwati cakamana kwiinda mukulekana. Cibalo eeci cibambilidwe kugwasya muntu uuli mubukkale buli boobu kutegwa azwidilile mucikwati cabili.
^ munc. 7 Kutegwa muzyibe zinji kujatikizya buyumuyumu buliko mukukomezya bana bakujana, amubone zibalo zijisi mutwe wakuti “Kuzwidilila Mumukwasyi Muli Bana naa Bazyali Bakujana” mumagazini ya Sinsimuka! yamu July-September 2012, iyakamwaigwa a Bakamboni ba Jehova.
AMULIBUZYE KUTI . . .
▪ Ino mbube nzi bulibedelede mbondiyandisya mbwajisi ngotukwetene limwi?
▪ Ikuti twatalika kubandika makani aajatikizya cikwati cakusaanguna, ino inga ndaweendelezya buti mubandi munzila iikonzya kutondezya kuti ndilamulemeka ngotukwetene limwi lino?
[Cifwanikiso icili apeeji 10]
Amucite zyintu nzyomutakonzyi kuluba izikonzya kumupa kukamantana mbuli banabukwetene
Andiza Inga Mwaakkomanina Ayaaya
MULAKONZYA KUKKOMANA MUMUKWASYI WANU
Amusyomeke Kuli Umwi Amweenzinyina
Sena kutacita bumambi ncecintu cilikke citondezya kuti mulasyomeka mucikwati?
NGAZI YAMULINDIZI
Kuzumanana Kuyaambele Cikwati Nocamana
Bunji bwabaabo ibalekana bajana kuti nocamana cikwati, buumi bulakatazya kwiinda mbobakali kubuyeeyela. Lulayo lwamu Bbaibbele lulakonzya kumugwasya kuliyumya.
MULAKONZYA KUKKOMANA MUMUKWASYI WANU
Mbomukonzya Kwaalwana Mapenzi
Kweendelezya makani munzila iili kabotu kulakonzya kutondezya kwiindana kuliko akati kacikwati ciyumu banabukwetene mobakkomene alimwi aceeco mobatamvwani.
